Matthew 26

mewari

1जद्याँ ईसू ईं बाताँ के चुक्यो, तो आपणाँ चेलाऊँ केबा लागा,

2“थें जाणो हो के, दो दन केड़े बना हाज्या की रोट्याँ को तेवार हे अन मनक का पूत ने हूळी पे चड़ाबा का वाते धोकाऊँ पकड़वायो जाई।”

3तद्याँ मुक्य याजकाँ अन भूण्डा यहूदी नेता केफा नाम का मोटा याजक की गवाड़ी में भेळा व्या।

4अन आपस में बच्यार करबा लागा के, ईसू ने कस्यान जाळ में फसान मार नाका।

5पण वीं केता हाँ, “आपाँने यो तेवार का टेम में ने करणो छावे, कटे अस्यान ने वेजा के, मनकाँ में लड़ई वे जावे।”

6जद्याँ ईसू बेतनियाँ नगर में समोन का घर में हा, जिंको कोड़ हव वेग्यो हो।

7तो एक लुगई धोळा भाटा का बणया ठामड़ा में मेंगा मोल को अंतर लेन वाँका नके अई, अन जद्याँ ईसू जीमबा ने बेट्या हा, तो वाँका माता पे उन्दा दिदो।

8ओ देकन वींका चेला रिस्याँ बळन केबा लागा, “अणी यो अंतर कई लेबा ने बगाड़ दिदो?

9ईंने तो हेला रिप्या में बेचन, वीं रिप्या गरब भिकारिया में बाट्या जा सकता हा।”

10ओ जाणन ईसू वाँने क्यो, “लुगई ने काँ परेसान करो हो? वणी तो मारा वाते हव किदो हे।

11गरीब-भिकारी तो थाँका नके हमेस्यान रेवे हे, पण मूँ थाँका हाते ने रेऊँ।

12वणी मारा सरीर पे ज्यो अंतर उंदायो हे, वो मारा गाड़्या जाबा का वाते किदो हे।

13मूँ थाँकाऊँ हाचेई केवूँ हूँ के, हारई जगाँ में जटे-कटे भी ओ हव-हमच्यार परच्यार किदो जाई, वटे ईंका ईं काम को भी बखाण वाँकी आद में किदो जाई।”

14तद्याँ यहूदो इसकरियोती नाम को बारा चेला मूँ एक चेला मुक्य याजकाँ का नके जान क्यो,

15“यद्याँ मूँ ईसू ने थाँका हाताँ में पकड़वा दूँ, तो मने कई देवो?” वणा वींने तीस चान्दी का सिक्का दे दिदा।

16अन वो वीं टेमऊँ वींने पकड़ाबा को सई मोको होदबा लागो।

17बना हाज्या की रोट्याँ को तेवार के पेला दन, चेला ईसू का नके आन पूँछबा लागा, “थूँ कई छावे के, माँ थाँरा वाँते फसे का खाणा की त्यारी कटे करा?”

18ईसू क्यो, “नगर में फलाणा आदमी का नके जान वणीऊँ केवो के, गरू केवे हे के, ‘मारो टेम नके हे, मूँ आपणाँ चेला का हाते थाँरा अटे फसे को तेवार मनाऊँ।’”

19ईं वाते चेला ईसू की आग्या मानी अन फसे का तेवार की त्यारी किदी।

20जद्याँ हाँज वीं, तो ईसू बाराई चेला का हाते खाणो खाबा ने बेटो।

21जद्याँ वीं खारिया हाँ, तो ईसू क्यो, “मूँ थाँने हाँची-हाँची केवूँ हूँ के, थाँकामूँ कुई एक मने धोकाऊँ पकड़ा देई।”

22ईंपे चेला नरई दकी व्या अन वीं वाँकाऊँ हाराई पूँछबा लागा, “हो परबू, कई वो मूँ हूँ?”

23तद्याँ ईसू वाँने क्यो, “जिंको हात मारी थाळी में हे, वो मने धोकाऊँ पकड़वाई।

24मनक का पूत ने तो मरणोइस हे, जस्यान वाँका वाते लिक्यो हे, पण ज्यो मनक का पूत ने पकड़ाई, वींका वाँते घणी दुक बात वेई। वीं मनक के वाते आ बात घणी हव वेती, जदी वो जनमई ने लेतो।”

25जद्याँ वींने पकड़ाबावाळे यहुदे इसकरियोती क्यो के, “हो गरू, कई वो मूँ हूँ?” ईसू वींने क्यो, “हाँ, अस्यानीस हे ज्यो थें क्यो हे।”

26जदी वे जीमणो जिमरिया हा, ईसू रोटी हात में लिदी अन धन्नेवाद की परातना किदी। रोटी ने तोड़ी अन वाँ चेला ने देता तका क्यो, “लो, ओ मारो डील हे।”

27पछे ईसू प्यालो लेन धन्नेवाद किदो, अन हाराई ने देन क्यो, “थें हाराई ईंमूँ पिवो।

28काँके यो मारो वो लुई हे, ज्यो एक नुवो वादो हे, ज्यो नरई के पाप की मापी का वाते वेवाड़्यो जावे हे।

