2 Timothy 3

Marwari Bible

← Chapter 2 Jump to: Chapter 4 →

1पण ओ याद राख की आखरी दिनां मांय कठिन वगत आवैला।

2क्यूंकै मिनख मतलबी, लोभी, डींगमार, अभिमांनी, निंदा करणैवाळौ, मां-बाप री आग्या टाळणैवाळा, दया नीं करणैवाळौ, अपवितर,

3परैम नीं राखणवाळौ, माफ नीं करणैवाळौ, दोसण लगाणैवाळौ, सहन नीं करणैवाळौ, कठोर, भलै रा बैरी,

4विसवासघाती, लोफर, घमंडी, अर परमेसर रा कोनीं बल्कि सुख-विलास रा ही चाहनेवाळा होवैला।

5वे भगती रौ रूप तो धारैला, पण उणरी सगति नै नीं मानैला। ऐड़ौ ऊं आगौ रैणौ।

6इण मांय ऊं कीं गळत सिखाणवाळा लोग है जिकौ घरो मांय दबे पगां घुस आवै है, अर उण कमजोर लुगाईयां नै वस मे कर लेवे है जिकौ पापों ऊं दबी अर हरैक परकार री भूंडी इछाओ रै वस में है।

7ऐ लुगाईयां हमेसां सीखती तो रैवै है पण सचाई री पिछांण तांई कदैई नीं पूगी।

8ज्यौ यनैस अर यम्ब्रेस नै मूसा रौ विरोध किनो हो, व्यौंही ऐ गळत सिखाणवाळा लोग भी सचाई रौ विरोध करै है। ऐ ऐड़ा मिनख है, जिणरी बुद्धि भीस्ट हो गी है अर वे विसवास रै बारै मांय निकमे है।

9पण वे इण ऊं आगै कोनीं बढ़ सकै, क्यूंकै ज्यूं यनैस अर यम्ब्रेस री नासमझ सगळै मिनखौ माथै परगट होय गी ही, व्यौंही इण गळत सिखाणवाळौ रौ भी हो जावैला।

10पण थै म्हारी सिकसा, चाल-चलण, मनसा, विसवास, सहन करणै री ताकत, परैम, अर धीरज नै देख्यौ है। अर सताए जांणै, अर दुख उठाणै में थै म्हारौ साथ दियौ।

11अर ऐड़ै दुखौ में भी जिकौ अन्ताकिया अर इकुनियुम अर लिस्तरा मे म्हारै माथै पड़िया हा, अर वळै दुखौ नै भी जिकौ म्हैं उठाया हा। पण परभु नै म्हनै उण सगळां ऊं छुड़ा लियौ।

12पण जिता यीसु मसीह में भगती रै साथै जीवन बिताणौ चावै है वे सगळा सताया जावैला।

13पण पापी अर ठग, धोखो देता होया अर धोखो खाता होया, बिगड़ता होया जावैला।

14पण थूं उण बातां माथै जिकौ थूं सीखी है अर विसवास कियो है, ओ जांणनै मजबुत बण्यौ रै की थै उणै कीण लोगां ऊं सीख्यौ है।

15अर बचपन ऊं पवितर सास्तर थारै जांण्योड़ो है, जिकौ थनै यीसु मसीह माथै विसवास करणै ऊं उद्धार प्राप्त करणै रै खातर बुद्धिमान बणा सकै है।

16पूरौ पवितर सास्तर परमेसर री सामरथ ऊं रचियोड़ो है अर उपदेस, अर समझानै, अर सुधारनै, अर धरम री सिकसा रै खातर फायदेमंद है,

17ताकी परमेसर रौ जन सिद्ध बणै, अर हरैक भलै कांम रै खातर तैयार रैवै।

← Chapter 2 Jump to: Chapter 4 →