James 4

mewari

← Chapter 3 Jump to: Chapter 5 →

1थाँकामें लड़ई-जगड़ो काँ वेवे हे? ईंको मस थाँका मयने थाँकी भोग-विलास की मरजी हे ज्या थाँका मयने लड़ई-जगड़ो करीरी हे।

2थाँ मनसा तो राको हो, पण थाँने मले कोयने। ईं वाते थाँ हत्या करो हो अन थाँ जलन राको हो। पछे भी थाँने कई ने मले, जणीऊँ थाँ लड़ई-जगड़ो करो हो। थाँने थाँकी मनसा की चिजाँ ईं वाते ने मले, काँके थाँ परमेसरऊँ कोयने मागो हो।

3अन थाँ माँगो भी हो, पण थाँने मले कोयने, काँके थाँ बुरी मरजीऊँ माँगो हो। अन ज्यो मले वींने थाँ थाँके भोग-विलास में उड़ा देवो हो।

4हो कुकरमी लोगाँ, कई थाँ ओ ने जाणो हो के, ईं दनियाऊँ भईच्यारो राकणो परमेसरऊँ दसमणी राकणी वेवे हे? ईं वाते जो दनियाऊँ भईच्यारो राके हे, वो खुद ने परमेसर को दसमण बणावे हे।

5कई थाँ अस्यान होचो हो के, पुवितर सास्तर बेकार में केवे हे के, “जणी आत्माने परमेसर आपणाँ मयने राकी हे, वींका वाते वीं जलन राके हे, काँके वींने परमेसर खुब छावे हे?”

6पण परमेसर आपापे घणी दया किदी हे, ईं वाते सास्तर में लिक्यो तको हे के, “परमेसर मेपणा करबावाळा का विरोद में हे अन हुदा-हादा मनकाँ पे दया करे हे।”

7ईं वाते खुद ने परमेसर का बंस में कर दो। सेतान को विरोद करो, तो वो थाँका हामेऊँ भाग जाई।

8परमेसर का नके आवो, तो वो भी थाँका नके आई। हो पापी मनकाँ, थाँ थाँका हाताँ ने सुद करो। हो संका करबावाळा, थाँ थाँका मन ने पुवितर करो।

9होक करो, रोवो, अन दकी वेवो। थाँको दाँत काड़णो दुक में अन थाँकी खुसी उदासी में बदल जावे।

10थाँ परबू का हामे हुदा-हादा बणो, जणीऊँ वो थाँने ऊसा करी।

11हो भायाँ, थाँ एक दूजाँ ने बदनाम मत करो। अन ज्यो कुई आपणाँ भई ने बदनाम करे हे अन दोस लगावे हे। अस्यान करन वो नेमा का विरोद में बोले हे अन नेमा ने दोसी ठेरावे हे। अस्यान करबाऊँ थाँ नेमाने मानबावाळा ने, पण वींका न्याव करबावाळा बण जावो हो।

12पण थाँ जाण लो के, नेम देबावाळा अन वींको न्याव करबावाळा तो बेस एकीस हे। अन वोईस बंचाबा की अन मारबा के तागत राक हे। तो पछे थाँ कूण हो जो थाँका पड़ोसी को न्याव करबावाळा बणो हो?

13अबे थाँ हुणो, ज्यो अस्यान केवो हो के, “आपाँ आज कन काले कणी नगर में जावा अन वटे जान एक दो साल काम धन्धो करन रिप्यावाळा बण सका हा।”

14पण थाँ तो यो भी ने जाणो के, काले थाँका जीवन में कई वेई। देको, थाँको जीवन कई हे? थाँ तो वीं धुंध के जस्यान हो, ज्या थोड़ीक देर का वाते दिके हे अन पाच्छी परी जावे हे।

15पण थाँने तो अस्यान केणो छावे के, “यद्याँ परबू की मरजी वेई, तो आपाँ जीवता रेवा अन ओ कन वो काम कराँ।”

16पण थाँ तो जुट-मुट को मेपणो करो हो। अस्यान को मेपणो बुरो हे।

17अन जो मनक भलई करणो जाणे हे, पण ने करे, तो वो पाप करे हे।

← Chapter 3 Jump to: Chapter 5 →