bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Mazanderani
/
Mazanderani GMB (گیله ماز)
/
Mark 11
Mark 11
Mazanderani GMB (گیله ماز)
← Chapter 10
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 12 →
1
وَختی بِیت فاجی و بِیت عَنْیایِ دِهاتِ دِلِه که اورشلیمِ نَزیکی و زیتونِ کوهِ دِلِه با بَرِسیِیَن، عیسی دُتا ازخودشه شاگِردان روانه هَکوردِه.
2
و اوشانه باَگوته: «به اون دِهاتی که شِیمی پِیش دَرِه، بیشین. هَمین که دِلهِ بَشَین، ایتا دَوِسِّه خَر کُرِّه رِه پیدا کانید که تا اَلآن هیچکس اونه سَر سَوار نَبا. اونِه واز هَکُنید و بیارین.
3
اَگه کسی شیمی جی بَپُرسییَه: ”چِرا اینجور کانید؟“ باگویید: ”خُداوند اونِه احتیاج دارِه و دَرجا خَر کُرِّه رِه شِمِره وَگِرداندِنِه“.»
4
اون دُتا شاگِرد بَشَن و کوچه یه دِلِه ایتا خَر کُرِّه پیدا هَکُردَن که ایتا دَرِ ور دَبِسِّه با. اونِه واز هَکُردَن.
5
بعضی از اوشانیکه اوجِه ایسَبان، اوشانه جی بَپُرسییَن: «چِرا خَر کُرِّه رِه واز کانید؟»
6
اون دُتا شاگِرد هَمونجور که عیسی اوشانه باگوتِه با، باگوتَن؛ پَس بَنَن بوشون.
7
شاگِردان اون خَر کُرِّه رِه عیسی یِه وَرجه بیاردِن، خودِشانِه قواشانه اونه سَر تُووادَن، وَ عیسی سَوار هَبا.
8
مَردُم جی خیلیان هم خودِشانِه قَوا رهِ رایِسَر پَهن هَکُردَن و بَعضیان هَم وَلگدارِ شاخه شانهِ که اون دُور و وَر زَمینِ جی بَبییِه بان رِه، راه دِلِه پَهن کانه بان.
9
اوشانیکه عیسی یِه پیش شونه بان و اوشانیکه عیسی یِه دُمّالسَر هَنِه بان، داد هَمرَه گونه بان: «نِجات هَدِه! «موبارکِ اونیکِه خداوندِ اِسمِ هَمرَه هَنه!»
10
«اَمیِ جَد داوود پادشاهی یه بَموئَن موبارَکِ!» «نِجات آسِمانِ عَرشه دِلِه!»
11
عیسی به اورشلیمِ شَهر بوما و مَعبدِ دِلِه بَشَه. اوجِه، خودشه دُور و وَر همه چیرهِ بِیشییِه، وَلی چون دیر وَخت با، اون دَوازَّه شاگِردِ هَمرَه بِیتعَنْیایِ آبادی یه سَمت بَشَه.
12
فَردَئی، وَختی که دَبان بِیتعَنْیایِ آبادی یه جی دِرگا بوشون، عیسی رِه وَشنا هَبا.
13
دورِ جی ایتا اَنجیل دارِ بَدییَه که وَلگ داشتِه؛ جلو بَشَه تا بِیشِه دارِ سَر میوِه دَرِه یا نه. وَختی دارِ نَزدیک هَبا، بِجُز وَلگ هیچی پیدا نَکوردِه، چون هَلَه اَنجیلِ موقه نَبا.
14
عیسی اون دارِ باَگوته: «دِ هیچ وَخت هیچ کَس تی جی میوه ایی نُخارنِه!» اونه شاگِردان اینه بِشنَوِسَّن.
15
وَختی اورشَلیمِ شهر بَرِسیِیَن، عیسی مَعبدِ دِلِه بَشَه و اوشانیکه اوجِه دَبان کاسِبی هَکُنَن رِه دِرگا هَکُردِه. اون صَرّافانِ تخت و کَفتَر فروشانِ بَساطِ فور بیاردِه.
16
وَ هیچ کَسِ اِجازِه نَده بار جا بجا هَکُردَن وَسین مَعبَدِ حیاطِ دِلِه رَد هَبو.