29थाँने हाँची केऊँ के, अबे मूँ वीं दन तक अंगूरा को रस ने छाकूँ, जद्याँ तईं थाँका हाते आपणाँ बाप का राज में नुवो ने पीऊँ।”

30पछे वीं भजन गान जेतुन का मंगरा पे पराग्या।

31तद्याँ ईसू वाँकाऊँ क्यो, “थाँ हाराई आज की रात में मने छोड़न भाग जावो। काँके सास्तर में लिक्यो हे के, “‘मूँ गवाळ ने मारुँ अन रेवड़ का गारा वखर जई।’”

32पण मूँ आपणाँ जी उठबा का केड़े थाँकाऊँ पेल्याँ गलील परो जाऊँ।

33ईंपे पतरस ईसुऊँ क्यो, “यद्याँ हाराई थने छोड़न जावे, तो पलई जावे, पण मूँ कदी भी थने छोड़न ने जाऊँ।”

34ईसू वींने क्यो, “मूँ थाँराऊँ हाँची केवूँ के, आज राते कूकड़ा के बोलबाऊँ पेल्या, थूँ तीन दाण मने ओळकबाऊँ नट जाई।”

35पतरस वाँने क्यो, “यद्याँ मने थाँरा हाते मरणो भी पड़े, तो भी मूँ थाँका वाते कदी ने नटूँ।” अस्यानीस दूजाँ हाराई चेला भी क्यो।

36तद्याँ ईसू एक असी जगाँ पे आया, जिंने गतसमने को बाग केता हा। वटे ईसू आपणाँ चेलाऊँ क्यो, “अटेईस बेटा रिज्यो, जद्याँ तईं मूँ वटे जान परातना करूँ।”

37वो पतरस अन जबदी का दुई छोरा ने हाते लेग्यो। ईसू दकी अन कायल वेबा लागो।

38तद्याँ ईसू वाँने क्यो, “मारो जीव घणो दकी हे, अटा तईं के, मारो जीव निकळबा में हे। थाँ अटेईस ठमो अन मारा हाते जागता रेवो।”

39पछे थोड़ाक आगे जान वे धरती पे उन्दो पड़न परातना किदी, “ओ मारा बाप, यद्याँ वे सके तो या दुक को प्यालो माराऊँ छेटी वे जावे, तो भी मूँ छावूँ जस्यान ने, पण जस्यान थूँ छावे वस्यानीस वेवे।”

40पछे वो वाँका चेला का नके आन वाँने हुता देक्या अन पतरसऊँ क्यो, “कई थाँ मारा हाते एक घड़ी भी ने जाग सक्या?

41जागता रेवो, अन परातना करता रेवो के, ताँके थें जाँच-परक में ने पड़ो। आत्मा तो त्यार हे, पण सरीर दुबळो हे।”

42पछे वाँकाणी दूजी दाण जान आ परातना किदी, “हो मारा बाप, यद्याँ ओ दुक को प्यालो मारे पिया बगर ने छेटी वे, तो थाँका मरजी पुरी वेवे।”

43तद्याँ ईसू पाच्छा आन वाँने पाच्छा हूँता तका देक्या, काँके वीं गेरी नींद में हाँ।

44ईसू वाँने छोड़न वो पाछो परोग्यो, अन वणीस तरिया पाच्छी तीजी दाण परातना किदी।

45तद्याँ ईसू चेला का नके आन वाँकाऊँ क्यो, “कई थाँ आलतरे भी हुता हो? अन रईम्बो लेरिया हो? देको, टेम आग्यो हे, मनक को पूत पाप्याँ का हाताँ में पकड़वायो जावे हे।

46ऊबा वे जावो, आवो चाला। देको, मने धोकाऊँ पकड़बावाळा आरिया हे।”

47ईसू अस्यान बोलरियो हो के, वींका बारई चेला मूँ एक यहूदो वटे आयो। वींका लारे लाट्याँ-तलवाराँ लिदी तकी एक मोटी टोळी ही। जिंने मुक्य याजकाँ, मूसा का नेमा ने हिकाबावाळा अन दाना यहूदी नेता खन्दई ही

48ईसू ने धोकाऊँ पकड़ाबावाळा भीड़ ने इसारो किदो हो, “जिंके मूँ बोको देऊँ वोईस ईसू हे, वींने पकड़ लिज्यो।”

49अन पछे वो ईसू का नके आन क्यो, “हो गरुजी, नमस्कार।” अन वाँके बोको दिदो।

50ईसू वींने क्यो, “हे दोस्त, जीं काम का वाँते थूँ आयो हे, वींने करले।” पछे भीड़ का मनकाँ नके आन ईसू ने बंदी बणा लिदा।

51पछे ईसू का हण्डाळ्याँ मूँ एक जणे तरवार म्यानऊँ काड़ दिदी अन मायाजक का नोकर पे वार करन वींको कान्दड़ो काट दिदो।

52तद्याँ ईसू वींने क्यो, “आपणी तरवार म्यान में राक, काँके ज्यो तरवार चलावे हे, वीं हाराई तरवार ऊइस मारिया जाई।

53कई थाँ ने जाणे के, मूँ आपणाँ बापूऊँ अरज कर सकूँ हूँ, अन वो हरग दुताँ की बाराई फोजाऊँ हेला मारा नके अबाणू भेळा कर देई?

