Luke 18

mewari

1पसे ईसू वाँने अणी बारा में एक केणी हूँणई के, हरदाण परातना करतो रेणो अन कदी हिम्मत ने हारणी।

2ईसू वाँने क्यो, “कणी नगर में एक न्याव करबावाळो रेतो हो, ज्यो ने तो परमेसरऊँ दरपतो हो अन नेई कणी मनक की परवा करतो हो।

3अन वणी नगर में एक विदवा लुगई रेती ही। वाँ वींका नके आन केती रेती के, ‘मारो अन मारे दसमणा का बचमें हाँचो न्याव कर।’

4वणी नरी दाण तो वींकी ने मानी पण आकरी में मन में होच-बच्यार किदो, ‘मूँ कदी भी परमेसरऊँ ने दरपूँ हूँ अन नेई कणी मनक की परवा करूँ हूँ।

5पण पसे भी या विदवा लुगई मने हताती रेवे हे, ईं वाते मूँ वींको न्याव करूँ। कटे अस्यान ने वे के, आकोदाण आ-आन मने परेसान करे।’ ”

6परबू क्यो, “हुणो के, यो अधरमी न्याव करबावाळो कई केवे हे?

7तो कई परमेसर आपणाँ चुण्या तका को हाँचो न्याव ने करी, जी रात-दन वाँकाऊँ अरज करता रेवे हे। कई वी वाँका न्याव करबा में मोड़ो करी?

8मूँ थाँकाऊँ केवूँ हूँ के, वी तरत वाँको हाँचो न्याव करी। पण मूँ मनक को पूत जद्याँ आऊँ, तो कई मूँ धरती पे विस्वास पाऊँ?”

9“पसे ईसू वणा लोग-बागाँ ने जी अणी बात का वाते आपणाँ खुद पे भरोसो राकता हा के, ‘माँ धरमी हाँ अन दूजाँ बेकार हे।’ वाँने आ केणी हुणई के,

10‘दो मनक मन्दर में परातना करबा ग्या, एक फरीसी हो अन दूज्यो लगान लेबावाळो हो।’

11फरीसी ऊबो वेन आपणाँ मन में या परातना करबा लागो के, ‘ओ परमेसर, मूँ थाँको धन्नेवाद करूँ हूँ के, मूँ दूजाँ मनकाँ की जस्यान लोबी, दूजाँ को बुरो करबावाळो, दूजी लुगायाँ का हाते गलत वेवार करबावाळो ने हूँ अन नेई अणी लगान लेबावाळा के जस्यो हूँ।

12मूँ हपता में दो दाण एकाणो राकूँ हूँ। मूँ मारी हारी कमई को दसमो हिस्सो भेंट भी देवूँ हूँ।’

13पण, वणी लगान लेबावाळे ज्यो छेटी ऊबो हो अन हरग आड़ी मुण्डो ऊसो भी ने किदी पण, वणी रो-रोन क्यो, ‘ओ परमेसर मूँ पापी हूँ, मारा पे दया करो।’

14मूँ थाँकाऊँ हाँची केवूँ हूँ के, परमेसर की नजराँ में वो फरीसी ने पण लगान लेबावाळो धरमी ठेरायो ग्यो अन घरे ग्यो, काँके ज्यो कूण आपणाँ खुद ने मोटो मानी, वो फोरो किदो जाई अन जी आपणाँ खुद ने फोरो मानी, वो मोटो बणायो जाई।”

15एक दन लोग-बाग आपणाँ छोरा-छोरी ने ईसू का नके लाबा लागा के, वी वाँका ऊपरे हात मेलन आसिरवाद दे, पण वाँका चेला यो देकन वाँने तापड़वा लागा।

16पण ईसू छोरा-छोरी ने नके बलान चेलाऊँ क्यो, “छोरा-छोरी ने मारा नके आबा दो अन अणाने रोको मती, काँके परमेसर को राज अस्याकोईस हे।

17मूँ थाँकाऊँ केवूँ हूँ के, ज्यो कुई परमेसर का राज ने छोरा-छोरी का जस्यान ने मानी, वी कदी वींमें ने जाई।”

18एक यहूदी हाकम ईसुऊँ पूँछ्यो, “ओ हव गरुजी, अनंत जीवन पाबा का वाते मूँ कई करूँ?”

