2 Thessalonians 3

mewari

← Chapter 2 Jump to:

1हो विस्वासी भायाँ, माकाँ वाते भी परातना करता रेज्यो, जणीऊँ परबू को हव हमच्यार जस्यान थाँका बचमें फेलरियो हे, वस्यानीस हाराई लोगाँ में बना रकावटऊँ हेलो फेले अन आदर-मान पावे।

2थाँ परातना करिया करो के, परबू माँने बुरा अन भटक्या तका मनकाँऊँ बंचावे, काँके हर कुई ईं हव हमच्यार पे विस्वास ने करे हे।

3पण परबू विस्वास जोगा हे। वींइस थाँने तागत देई अन सेतानऊँ बंचान राकी।

4परबू में माँने थाँका वाते पाको विस्वास हे अन थाँका बारा में माँने कई चन्ता ने हे के, जस्यान माँ थाँने करबा वाते क्यो हो थाँ वस्यानीस कररिया हो अन करता रेवो।

5परबू थाँका मन ने परमेसर का परेम ने हमजबा अन मसी की धिरजपणा की सगती का आड़ी बड़ावे।

6हो विस्वासी भायाँ, माँ थाँने परबू ईसू मसी में ओ आदेस देवा हा के, हरेक अस्या मनकाऊँ छेटी रेज्यो जीं आळकातक हे अन ज्या हिक माँ वाँने दिदी हे वींके जस्यान ने करे।

7जस्यान माँकी उठक-बेठक हे वस्यानीस थाँकी भी वेणी छावे अन आ कस्यान वेणी छावे ईं बात ने थाँ तो जाणोइस हो, काँके जद्याँ माँ थाँका हाते हा तो कदी भी माँ आळकातक ने हा।

8अन किंकी भी फोगट की रोटी ने खादी। पण रात-दन मेनत अन दुक उठान काम धन्धो करता हा, ताँके थाँका पे कई बोज ने पड़े।

9अस्यान की बात ने के, थाँका पे मारो हक ने हे, पण माँ छावाँ हा के, थाँ माँने देकन हिको अन माँके जस्यान जीवन जीवो।

10ईं वाते जद्याँ माँ थाँका नके हा तो भी थाँने याईस बात केता हाँ के, “यद्याँ कुई काम ने करणो छावे, तो वो खा भी ने सकी।”

11माँ हुण्यो हो के, थाँकामूँ नरई गलत गेले चालरिया हे अन कई काम तो ने करे, पण दूजाँ का काम में टाँग अड़ावे हे।

12अस्या मनकाँ ने परबू ईसू मसी में माँ आदेस देवा अन हमजावा हाँ के, छाना-माना खुद कमान खावो।

13पण हो विस्वासी भायाँ, थाँ भला काम करबा वाते हिम्मत मती छोड़ज्यो।

14यद्याँ कुई माकाँ ईं कागद में लिकी तकी बाताँ ने ने माने, तो वाँका पे नजर राकज्यो अन वणा हाराईऊँ छेटी रेज्यो जणीऊँ वीं हरमा मर जावे।

15वाँने दसमण मती हमज ज्यो, पण वाँने भई हमजन चेताज्यो।

16परबू थाँका हाराई का हाते रेवे अन परबू ज्यो खुद ईं सान्ती हरेक टेम अन हरेक तरियाऊँ देता रेवे हे थाँने हमेस्यान सान्ती देवे।

17मूँ पोलुस, थाँने खुद का हातऊँ जे मसी की लिकरियो हूँ। हाराई कागद के आकरी में याईस मारी हेन्याणी हे अन मारी लिकावट की ओळकाण भी याईस हे।

18आपणाँ परबू ईसू मसी की करपा थाँका हाराई पे वेती रेवे।

← Chapter 2 Jump to: