Luke 23

mewari

1तद्याँ हारी सबा ऊबी वेगी अन वींने राजपाल पिलातुस का नके लेग्या।

2अन मनक यो केन वींपे दोस लगाबा लागा के, “माँ ईंने लोग-बागाँ ने भटकातो तको पकड़्यो हे। यो राजा केसर ने हाँसल जमा करबा का वाते नटे हे अन यो आपणाँ खुद ने राजा मसी केवे हे।”

3पिलातुस ईसुऊँ पूँछ्यो, “कई, थूँ यहूदियाँ को राजा हे?” ईसू वींने जबाव दिदो, “थूँ खुदई हाँच केरियो हे, मूँ वोईस हूँ।”

4तद्याँ पिलातुस मुक्य याजकाँऊँ अन लोग-बागाऊँ क्यो, “मने अणी मनक में कई दोस ने मलरियो हे।”

5पण, वी यो केता तका वींपे ज्योर देबा लागा के, “अणी पूरा यहूदियाँ में लोग-बागाँ ने आपणाँ उपदेसाऊँ भरमाया हे। अणी गलीलऊँ सरू किदो अन अबे हारोई गेलो पार करन अटे आ पूग्यो हे।”

6ओ हुणन पिलातुस पूँछ्यो, “कई ओ मनक गलीली हे?”

7अन ओ जाणन के, ईसू हेरोदेस का राज का हे, तो वाँने हेरोदेस का नके खन्दा दिदो। वणा दनाँ में हेरोदेस भी यरूसलेम में हो।

8जद्याँ हेरोदेस ईसू ने देक्या तो, वो घणो राजी व्यो, काँके नरी टेमऊँ वींने देकणो छारियो हो अन वो वींका बारा में पेल्या हूँण चुक्यो हो, वो ईसू का हाताऊँ परच्यो देकबा की मरजी राकतो हो।

9वो ईसुऊँ घणा सवाल पूछतो रियो पण, ईसू कई भी जबाव ने दिदो।

10मुक्य याजकाँ अन नेमा ने हिकाबावाळा वटे ऊबा तका हा अन वी वींका पे दोस लगारिया हा।

11तद्याँ दरबार हेरोदेस आपणाँ सपायाँ का हाते मलन बुरा वेवार करन वींकी रोळ किदी अन वींने जामूणिया रंग का गाबा पेरान वींने पिलातुस का नके पाछो खन्दा दिदो।

12वणी दनऊँ पिलातुस अन हेरोदेस का वसमें राजिपो वेग्यो अणीऊँ पेल्या वी एक-दूँजा का दसमण हा।

13पसे पिलातुस मुक्य याजकाँ, यहूदी नेता अन लोग-बागाँ ने एक हाते बलान वाँकाऊँ क्यो,

14“थाँ अणी मनक ने लोग-बागाँ ने भरमावो वाळो हमजन मारे नके लाया हो अन देको, में थाँका हामे वींकी परक किदी हे। पण, थाँ जणा बाताँ को ईंपे दोस लगावो हो, वणा बाताँ मेंऊँ ईंपे कई दोस ने पायो हे।

15अन नेई हेरोदेस पायो, काँके वणी ईंने आपणाँ नके पाछो खन्दा दिदो हे अन देको, अणी अस्यो कई भी ने किदो के, यो मोत की सजा को भुगते।

16ईं वाते मूँ ईंके कोड़ा मारन छोड़ देवूँ हूँ।”

17पिलातुस फसे का तेवार पे हर साल लोग-बागाँ का वाते कस्या भी एक बन्दी ने छोड़तो हो।

18तद्याँ हाराई मनक हाको करबा लागा के, “ईंने मोत की सजा दो अन माकाँ वाते बरब्बा ने छोड़ दो।”

