1 Peter 3

mewari

← Chapter 2 Jump to: Chapter 4 →

1हो लुगायाँ, जस्यान दास मालिक का बंस में रेवे हे, वस्यान थाँ भी थाँका धणी का बंस में रेवो, काँके यद्याँ थाँका धणी परबू का बचन ने मानबावाळा भी वेवे, तो वींने कई केवा की जरूत कोयने, पण वो आपणी लुगई का वेवार ने देकन परमेसर का बचन पे चालबा लाग जाई।

2काँके वो देकी के, थाँ परमेसर को आदर-मान करो अन पुवितर चालचलन राको हो।

3थाँको सजणो-धजणो दिकावटी ने वे, अन थाँ होना का गेणा पेरबा में अन बाल गुतबा में अन हव हव गाबा पेरबा मेंईस मती लागी रेज्यो।

4पण थाँ थाँको मयने का मन ने परबू का वसनऊँ जो सान्ती अन हुदा भावऊँ भरियो तको हे, वणीऊँस खुद ने सजाज्यो, काँके अस्यान को सजणो-धजणो परमेसर का हामे घणो हव हे।

5काँके पेला का जुग में जो पुवितर लुगायाँ ही, वीं परमेसर में आस राकबावाळी ही, वीं खुद भी परमेसर की मरजी का जस्यान सजती-धजती ही। अन आपणाँ-आपणाँ धणी का क्या में रिया करती हे।

6जस्यान सारा अबराम का क्या में रिया करती ही अन अबराम ने खुद को मालिक मानती ही। अस्यान जद्याँ थाँ भी भलई करो अन कणीऊँ दरपो कोयने, तो थाँ वींकी बेट्या केवावो।

7अस्यानीस हो मोठ्याराँ, थाँ भी थाँकी लुगायाँ का हाते हमजदारी का हाते जीवन जीवो। लुगायाँ ने कमजोर हमजन वाँको आदर करो, ओ जाणन के, आपीं दुई जीवन का वरदान में पांतीदार हा, ताँके थाँकी परातना में कुई ओट ने आवे।

8मारी आकरी मरजी हे के, थाँ हाराई मनक एक मन रेवो अन थाँ हाराई ने मनकाँ का हाते मेल-मिलाप, भईचारा, दया करबावाळा अन भायाँ का हाते परेम-भावऊँ रेबावाळा बणणो छावे।

9बुरई का बदले बुरई मती करो। जद्याँ कुई थाँकी बेजती करे, तो वींके हाते थाँ भी वींकी बेजती मती करो पण वींका बदले थाँ वींने आसिरवाद दो, काँके परमेसर थाँने आसिरवाद का वारिस वेबा का वाते बलाया हे।

10जस्यान पुवितर सास्तर में लिक्यो तको हे के, “जो जीवन की आस राके हे हव दनाँ की आस राके हे, वो आपणी जीब ने बुरी बाताँ केवाऊँ अन होटा ने छळ करबा की बाताँऊँ रोकी राके।

11बुरई करणी छोड़न भलई करो, मेल-मिलाप करबा की कोसीस में लाग्या रो,

12काँके परबू की आक्याँ खरा मनकाँ पे लागी रेवे हे, अन वींका कान वाँकी परातना हुणबा का वाते वाँके आड़ी लाग्या रेवे हे, पण परबू वाँ मनकाँ का विरोद रेवे हे जो बुरई करे हे।”

13यद्याँ थाँ भलई करबा का वाते त्यार रेवो, तो थाँकी बुरई करबावाळा कूण वेई?

14यद्याँ थाँ भलई का वजेऊँ दुक जेलो हो, तो थाँ धन्न हो, ईं वाते लोगाऊँ दरपज्यो मती अन घबराज्यो मती।

15पण मसी ने परबू जाणन थाँ थाँका मनऊँ वाँको आदर करो। यद्याँ कुई थाँने थाँकी आस का बारा में पूछे, तो वींने जवाब देबा का वाते हमेस्या त्यार रेज्यो।

16थाँ थाँका मन ने पुवितर राकज्यो, जणीऊँ ईसू मसी में जो थाँका हव वेवार का बारा में ज्यो भी मनक बेजत करबावाळा हे, वीं हरमा मरे।

17यद्याँ परमेसर की याईस मरजी हे के, थाँ भला काम करता तका दुक जेलो, तो पछे बुरई करबाऊँ तो दुक जेलणो हव हे।

18काँके मसी भी आपणाँ पापाँ का वाते दुक जेल्यो हो। ईंको मतलब ओ हे के, वो निरदोस हो तो भी वो आपणाँ पाप का वाते एक दाण मरग्यो, जणीऊँ वो आपाँने परमेसर का नके ले जावे। वो देह का रूप में तो मरग्यो, पण आत्मिक रूप में जिवायो ग्यो हे।

19मरबा केड़े मरिया तका मेंऊँ जीवतो वेबा के, पेल्याँ वो मरिया तका मनकाँ की आत्मा, जीं न्याव वेबा का वाते केद में ही, वाँका में हव हमच्यार को परच्यार किदो।

20ईं वणा मनकाँ की आत्मा हे, जणा जद्याँ नूह नाव बणारियो हो वीं टेम परमेसर को केणो ने मान्यो, पण परमेसर धिज्या का हाते वाँकी वाट नाळरिया हा, वीं टेम भी नाव में आट मनकईस पाणीऊँ बंचाया ग्या हा।

21वो पाणी भी बतिस्मा का जस्यान हे, जणीऊँ अबे थाँ बंचाया जावो हो। अणी बतिस्मा को मतलब यो कोयने के, देह को मेल धोयो जावे, पण मन ने पुवितर करन खुद ने परमेसर का आड़ी फेरणो वेवे हे, काँके ईसू मसी मरिया तका मेंऊँ पाच्छा जीवता किदा ग्या हा।

22वो हरग में परमेसर का जीमणा पाल्डे बेट्यो तको हे, अन अबाणू हरग-दुत, अदिकारी अन हारी सगत्याँ वींके बंस में कर दिदी गी हे।

← Chapter 2 Jump to: Chapter 4 →