19ईसू वींने जबाव दिदो, “थूँ मने हाँचो काँ केवे? परमेसर का बना ओरी कुई हाँचो कोयने।

20थूँ परमेसर की आग्या तो जाणे हे के, ‘कुकरम ने करणो, हत्या ने करणी अन चोरी ने करणी, किंकी जूटी गवई ने देणी अन आपणाँ बई-बापू को मान राकणो।’ ”

21वणी क्यो, “मूँ अणाने तो नानपणऊँ मानतो आयो हूँ।”

22ओ हूँणन ईसू वींने क्यो, “थाँरा में अबे भी एक कमी हे। आपणी हारी धन-दोलत ने गरीबा में बाँट दे अन पाछो आने मारे पाच्छे चाल थने हरग में धन-दोलत को खजानो मली।”

23वो ओ हूँणन घणो दकी व्यो, काँके वो घणो रिप्यावाळो हो।

24ईसू वींने देकन क्यो, “रिप्या-कोड़ी वाळा को परमेसर का राज में जाणो घणो दोरो हे।

25जस्यान ऊँट हुई का नाका मेंऊँ ने ने निकळ सके, वस्यानीस रिप्यावाळा को परमेसर का राज में जाणो घणो अबको हे।”

26वणा लोग-बाग जद्याँ आ बात हूणी तो वणा ईसुऊँ पूँछ्यो, “तो पसे कूण बंचायो जाई?”

27ईसू वाँने क्यो, “ज्यो मनकाऊँ ने वे सके हे, वो परमेसरऊँ वे सके हे।”

28तो पसे पतरस ईसुऊँ क्यो, “देको, माँ तो घर-बार हारोई छोड़न थाँका पाच्छे चालबा लागा हा।”

29ईसू वाँकाऊँ क्यो, मूँ थाँकाऊँ हाँची केवूँ हूँ के, “ज्यो कुई परमेसर का राज का वाते घर-बार कन आपणी खुद की लुगई ने कन भई-बन्दा कन बई-बापू ने कन छोरा-छोरी ने छोड़ देवे हे,

30वो अणी टेम में अणा हारईऊँ हेला पाई अन हातेई हाते आबावाळा परमेसर का राज में अनंत जीवन पाई।”

31पसे ईसू आपणाँ बाराई थरप्या तका चेला ने एक आड़ी लेजान वाँकाऊँ क्यो, “देको, आपाँ यरूसलेम जारिया हाँ अन हारी बाताँ मूँ मनक का पूत का वाते परमेसर का आड़ीऊँ बोलबावाळा लिकी हे, वीं हारी पुरी वेई।

32काँके मूँ ज्यो यहूदी ने हे वाँका हाताँ में हूँप्यो जाऊँ अन वी मारी रोळ करी। मारो अपमान करियो जाई अन मारा ऊपरे थूँक्यो जाई।

33पसे मने कुटी अन मार नाकी, पण मूँ तीजे दन पाछो जीवतो वे जाऊँ।”

34ईं चेला अणा बाताँ मूँ एक भी बात हमज ने सक्या। अन ईं बाताँ वाँका कान्दड़ा में ने पड़ी अन वीं हमज ने सक्या के, वीं ईं बाताँ किंका बारा में केरिया हा।

35जद्याँ ईसू यरीहो का नके पूग्या, तो वाँने एक आंदो मनक हड़क का कनारे बेटन भीक मांगतो तको मल्यो।

36अन वणी अणाचेत को भीड़-भाड़ का हाका-हूक हुणन पूछबा लागो, “ओ कई वेरियो हे?”

37लोगाँ वींने बतायो, “नासरत का ईसू जारिया हे।”

38तद्याँ वणी जोरऊँ हाको करन क्यो, “ओ ईसू, दाऊद की ओलाद, मारा पे दया करो।”

39जी मनक आगे-आगे जारिया हे, वणा वींने तापड़न क्यो, “छानो रे।” पण, वो ओरू भी कल्ड़ो हाको करबा लागो के, “ओ दाऊद का ओलाद, मारा पे दया कर।”

40तद्याँ ईसू वटेई रक ग्या अन आग्या दिदी के, “वींने मारा नके लावो” अन जद्याँ वी वींने लाया तो ईसू वणीऊँ पूँछ्यो,

41“थूँ कई छावे हे के, मूँ थाँरा वाते कई करूँ?” वणी क्यो, “ओ परबू, मूँ पाछो देकणो छावूँ हूँ।”

42ईसू वणीऊँ क्यो, “देकबा लागज्या, थारे विस्वासईस थने हव किदो हे।”

43वो तरत देकबा लागो अन परमेसर की बड़ई करतो तको वाँके पाच्छे चालबा लागो अन यो परचो देकन हाराई लोग-बाग परमेसर की मेमा करबा लागा।

← Chapter 17 Jump to: Chapter 19 →