19बरब्बा ने नगर में लड़ई-जगड़ो अन हत्या का करबा का मस जेळ में बन्द कर मेल्यो हो।

20पिलातुस ईसू ने छोड़णो छारियो हो ईं वाते वणी एक दाण ओरी मनकाँ ने हमजाया।

21पण वीं ज्योरऊँ हाको करन केबा लागा, “ईंने हूळी पे चढा दो, ईंने हूळी पे चढा दो।”

22पिलातुस मनकाँऊँ तीजी दाण पूँछ्यो, “अणी कई गलत किदो हे? में तो ईंमें कई दोस ने पायो हे, जणीऊँ यो मोत को दण्ड भुगते। ईं वाते मूँ ईंके कोड़ा लगवान छोड़ देऊँ।”

23पण वी हाराई मनक एक दाण पाछो हाको करन बोल्या, “ईंने हूळी पे चढा दो।” अन वाँके हाका-भार करबा वाँकी बात बणगी।

24ईं वाते पिलातुस हुकम दिदो के, जस्यान मनक केरिया हे वस्यान किदो जावे।

25अन वणी वीं मनक ने छोड़ दिदो, जणी लड़ई-जगड़ो अन हत्या किदी ही। यो मनक वोईस हो जिंका बारा में लोगाँ मांग किदी ही। ईसू ने मनकाँ का हाताँ में हूँप दिदो ताँके जस्यान वी छावे वस्यान कर सके।

26जद्याँ वीं मनक ईसू ने लेन जारिया हा, तो वणा समोन नाम को एक कुरेनी ने गामऊँ आवतो तको देक्यो। वणा वींने पकड़न वींका खाँदा ऊपरे हूळी मेल दिदी, ताँके वो ईसू का पाछे-पाछे चाले।

27अन लोग-बागाँ की मोटी भीड़ वींका पाच्छे चालरी ही अन वाँका में नरी लुगायाँ भी ही, जी ईसू का वाते रोरी ही अन छाती कुटरी ही।

28ईसू वाँका आड़ी देकन क्यो, “ओ यरूसलेम की बेट्या, मारा वाते मती रोवो पण, आपणाँ अन आपणाँ बाळकाँ का वाते रोवो।

29काँके देको अस्या दन आरिया हे, जद्याँ मनक केई, ‘घणी भाग्यवाळी हे वी लुगायाँ जी बना छोरा-छोरी की हे अन घणी भाग्यवाळी हे वा कोख जणी कदी बाळक ने जण्यो हे अन घणा भाग्यवाळी हे वी लुगायाँ जणा कदी आपणाँ छोरा-छोरी ने दूद ने पायो।’

30पछे वीं मनक मंगराऊँ केई के, ‘थाँ माकाँ ऊपरे पड़ जावो’ अन मंगरियाँऊँ केई के, ‘माने ढाकी दो।’

31काँके जद्याँ मनक हरा रूँकड़ा का हाते अस्यो करे हे, तो वीं हूका रूँकड़ा का हाते कई-कई ने करी?”

32अन वाँका हाते दो मनकाँ ने भी, ज्यो गुनेगार हा, वाँने भी मोत की सजा देबा का वाते ले जारिया हा।

33जद्याँ वीं वणी जगाँ आया, जिंको नाम “खोपड़ी” हो। तो वणा गुनेगार मनकाँ ने भी ईसू का एक जीमणा पाल्डे अन दूजाँ ने डावा पाल्डे हूळी पे चड़ा दिदा।

34जद्याँ ईसू बोल्या, “ओ बापू, अणाने माप कर दो, काँके ईं लोग ने जाणे हे के, ईं कई कररिया हे।” पसे सपायाँ कागद की गोट्याँ नाकन वाँका गाबा बाँट लिदा।

35लोग-बाग देकरिया हा अन यहूदी नेता वींकी रोळ करन केरिया हा के, “थें दूजाँ ने तो बंचाया हे, अबे यद्याँ थूँ परमेसर को हाँचो चुण्यो तको मसी वेवे तो खुद ने भी बचई ले।”