54यद्याँ मूँ अस्यान करूँ, तो पवितर सास्तर में लिकी तकी बाताँ कस्यान पुरी वेई? वींमें जीं बाताँ लिकी तकी हे वीं पुरी वेणी जरूरी हे।”

55वीं टेम ईसू भीड़ऊँ क्यो, “कई थाँ तरवाराँ अन लठ लेन मने चोर का जस्यान पकड़बा का वाते आया हो? मूँ हरेक दन रोज मन्दर में बेटन उपदेस दिया करतो हो, तद्याँ तो थाँ मने ने पकड़्यो।

56पण ओ हारोई ईं वाते व्यो के, परमेसर का आड़ीऊँ बोलबावाळा की बाताँ पुरी वेवे।” तद्याँ हाराई चेला वींने छोड़न भागग्या।

57तद्याँ ईसू ने पकड़बावाळा वींने केफा नाम का मायाजक का नके लेग्या, जटे नेमा ने हिकाबावाळा अन दाना नेता भेळा व्या तका हा।

58पतरस छेटी-छेटी वाँका पाछे-पाछे मायाजक की गवाड़ी तईं ग्यो, अन मयने जान नतीजो देकबा का वाते पेरादारा का हाते बेटग्यो।

59मुक्य याजकाँ अन हारी पंचात ईसू ने मार नाकबा का वाते वाँका विरोद में जूटी गवई का ताक में हाँ।

60पण नरई जूटी गवई देबावाळा आबा पे भी वाँको काम ने बण्यो। आकरी में दो जणा आगे आया,

61अन क्यो, “अणी मनक क्यो हे के, ‘मूँ परमेसर का मन्दर ने हण्ड़ा सकूँ हूँ अन वींने तीन दन में पाछो बणा सकूँ हूँ।’”

62तद्याँ मायाजक ऊबा वेन ईसुऊँ क्यो, “ईं मनक, थाँरा विरोद में ईं गवायाँ देरिया हे, थूँ खुद ने बंचाबा का वाते काँ ने बोलरियो हे?”

63पण ईसू छानारिया। तद्याँ मायाजक वाँकाऊँ क्यो, “मूँ थने जीवता परमेसर की होगन दूँ हूँ के, यद्याँ थूँ परमेसर को पूत मसी हे, तो माँकाऊँ के दे।”

64ईसू वाँने क्यो, “थें खुदई के दिदो, पण मूँ थाँकाऊँ ओ भी केवूँ हूँ के, अबेऊँ थाँ मनक का पूत ने मेमावान परमेसर का जीमणा पाल्ड़े बेट्यो तको अन आकास का वादळा पे आतो तको देको।”

65ईं बात पे मायाजक आपणाँ गाबा फाड़न अन क्यो, “अणी परमेसर की नन्दयाँ किदी हे, अबे मारे गुवा की कई जरूत ने हे? देको, थाँ अबाणू ईंने परमेसर की नन्दया हामळी हे।

66अन अबे थाँ कई होचो हो?” वणा जवाब दिदो, “यो गुनेगार हे, ईंने मार देणो छावे।”

67तद्याँ वाँकाणी ईसू का मुण्डा पे थूँक्यो अन वींके लाता-गुमा मेल्या, अन कणी दूजाँ वींके रेपटाँ मेलन क्यो,

68“हो मसी, माँने आगेवाणी करन बता के, थाँरे कणी ठोकी?”

69पतरस बारणे आगंणा में बेट्यो तको हो, तो एक नोकराणी वींका नके आन क्यो, “थूँ भी वीं गलील का ईसू का हाते हो।”

70पण परतस हाराई का हामे ओ केता तको नकार दिदो के, “मने पतो कोयने, थूँ कई केरी हे।”

71जद्याँ वो बारणे डेळी में ग्यो, तो दूजी नोकराणी वींने देकन ज्यो वटे हाँ वाँकाऊँ क्यो, “ओ भी तो नासरत का ईसू का हाते हो।”

72एक दाण पाछो पतरस होगन खान नकारन क्यो, “मूँ वी मनक ने ने ओळकूँ हूँ।”

73थोड़ीक देर केड़े ज्यो वटे ऊबा हाँ, वणा पतरस का नके आन वणीऊँ क्यो, “हाँचई थूँ वाँका मूँ एक हे, काँके थारी बोली थारो भेद बतारी हे।”

74तद्याँ वो मातो कुटबा लागो अन होगन खाबा लागो के, “मूँ वीं मनक ने ने ओळकूँ हूँ।” अन तरत कूकड़ो बोल्यो।

75तद्याँ पतरस ने ईसू की बतई तकी बात आद अई के, “कूकड़ा का बोलबाऊँ पेल्याँ थूँ तीन दाण मने ओळकबाऊँ नकार देई।” अन वो बारणे जान छाती कूट-कूटन रोबा लागो।

← Chapter 25 Jump to: Chapter 27 →