2 Thessalonians 1

Mazanderani GMB (گیله ماز)

Jump to: Chapter 2 →

1پولُس و سیلاس و تیموتائوسِ طرفِ جی، تِسالونیکی یه شهرِ کِلیسایِ وَسین که اَمی پیَر، خُدا، و خداوند عیسی مسیحِ دِلِه دَرِن:

2فیض و صُلح و سلامتی، اَمیِ پیَر، خُدا، و خداوند عیسیِ مَسیح طرفِ جی شِمِرِه بیه.

3اِی اَداشان، اَما همش بایسّی خُدا رِه شِیمی خاطِری شُکر هَکُنیم، دَرخور هم هَمینه، چون شیمی ایمان هر چی بیشتر رشد کانه هر کُدام از شِیمی مُحبَت همدیگَر بیشتر بونه.

4اینِه وَسین، اَما خودِمان، خُدایِ کلیساهای دِلهِ، شیمی پایداری و ایمان خاطری که تمام اذیت و آزار و عذابایِ دِلِه طاقت بیاردین شِمِره افتخار کانیم.

5این خُدایِ عادِلانِه داوری یه نِشانِئه، تا شُما خُدایِ پادشاهی یه لایق هَبین که اونِ وَسین هم عذاب کَشِنین.

6چون راس راسی اینِ عادلانِه هیسِه که خُدا اوشانیکه شِمِره عذاب دَنِن رِه، عذابِ هَمرَه عوض هَدِه،

7و شِمِرِه که عذاب کَشِنین، و همینجور اَمَرِه هم راحتی دَنهِ، اون موقِه که خُداوند عیسی خودشه رَسدار فِرِشتِگانِ هَمرَه اَلو بَزِه تَشِ دِلهِ آسِمانِ جی ظاهر بونه.

8و اوشانیکه خُدا رِه نِشناسِنَن و اوشانیکه اَمیِ خُداوند عیسی یِه اِنجیلِ اِطاعت نَکردنِ جی تقاص گیرنِه.

9اوشانه سِزا اَبدی نابودی خُداوندِ حضورِ جی و اونه جلالِ قوّتِ جی هیسِه،

10همونجور که او، اون روز دِلِه که هَنه خودشه ایماندارانِ میَن جلال گیرنِه، و تمام اوشانیکه اونه ایمان بیاردِن، بُهت کانَن و شُما هم اوشانه همرَئین، چون اَمیِ شهادتِ ایمان بیاردِین.

11اینِه وَسین، اَما هَمَش دَریم شِمِرِه دُعا کانیم تا اَمیِ خُدا شِمِره خودشه اون دعوَتِ وَسین که دُخوانِسِّه هَبَین لایق بِدانه و خودشه قُوّتِ هَمرَه هر خُجیرِ نیّت و هر کاری که ایمان جی سرچشمه گیرنِه رِه، انجام هَدِه.

12تا اَمیی خُداوند عیسی یِه اِسم شِیمی دِلِه جلال هَگیره، و شُما هم طبقِ اَمیِ خُدا و خداوند عیسی مسیحِ فیض، اونه دِلِه جلال هَگیرین.

Jump to: Chapter 2 →