17
ایما اوشانه تَعلیم هَدَه و باَگوته: «مَگِه مقَدَّسِ نِوِشتِه های دِلِه بَنوِشتِه نَبا که، «”می سِرِه، تمام قومِشانِ وَسین دُعایِ سِرِه دُخوانده بونه“؟ وَلی شُما اونِه ’دُزِّ لانه‘ هَکُردین.
18
مَعبدِ گَتِه کاهِنان و توراتِ مُعَلِمین وَختی اینه بِشنَوِسَن، ایتا راهِ دُمّال گَردَنِبان تا عیسی رِه از بین بَبِرَن، چونکه اونه جی تَرسِنِه بان، چون تمام جَماعَت اونه تَعلیم هَدَنِ جی حِیران بان.
19
نِمایِ سَر عیسی و شاگِردان شَهرِ جی دِرگا بَشَن.
20
صُبِ سَر، راهِ دِلِه، اون اَنجیل دارِ بَدییَن که بَنِه جی خُشک هَبا با.
21
پِطرُس جَریانِ یاد بیاردِه و عیسی رِه باَگوته: «اُسّا، بِیِش! اون اَنجیل داری که نِفرین هَکُردی، خُشک هَبا.»
22
عیسی باَگوته: «خُدا رِه ایمان بِدارین.
23
راس راسی شِمِره گونَم، هر کی این کوهِ باگو، تی جایِ سَربَکِّندِه هَبو، دَریایِ دِلِه تووادِه هَبو،“ وَ خودِشِه دِلِ میَن شَک نَکُنِه بلکه ایمان بِدارِه اونچه که گونِه بونه، اونه رَه بونه.
24
پَس شِمِره گونَم، هرچی دُعایِ دِلِه خَنید، ایمان بِدارین که اونِه بِیتین، وَ اون شیمی شین بونه.
25
«پَس هر وخت دَرید دُعا هَکونید، اَگه یِنَفرِجی یِچی بِه دِل دارید، اونه بِبَخشین تا شِیمی پیَر هَم که آسِمانِ دِلِه دَرِه، شِیمی تَقصیرانِ بِبَخشه.
26
وَلی اَگه شُما نِبَخشین، شِیمی پیَر هَم که آسِمانِ دِلِه دَرِه، شِیمی تَقصیرانِ نِبَخشِنِه.»
27
اوشان یِدَفِه دیگه بومَن اورشَلیمِ. وَختی که عیسی دَبا مَعبدِ دِلِه قدَم بَزِنِه، مَعبدِ گَتِه کاهِنان و توراتِ مُعَلِمین و مشایخ اونه وَرجه بومَن،
28
اوشان عیسی یِه جی بَپُرسیَن: «بِه چِه حَقّی این کارانِ کانی؟ کی تِرِه این حَقِّ هَدَه اینجور کارانِ هَکُنی؟»
29
عیسی اوشانه جواب باَگوته: «مَنَم شِیمی جی ایتا سوال دارَم. می جَواب هَدین تا مَنَم شِمِره باگوُم بِه چِه حَقی این کارانِ کانَم.
30
یحیی یه تَعمید خُدایِ جی با یا آدَم جی؟ می جِوابِ هَدین.»
31
اوشان هَمدیگَر هَمرَه مَشورَت هَکُردَن و باگوتَن: «اَگه باگوییم، ”خُدایِ جی با“، گونِه، ”پس چِرا اونه ایمان نیاردین؟“
32
وَلی اَگه باگوییم، ”آدَمِ جی با“...» - اوشان مَردُمِ جی تَرسِنه بان، چون هَمِه یحیی رِه راس راسی پِیغَمبر دانِسَّن.
33
پَس عیسی یِه جَواب باگوتَن: «نِدانیم.» عیسی باَگوته: «مَنَم شِمِره نَگونَم به چه حَقّی این کارانِ کانَم.»
← Chapter 10
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 12 →
All chapters:
1
2
3
4
5
6
7
8
9
10
11
12
13
14
15
16
Recommended Reading
Commentary
Mark Commentaries
→
Devotional
Mark Devotional Guide
→
Get This Bible
Mazanderani GMB (گیله ماز) Study Bible
→