2 Thessalonians 1

mewari

Jump to: Chapter 2 →

1मूँ पोलुस, सिलवानुस अन तिमुतियुस का हाते यो कागद थिस्सुलुनिक्यों नगर की मण्डली का नाम लिकरियो हूँ, ज्या बापू परमेसर अन परबू ईसू मसी में हे।

2बापू परमेसर अन परबू ईसू मसी की दया अन सान्ती थाँका पे वेती रेवे।

3हो भायाँ-बेना, थाँका वाते माँने परमेसर ने धन्नेवाद देतो रेणो छावे अन ओ सई भी हे, काँके थाँको विस्वास घणो बड़तो जारियो हे, अन थाँको हाराई को परेम एक-दूँजा में घणो फल-फुलरियो हे।

4ईं वाते माँ खुद ईं परमेसर की मण्डली में थाँका पे मेपणो करा हा, काँके जतरा भी दुक अन कळेस हाँ, वाँने थाँ जेल्या, ईं हारी बाताँऊँ थाँके धीरज अन विस्वास का बारा में पतो चाले हे।

5ओ परमेसर का हाँचा न्याव को सई परमाण हे के, थाँ परमेसर का राज का जोगा हो, जिंका वाते थाँ दुक भी पारिया हो।

6परमेसर वोईस करी ज्यो सई हे अन जतरा थाँने दुक देवे हे, ईंका बदला में परमेसर वाँने भी दुक देई।

7अन परबू ईसू मसी जद्याँ आपणाँ हरग-दुत का हाते हगलती तकी वादी में हरगऊँ आई, तो थाँ जी कळेस जेलरिया हो, वो माकाँ हाते थाँने सक-चेन देई।

8अन जतरा परमेसर ने ने जाणे अन आपणाँ परबू ईसू का हव-हमच्यार ने ने मानी वाँने दण्ड दिदो जाई।

9वीं परबू का हामेंऊँ अन वाँकी सामरत का तेजऊँ छेटी वेन जुग-जुग का नास को दण्ड भोगी।

10ओ वीं दन वेई जद्याँ वो आपणाँ हाराई पुवितर मनकाँऊँ जतरा वींपे विस्वास करी मेमा अन आदर-मान लेवा आई। तो थाँ भी वाँका में भेळा वेवो, काँके माँ ज्यो हव हमच्यार थाँने बतायो हे, वींको थाँ विस्वास किदो हे।

11ईं वाते, माँ थाँका वाते हमेस्यान परातना करा हाँ के, आपणाँ परमेसर थाँने जुग-जुग के जीवन का जोगा बणावे, जणी वाते थाँने वणा बलाया हे। अन भलई की हरेक मरजी अन विस्वास का हरेक काम ने सामरत का हाते पूरा करो।

12जणीऊँ आपणाँ परमेसर अन परबू ईसू मसी की दयाऊँ आपणाँ परबू ईसू को नाम थाँकामें मेमा पावे अन थाँ वींमें पावो।

Jump to: Chapter 2 →