1 Peter 2

mewari

← Chapter 1 Jump to: Chapter 3 →

1ईं वाते थाँ छळ, ढोग, वेर भाव, कपट, दूजाँ पे दोस लगाणो अस्यी बुरईऊँ बंचन रेज्यो।

2जस्यान नुवो जनम लिदो तको बाळक माँ का खरा दूद की मनसा करे हे वस्यानीस थाँ आत्मिक दूद की मनसा राको, जणीऊँ थाँकी आत्मिक बड़ोतरी वे सके अन बंचाया जा सको।

3काँके जस्यान पुवितर सास्तर में लिक्यो तको हे के, “अबे थाँने पतो लागग्यो हे परबू थाँका वाते करता दयाळू हे।”

4ईं वाते थाँ परबू का नके आवो, वो जीवतो “भाटो” हे। वींने ईं दनियाँ का मनक तो नकार दिदो हो, पण वो परमेसर का वाते तो अनमोल को हे अन वणाईस वींने चुण्यो हे।

5थाँ भी जीवता भाटा का जस्यान हो थाँने आत्मिक मन्दर का रूप बणाया जारिया हे, जणीऊँ थाँ पुवितर याजक का जस्यान बणन अस्यान का आत्मिक बलीदान चड़ावो, जो ईसू मसी के वजेऊँ परमेसर के चड़ाबा का जोगा वेवे।

6ईं वाते पुवितर सास्तर में भी लिक्यो तको हे के, “देको, मूँ परमेसर का नगर में एक खुणा को भाटो मेलू हूँ जो घणो मुगो हे अन वो चुण्यो तको हे अन ईंपे ज्यो भी विस्वास करी, वो कदी हरमा ने मरी।”

7थाँ जो वींपे विस्वास करो हो वो थाँका वाते तो बनामोल को हे, पण जो वींपे विस्वास ने करे वाँके वाते, “वोईस भाटो, जिंने राज कारीगर बेकार मान्यो हे वोईस खुणा को खास भाटो बणग्यो।”

8अन वो “अस्यान को भाटो बणग्यो, जणीऊँ लोगाँ ने ठेस लागे। अन ठोकर खाबा वाते एक छाँट के जस्यान बणग्यो।” काँके वीं तो बचन ने मानन ठोकर खावे हे अन योईस वाँका वाते ठेरायो भी ग्यो हे।

9पण थाँ तो अस्या मनक कोयने हो, थाँ तो परमेसर का थरप्या तका मनक हो, थाँ रजवाड़ी याजकाँ की टोळी अन पुवितर परवार का हो, परमेसर थाँने अंदारा का राज मेंऊँ अचम्बावाळा उजिता में लाया हे, जणीऊँ थाँ परबू का अचम्बावाळा काम का बारा में बता सको।

10एक टेम ही, जद्याँ थाँ वाँकी परजा ने हा, पण अबाणू थाँ परमेसर की परजा हो। एक टेम ही जद्याँ थाँका पे परमेसर दया ने किदी ही, पण अबाणू वीं थाँका पे दया करे हे।

11हे मारा प्यारा भायाँ-बेना, थाँ जो ईं दनियाँ का मयने बारवासी मनकाँ के जस्यान हो, थाँकाऊँ अरज करूँ हूँ के, थाँ पाप करबा की बुरी मरजीऊँ खुद ने बंचान राकज्यो, ज्या थाँकी आत्माऊँ लड़ती रेवे हे।

12जीं यहूदी ने हे वीं मनक थाँने बुरा केवे हे, पण ईंका केड़े भी वाँका बचमें थाँको वेवार अन चालचलन हव वेणो छावे, जणीऊँ जणा बाताँ में वीं थाँने दोसी जाणन बदनाम करे हे, वीं थाँका भला काम ने देकन वाँकी वजेऊँ जीं दन परबू आई, वीं दन वीं परमेसर की मेमा कर सकी।

13परबू वाते मनकाँ मेंऊँ बणाया ग्या, हाराई अदिकारियाँ का बंस में रेवो। राजा का बंस में ईं वाते रेवो, काँके वो हाराई पे परदान हे।

14हाकम का बंस में, ईं वाते रेवो, काँके वीं कुकरमी ने दण्ड देबा वाते अन हव मनकाँ की बड़ई करबा का वाते राजा का आड़ीऊँ चुण्या तका मनक हे,

15काँके परबू की आ मरजी हे के, थाँ थाँका भला काम के वजेऊँ वेण्डा मनकाँ की बुरईऊँ भरी तकी बाताँ ने करबावाळा मुण्डा ने छानो कर दो।

16आजाद मनक के जस्यान जीवन जीवो अन ईं आजादी की आड़ में बुरई मती करज्यो, पण परबू का दास का जस्यान जीवन जीवो।

17हाराई मनकाँ को मान करो। विस्वास्याँऊँ परेम करो, परमेसर को आदर-मान करता तका वाँकाऊँ दरपो, अन राजा की इजत करो।

18हो दासाँ, आदर राकन आपणाँ-आपणाँ मालिकाँ का बंस में रेवो अन वाँकेइस बंस में मती रेवो जो भला अन हव हे, पण वाँके भी बंस में रेवो जी कल्डा हे।

19काँके यद्याँ कुई परमेसर का बारा में बच्यार करन अन्याव अन दुक जेलतो तको कळेस भोगे हे, तो वो बड़ई को जोगो हे।

20पण यद्याँ थाँने बुरा काम करबा का वजेऊँ कुट्या जावे अन थाँ दुक भोगो हो, तो ईंमें बड़ई की कस्यी बात हे? पण यद्याँ थाँने थाँका हव काम की वजेऊँ हताया जावे हे तो थाँ परमेसर का हामे बड़ई के जोगो हो।

21परमेसर थाँने ईं वाते बलाया हे, काँके मसी आपणाँ वाते दुक जेल्यो हो अन अस्यान करन वणा आपणाँ वाते एक हिक दिदी हे के, आपाँ भी वींका जस्यानीस चाल सका।

22सास्तर में लिक्यो तको हे के, “वणी कई पाप ने किदो हो अन नेई वाँका मुण्डाऊँ धोका की बाताँ निकळी।”

23जद्याँ वाँकी बेजती किदी गी, तो भी वणा किंकीई बेजती ने किदी। जद्याँ वीं दुक जेलरिया हा, तो भी वणा किंने भी धमकी ने दिदी, पण वणा आपणाँ खुद ने हाँचा न्याव करबावाळा परमेसर ने हूँप दिदा।

24वीं आपणाँ पापाँ ने खुद की देह पे लेन हूळी पे चड़ग्या, ताँके आपाँ पाप का वाते मरन धारमिकता का वाते जीवन जीवाँ, वींके मार खाबा के वजेऊँ थाँ हव व्या हो।

25काँके पेल्याँ थाँ गम्या तका गारा का जस्यान हा, पण अबाणू थाँ थाँका गवाळ्याँ अन थाँकी आत्मा की रकबाळी करबावाळा का नके पाच्छा आग्या हो।

← Chapter 1 Jump to: Chapter 3 →