36सपई भी वाँका नके आन खाटा अंगूरा का रस में डुबायो तको फूंबो पिबा का वाते दिदो अन रोळ करन क्यो,

37“यद्याँ थूँ यहूदी लोगाँ को राजा हे, तो खुद ने बंचा ले।”

38वींका माता ऊपरे एक कागद लिकन लटका दिदो के, “यो यहूदियाँ को राजा हे।”

39वटे लटकाया तका दो गुनेगाराँ मेंऊँ एक मनक भी ईसू की रोळ करते तके क्यो, “कई थूँ मसी कोयने हे? थूँ खुद ने अन माँने भी बंचा ले।”

40पण, दूजे वीं पेल्यावाळा ने तापड़न क्यो, “कई थूँ परमेसरऊँ ने दरपे हे? थने भी तो याईस सजा मलीरी हे।

41अन आपाँ तो न्यावऊँ सजा पई, काँके आपाँ तो आपणाँ काम को फळ पारिया हा, पण अणी तो कई बुरो ने किदो हे।”

42पसे वणी क्यो, “ओ ईसू, जद्याँ थाँ आपणाँ राज में आवो, तो मने आद राकज्यो।”

43ईसू वींने क्यो, “मूँ थाँराऊँ हाचेई में केवूँ हूँ के, आजइस थूँ मारी लारे हरग में वेई।”

44वीं दाण दन की बारा बजी री ही, तद्याँ बारा बज्याऊँ तीन बज्या तईं आकी धरती अंदारो रियो,

45काँके सुरज भी ने चमकरियो हो अन मन्दर को परदो फाटन दो टुकड़ा वेग्यो।

46पसे ईसू ज्योरऊँ हाको करन क्यो, “ओ बापू, मूँ मारी आत्माने थाँका हाताँ में हूँपूँ हूँ।” यो केन ईसू आपणाँ जीव छोड़ दिदो।

47वटे ज्यो कई व्यो हो वींने देकन सपायाँ को हाकम ओ केन परमेसर की बड़ई किदी के, “हाँची में ओ मनक धरमी हो।”

48वटे देकबा आया मनक ज्यो कई व्यो हो वींने देकन छाती-मातो कूटन आपणाँ-आपणाँ घरे पराग्या।

49पण ईसू की जाण-पेचाणवाळा अन जीं लुगायाँ गलीलऊँ वींकी लारे अई ही, वीं हाराई छेटी ऊबी रेन ओ हारोई देकरी ही।

50वटे युसुप नाम को एक मनक हो। ज्यो यहूदियाँ का मोटी सबा में मंतरी हो, वो एक घणो धरमी मनक हो। वो वाँकी ईसू ने मारबा की राय में अन वाँका अणी कामाँऊँ राजी कोयने हो अन वो यहूदियाँ का देस में अरमतिया नाम की जगाँ को रेबावाळो हो अन परमेसर की राज बाट नाळवावाळो हो।

52वो युसुप पिलातुस का नके ग्यो अन वणीऊँ परातना किदी के, “ईसू की लास मने दिदे।”

53वो लास ने हूळीऊँ उतारन एक हव धोळा चादरा में पळेटी अन मंगरा में छाट पे खोदी तकी एक कबर में मेल दिदी। वीं कबर में पेल्याँ किंने भी ने गाड़्यो ग्यो हो।

54वो दन हकरवार हो अन सबत को दन सरू वेबा में हो।

55गलील परदेसऊँ अई तकी लुगायाँ भी वींका हाते वटे अई। वणा भी ईं कबर ने देकी अन ओ देक्यो के, लास ने वटे कस्यान मेली ही।

56अन वणा पाच्छी आन ईसू की लास पे लगाबा का वाते हव बानावाली चिजाँ अन अंतर त्यार किदो। नेमा का रिती जस्यान वणा आराम का दन आराम किदो।

← Chapter 22 Jump to: Chapter 24 →