Philippians 3

mewari

← Chapter 2 Jump to: Chapter 4 →

1अबे मारा भायाँ, परबू में गट-जोड़ऊँ थाँ खुस रेवो। वणाईस बाताँ ने आकोदाण लिकबा में मने तो कई परेसानी ने हे, काँके ईं थाँकी रुकाळी करी।

2वणा गण्डकड़ाऊँ हेंचेत रेवो, ज्यो हव हमच्यार ने उलट पलट करन हिकावे हे। बुरा काम करबावाळा अन खतना पे जोर देबावाळाऊँ हेंचेत रेवो।

3हाँचा खतनावाळा तो आपींइस हा काँके परमेसर की आत्माऊँ वींकी भगती आपींइस करा हाँ अन आपीं आपणो भरोसो दिकबावाळा रिति-रिवाज पे ने पण ईसू मसी पे मेपणो राका हाँ।

4हाँ, मूँ भी अणा चिजाँ पे भरोसो राक सकूँ हूँ। यद्याँ कुई होचे के, माँ भी अणामें अतरो भरोसो राक सका हा तो मारा नके अणीऊँ भी हेलो राकबा का वाते नरी बाताँ हे।

5मूँ आट दन को व्यो अन मारो खतनो व्यो। मूँ इजराएल का बंस अन बिन्यामीन की गोत को हूँ। जनमजातऊँ इबरानी हूँ, जद्याँ मूसा का नेमा ने मानबा का बारा में केवो तो पको फरीसी हूँ।

6ज्योस का वाते यद्याँ केवो तो परबू का विस्वास्याँ ने हताबावाळो हो, अन जद्याँ मूसा का नेमा के जस्यान चालबा का वाते केवो तो खरो मनक हूँ।

7पण मूँ हमजूँ हूँ के, ज्यो ज्यो बाताँ मारा नफा की ही, वाँने अबे मूँ मसी का मस मारा वाते कई काम की ने हे।

8बेस अणा बाताँइस ने पण हारी बाताँ ने मारा परबू ईसू मसी ने जाणणो, ज्यो घणो मोटो हे, वींका हामे वल हमजूँ हूँ। वीं मसी का वाते में हारी चिजाँ ने छोड़ दिदी अन वाँने कचरो हमजूँ हूँ, ताँके मूँ मसी ने पाबा को नफो पा सकूँ

9अन मूँ वाँका हाते गट-जोड़ऊँ जी सकूँ। मूँ मूसा का नेमा को पालण करबाऊँ परमेसर का हामे सई ने हूँ, पण ईसू मसी पे विस्वास करबाऊँ परमेसर का हामे सई हूँ। अबे परमेसर केवे हे मूँ वाँका हामे सई हूँ, काँके मूँ विस्वास करूँ हूँ।

10मूँ मसी ने जाणणो अन वाँकी मरन जी उठबा की सगती ने मेसूस करणो छारियो हूँ अन वाँका दुक में भागी वेन वाँकी मोत में वाँके जस्यान वेणो छारियो हूँ।

11ताँके मूँ खुद मरिया केड़े पाछो जी उठ सकूँ।

12ओ ने के, मूँ ईंने पा चुक्यो हूँ कन पाको वे चुक्यो हूँ, पण मूँ वीं ईनाम ने जीतबा का वाते कल्ड़ी मेनत कररियो हूँ, जीं मस ईसू मसी मने खुद का वाते जीत ग्या हा।

13ओ भायाँ, मारी आ मनसा कोयने के मूँ जीत चुक्यो हूँ, पण बेस ओ एक काम करूँ हूँ के, ज्यो बाताँ पाच्छे रेगी हे वाँने भूलन, आगे का चिजाँ ने पाबा का वाते कल्ड़ी मेनत कररियो हूँ।

14मूँ मकसद का आड़ी दोड़्यो जाऊँ हूँ, ताँके वो ईनाम पाऊँ ज्याँका वाते परमेसर मने ईसू मसी का गट-जोड़ में ऊपरे जीवन का वाते बलायो हे।

15ईं वाते आपाँ मूँ हाराई मोतबीराँ ने अस्याईस बच्यार राकणा छावे। यद्याँ कणी बात में किंको दूज्यो बच्यार वे तो परमेसर वाँने भी हमजा देई।

16पण परमेसर आपाँने ज्यो भी बतायो हे, वींके जस्यानीस आपाँ हाराई ने जीवणो छावे।

17हो भायाँ, थाँ हारई मारा जस्यान चाल चालो। अन वाँपे ध्यान दो ज्यो अस्यी चाल पे चाले जस्यान की चाल थाँ माकाँ में देकी ही।

18मूँ ईं बात ने पेल्याईं क्यो हो अन अबाणू भी रो-रोन केरियो हूँ के, नरई मनक आपणी रेणी-सेणीऊँ मसी की हूळी की मोत का दसमण हे।

19वाँको अन्त नास हे, काँके वाँको पेटईस वाँको परमेसर हे। जणा बाताँ पे वीं मेपणो करे हे वणा बाताँ पे वाँने हरम करणी छावे अन दनियाँ की चिजाँ पे मन लगान राके हे।

20पण आपणो देस तो हरग हे अन आपीं आपणाँ बंचाबावाळा परबू ईसू मसी की वटूऊँ आबा की वाट नाळरिया हा।

21वो आपणी वीं ताकतऊँ हारई चिजाँ ने आपणाँ वंस में राके हे, वणीस ताकतऊँ आपणाँ कमजोर डील ने बदलन वाँकी मेमा का डील का जस्यान बणा देई।

← Chapter 2 Jump to: Chapter 4 →