Matthew 5

mewari

← Chapter 4 Jump to: Chapter 6 →

1जद्याँ ईसू मनकाँ की मोटी टोळी देकी, तो वो मंगरा पे पराग्यो अन वटे जान बेटग्यो अन वींका चेला वींका नके आग्या।

2तद्याँ ईसू वाँने उपदेस देता तका क्यो,

3“धन्ने हे वीं ज्यो हरदाऊँ गरीब हे, काँके हरग को राज वाँकोइस हे।

4धन्ने हे वीं ज्यो रोवे हे, काँके परमेसर वाँने सान्ती देई।

5धन्ने हे वीं ज्यो नरमाई राके हे, काँके वीं ईं धरती का अदिकारी वेई।

6धन्ने हे वी ज्यो धरम का काम करबा में आगता रेवे हे, परमेसर वाँकी मरजी पुरी करी।

7धन्ने हे वीं, ज्यो दयाळू हे, काँके वाँपे दया किदी जाई।

8धन्ने हे वीं, जणा का मन पुवितर हे, काँके वीं परमेसर का दरसण करी।

9धन्ने हे वीं, जीं मेल-मिलाप को काम करे हे, काँके वीं परमेसर का छोरा-छोरी केवाई।

10धन्ने हे वीं, ज्यो धरम का वाते दुक भोगे हे, काँके हरग को राज वाँको हे।”

11धन्ने हो थाँ, काँके मनक मारा नामऊँ थाँकी नन्दयाँ करे, अन हतावे अन जूटी बाताँ करन थाँका विरोद में हारी तरियाँ की खोटी बाताँ करे हे।

12तद्याँ थाँ राजी वेज्यो अन आणन्द मनाज्यो, काँके हरग में थाँने ईंको फळ मली। यो वस्यानीस हे जस्यान थाँकाऊँ पेल्याँ परमेसर का आड़ीऊँ बोलबावाळा लोगाँ ने हताया हा।

13“थाँ धरती का हाराई मनकाँ का वाते लूण हो, पण यद्याँ लूण को हवाद बगड़ जावे तो वो पाछो खारो ने बणायो जा सके हे। अन नेई वो कई कामे आवे हे पण वींने फेंक दिदो जावे, जणीऊँ वो मनकाँ का पगाँऊँ गुद्‍यो जावे।”

14“थाँ धरती का वाते उजितो हो अन ज्यो नगर मंगरा पे हे, वो हपी ने सके हे।

15मनक दिवो लगान कणी ठामड़ा का रेटे ने मेले हे, पण वींने आल्याँ में मेले, ताँके घर का हाराई मनकाँने उजितो मल सके।

16अणी तरियाँ थाँको उजितो मनकाँ का हामे अस्यान चमके के, वीं थाँका हव कामाँ ने देके अन थाँका परमपिता की, ज्यो हरग में बिराजे हे, वींकी मेमा करे।”

17“यो मती होचो के, मूँ मूसा का नेम कन परमेसर का आड़ीऊँ बोलबावाळा की बाताँ ने खतम करबा ने आयो हूँ, पण वाँने पुरी करबा ने आयो हूँ।

18मूँ थाँकाऊँ हाँची केवूँ हूँ के, आकास अन धरती टळ सके हे, पण मूसा का नेमा में लिक्या तका हरेक अकर अन सबद तद्याँ तईं बण्या तका रेई जद्याँ वीं पूरा ने वे जावे।”

19“ईं वाते ज्यो कुई अणा फोरीऊँ फोरी आग्या मेंऊँ कणी एक ने भी तोड़े अन वस्यानई मनकाँ ने हिकावे तो वींको हरग का राज में मान ने वेई, पण ज्यो कुई अणा आग्या को पालण करी अन वाँने हिकाई तो वो हरग का राज में मान पाई।

20काँके मूँ थाँकाऊँ केवूँ हूँ के, यद्याँ थाँकी धारमिकता मूसा का नेमा ने हिकाबावाळा अन फरीसियाँ की भगतीऊँ मोटी ने वेई, तो थाँ हरग का राज में कदी ने जा सको।”

21“थाँ जाणो हो के, आपणाँ बड़ाबा ने क्यो ग्यो हो के, ‘हत्या मती करो अन यद्याँ कुई हत्या करे हे तो वींने कोरट में दोसी ठेरायो जाई।’

22पण मूँ थाँकाऊँ यो केऊँ हूँ के, ज्यो कुई आपणाँ भई पे रीस करी, वो सबा में दण्ड के जोगो मान्यो जाई। ज्यो कुई आपणाँ भई ने बेजत करी वींने मोटी सबा में दण्ड के जोगो मान्यो जाई। ज्यो कुई आपणाँ भई ने हराप देवे हे, वो नरक की वादी के जोगो वेई।

23“ईं वाते जद्याँ वेदी पे परमेसर का वाते चडावो चड़ाती दाण थाँने ओ आद राकणो छावे के, थाँरा भई का मन में थाँरा वाते विरोद हे,

24तो आपणाँ चड़ावा ने वटेईस वेदी हामें छोड़ दो, अन जान पेल्या आपणाँ भईऊँ हमजोतो कर अन पछे आपणाँ चड़ावा ने पूरो कर।

