Philippians 1

mewari

Jump to: Chapter 2 →

1ईसू मसी का दास पोलुस अन तिमुतियुस, फिलिपी नगर का हाराई मसी का गट-जोड़ में रेबावाळा परमेसर का पुवितर मनकाँ, मण्डली की देकरेक कराबावाळा अन काम में मदत करबावाळा ने ओ कागद लिकरिया हा।

2आपणाँ बापू परमेसर अन परबू ईसू मसी, थाँ लोगाँ पे करपा करी अन सान्ती देई।

3मूँ जद्याँ भी थाँने आद करूँ हूँ थाँका वाते आपणाँ परमेसर को धन्नेवाद करूँ हूँ

4अन जद्याँ भी थाँ हाराई का वाते परातना करूँ हूँ, राजी वेन परातना करूँ हूँ,

5काँके जद्याँऊँ हव हमच्यार हुण्यो हो वीं पेला दनऊँ लेन आज दन तईं हव हमच्यार फेलाबा में मारी मदत किदी हे।

6अन मने ईं बात को विस्वास हे के, जीं परमेसर थाँकामें हव काम सरू किदो हे, वींइस वींने ईसू मसी का पाच्छा आबा का दन तईं पूरो करी।

7थाँ हाराई का वाते मने अस्याईस बच्यार राकणा हव हे, काँके थाँ हाराई मारा मन में बस्या तका हो। अन जद्याँ मूँ हाकळाऊँ बन्दयो तको हूँ अन हव हमच्यार ने साबत करबा अन पाको बणाबा में भी लागरियो हूँ, थाँ मारा हाते परमेसर की दिदी तकी अणीस करपा में भागी हो।

8ईंमें परमेसर मारा गुवा हे के, मूँ ईसू मसी का लगावऊँ थाँ हाराई का वाते वाट नाळरियो हूँ।

9अन मूँ आ अरज करूँ हूँ के, थाँ परेम, हाँचा ग्यान अन हाराई तरियाँ की हमज का हाते ओरुँ भी वदता जावो,

10अटा तईं के, थाँ हवऊँ हव बाताँ ने परक सको ताँके मसी के पाच्छा आबा के दन तईं ऊजळा अन बना दोस का बण्या रेवो।

11परमेसर की बड़ई अन मेमा के वाते थाँको जीवन ज्यो परमेसर छावे वो करबावाळा हव गुणऊँ भर जावे ज्याँने ईसू मसी देवे हे।

12अबे हो भायाँ अन बेना, मूँ छावूँ हूँ के, थाँ ओ जाण लो के, मारा पे ज्यो बीती हे, वींऊँ हकीकत में हव हमच्यार की बड़ोतरी वीं हे।

13अणीऊँ रोम माराजा के मेल का हंगळा पेरादार अन हाराई लोग ओ तो हमजग्या हे के, मूँ मसी का वाते जेळ में हूँ।

14मारो जेळ में रेवा का मस परबू पे विस्वास राकबावाळा नरई भायाँ की हिम्मत बड़गी अन वाँको धिज्यो हव हमच्यार ने बना दरप्या हुणाबा का वाते नरोई बड़ग्यो हे।

15कतरा तो रिस्याँ बळन अन लड़ई का मस मसी को परच्यार करे हे अन कतराई भली मनसाऊँ करे हे।

16भली मनसाऊँ करबावाळा परेमऊँ परच्यार करे हे काँके ओ जाणन के, हव हमच्यार ने सबूत देन साबत करबा का वाते मने चुण्यो हे।

17अन कुई तो हव मनऊँ कोयने पण हवारतऊँ मसी का बारा में परच्यार करे हे ओ होचन के, मूँ जेळ में हूँ तो मने ओरी परेसान करे।

18कस्यान भी वे मसी का बारा में हरेक तरियाऊँ परच्यार वेरियो हे पलई गलत मकसदऊँ, पलई हव मकसदऊँ। ईं वाते मूँ राजी हूँ अन राजी रेऊँ।

19काँके मूँ होचूँ हूँ के, थाँकी अरजऊँ अन ईसू मसी की आत्मा की मदतऊँ मूँ बंचायो ग्यो हूँ।

20मूँ तो याईस मरजी अन आस राकूँ हूँ के, ज्यो काम मूँ कररियो हूँ वींमें मूँ कदीई हरमाऊँ कोयने, पण पुरी हिम्मत का हाते मसी की मेमा मारा डीलऊँ हरदाण वेती ही, खासतोरऊँ अबे भी वेती रेई, पलई मूँ जीवूँ कन मर जऊँ।

21काँके मारा वाते जीवतो रेणो मसी हे, अन मर जाणो नफो हे।

22यद्याँ मूँ जीवतो रेऊँ तो ओरी भला काम करूँ पण मूँ ने जाणूँ के, किंने चुणू।

23मूँ ईं दुया का बचमें लटक्यो तको हूँ। मारो जी तो छारियो हे के, ओ डील छोड़न मसी का नके जान रूँ, काँके ओ घणोइस हव हे,

24पण डील में रेणो थाँका वाते घणो जरूरी हे।

25अन अणी बात ने हव तरियाँ जाणूँ हूँ के, मूँ जीवतो रेऊँ, अन थाँ हाराई का हाते रेऊँ, ज्याऊँ थाँ विस्वास में वदता जावो अन वींमें राजी रेवो,

26ताँके जद्याँ मूँ थाँका नके आऊँ तद्याँ थाँने मारा मस ईसू मसी पे बड़ई करबा को ओरी मस वेई।

27थाँ थाँको जीवन मसी का हव हमच्यार के जोगो जियो, ताँके यद्याँ मूँ आन थाँने देकूँ कन ने देकूँ पण थाँका बारा में मूँ ओ हुण सकूँ के, थाँ एक मन अन एक मकसदऊँ अटल रेन हव हमच्यार का विस्वास का वाते कल्ड़ी मेनत कररिया हो।

28अन कस्यी भी बात में थाँ थाँका दसमणाऊँ दरपो मती। ओ ईं बात ने साबत करे के, थाँ तो बंच जावो अन वाँको नास वे जाई, ओ परमेसर का आड़ीऊँ हे।

29काँके थाँने बेस मसी पे विस्वास करबा कोईस ने पण वाँका वाते दुक जेलबा को भी मोको मल्यो हे।

30थाँ भी असीस लड़ई में हो जिंमें थाँ मने देक्यो हो अन अबाणू भी थाँ हुणरिया हो के, मूँ वींमेंईस हूँ।

Jump to: Chapter 2 →