25“यद्याँ थूँ आपणाँ विरोदी का हाते कोरट में जाती दाण गेला में वे तो जट-पट वणीऊँ हमजोतो करले कटे अस्यान ने वे के, थाँरो विरोदी थने हाकम का हाताँ में हूँपे, अन हाकम थने सपाई का हाताँ में हूँपे अन थूँ जेळ में नाक्यो जावे।

26मूँ थाँकाणी हाचेई कूँ हूँ के, जद्याँ तईं थूँ कोड़ी-कोड़ी ने भर देई तद्याँ तईं वटेऊँ ने छुट सकी।

27“थाँ जाणो हो अन क्यो ग्यो हो के, ‘कुकरम ने करणो।’

28पण मूँ थाँकाऊँ केवूँ हूँ के, ज्यो कुई कणी परई लुगई ने बुरी नजरऊँ देके हे, वो वींका मन में वींऊँ कुकरम कर चुक्यो हे।

29यद्याँ थाँकी जीमणी आँक थाँने पाप में नाके, तो वींने काड़न फेंक दे, काँके थाँका वाते यो हव हे के, थाँका अंग मूँ एक नास वे जावे अन थाँको पूरो सरीर नरक में ने नाक्यो जई।

30यद्याँ थारो जीमणो हात थाँने पाप में नाके, तो वींने काटन फेंक दो, काँके थाँका वाते यो हव हे के, थाँका अंगा मूँ एक नास वे जावे, अन थाँको आको सरीर नरक में ने नाक्यो जावे।

31“थाँने यो भी बतायो ग्यो हो के, ‘ज्यो कुई आपणी लुगई ने छोड़णो छावे, तो वींने तलाक पतर लिकन देणो छावे।’

32पण मूँ थाँकाऊँ यो केवूँ हूँ के, ज्यो कुई आपणी लुगई ने कुकरम के अलावा कणी ओरी बातऊँ तलाक देवे हे अन वा लुगई कणी दूजाँ का हाते रेवे तो वींके कुकरमी वेबा को जिमेदार वींको पेलो धणी हे। ज्यो कुई वीं तलाक दिदी तकीऊँ ब्याव करे, तो वो भी कुकरम करे हे।

33“थाँ ओ भी जाणो हो के, आपणाँ बड़ाबाऊँ क्यो ग्यो हो के, ‘जूटा होगन मती खाज्यो, पण परबू का वाते आपणाँ होगन ने पूरा करज्यो।’

34पण मूँ थाँकाऊँ यो केवूँ हूँ के, कदी होगनई मती खावो, ने हरग की, काँके वटे परमेसर की गाद्दी हे।

35अन ने धरती की, काँके वाँ वाँका पगाँ की चोकी हे, अन ने यरूसलेम की, काँके वो मोटा राजा को नगर हे।

36आपणाँ माता का भी होगन मती खाज्ये, काँके थूँ थाँरा बाला मेंऊँ एक भी बाळ ने धोळो अन नेई काळो कर सके हे।

37पण थाँकी बात हाँ की ‘हाँ’ अन ने की ‘ने’ वेवे। काँके ज्यो कुई अणीऊँ हेलो बोले हे तो वो सेतान का आड़ीऊँ हे।

38“थाँ हुण चुक्या हो, थाँने क्यो ग्यो हो के, ‘आँक का बदले आँक, अन दात का बदले दाँत।’

39पण मूँ थाँकाऊँ यो केवूँ हूँ के, कणी बुरई करबावाळा का हाते बुरई मती करो, पण ज्यो कुई थाँका जीमणो गाल्डा पे रेपट मारे, तो वाँकी आड़ी दूज्यो गालड़ो भी कर देज्यो।

40यद्याँ कुई थाँका पे मुकदमो करन थाँको कुरतो भी लेणो छावे, तो थाँ वींने आपणो चादरो भी दे दिज्यो।

41ज्यो कुई थाँने जबरदस्ती आपणो सामान तोकान एक कोस चलावे तो थाँ वाँका हाते दो कोस परा जाज्यो।

42यद्याँ कुई थाँकाऊँ कई मांगे तो वींने वो दे देज्यो। ज्यो थाँकाऊँ उदार लेणो छावे, वाँने नटज्यो मती।

43“थाँने हुणायो ग्यो हो, यो क्यो ग्यो हो के, ‘आपणाँ पड़ोसीऊँ परेम राकणो, अन आपणाँ दसमणाऊँ दसमणी राकणी।’

44पण मूँ थाँकाऊँ यो केवूँ हूँ के, आपणाँ दसमणाऊँ परेम राकज्यो अन आपणाँ हताबावाळा का वाते भी परातना करज्यो।

45जणीऊँ थाँ आपणाँ हरग का परम बापू की ओलाद केवावो, काँके वीं भला अन बुरा दुयाँ पे आपणो सुरज उगावे हे, अन धरमी अन पापी दुयाँ पे बरका वरावे हे।

46काँके यद्याँ थाँ आपणाँऊँ परेम करबावाळाऊँ परेम राको हो, तो थाँका वाते कई भलो वेई? कई कर लेबावाळो भी अस्यान ने करे हे?

47यद्याँ थाँ आपणाँ भई-बन्दाऊँइस नमस्कार करो, तो कस्यो नवई को काम करो हो? कई ज्यो यहूदी ने हे वीं अस्यान ने करे हे?

48ईं वाते थाँ पाका बणो, जस्यान थाँका हरग का परम बापू हे।”

← Chapter 4 Jump to: Chapter 6 →