Mark 12

Mazanderani GMB (گیله ماز)

1ایما عیسی مَثلِ هَمرَه اوشانه وَسین گَب بَزَه و باَگوته: «ایتا مَردَای اَنگور باغ دُرس هَکُردِه و اونه دُورِ چَپَر بَکِشییَه، ایتا حوض اَنگورِ لِه هَکُردَن وَسین و ایتا سَکّو دیدبانی یه وَسین بِساته. ایما باغِ چَن تا باغبان اجاره هَدَه و خودش ایتا دیگه مَملِکَت بَشه.

2اَنگورچینیِ موقِه، ایتا پاکار باغبانانِ ور روانه هَکوردِه تا خودشه اَنگورباغِ مَحصولِ سَهمِ اوشانِه جی هَگیره.

3وَلی اوشان، پاکارِ بِیتَن، بَزَن و دَس خالی وَگِرداندَن.

4ایما صاب باغ ایتا دیگه پاکار اوشانه وَرجه روانه هَکوردِه، وَلی باغبانان اونه سَرِه بِشکِندَن و اونه بی حُرمَتی هَکُردَن.

5باز صاب باغ ایتا دیگه پاکار روانه هَکوردِه، اوشان اون رِه هَم بَکوشتَن. وَ خِیلیانِ دیگَرِ هَمرَه هَم اینجور هَکُردَن؛ بعضیان رِه بَزَن و بعضیان رِه بَکوشتَن.

6صاب باغ فقط یِنَفر دیگَه داشتِه که روانه هَکونه و اون هم اونه عزیزِ ریکا با. پس سَرآخر اونه باغبانانِ ور روانه هَکوردِه و خودشه هَمرَه باگوتِه: ”اوشان می ریکا رِه حُرمَت نَنِن.“

7وَلی باغبانان هَمدِیگَرِ بآگوتَن: ”این اونه وارثِ؛ بیئین اونه بَکوشیم تا این اِرث اَمی شی هَبو.“

8پَس اونه بِیتَن، بَکوشتَن و انگور باغِ جی دِرگا تووادَن.

9اَسِه، صاب باغ چی کانه؟ هَنه و باغبانان از بین بَرنِه و انگور باغِ کَس دیگَرِ دَس دَنه.

10مَگِه مَزمورِ کِتابِ دِلِه نُخوانِسّید که: «”اون سَنگی که بَنّائِشان رَد هَکوردَن، ساختِمان اَصلی ترین سَنگ هَبا،

11خُداوند اینجور هَکُردِه و اَمیِ نَظَر عَجیب هَنه.“»

12اوشان خَسَّن عیسی رِه گیر تُووادَن، چون بِفَهمِسَّن که این مَثَلِ اوشان باره باَگوته، وَلی مَردُم جی تَرس داشتِن، پس عیسی رِه وِل هَکُردَن و بَشَن.

13ایما اوشان چَن نفر فَریسی فِرقِه و هیرودیسِ هَوادارانِ جی عیسی یِه وَرجه روانه هَکوردَن تا اونه خودشه گَبِ هَمرَه تَلِه میَن تُووادَن.

14اوشان بومَن و عیسی رِه باگوتَن: «اُسّا، دانیم تو راسگو مَردی هیسی و تِرِه مُهم نیِه مَردُم چی گونَن، چون ظاهرِگولِ نُخارنی، بلکه خُدایِ راه رِه دُرسّی یه هَمره تَعلیم دَنی. اَسِه شرعاً رُوم امپراطورِ خراج هَدَئن دُرِسِّه یا نه؟ بایِسّی اونه خراج هَدیم یا نه؟»

15وَلی عیسی که اوشانه دُرویی رِه دانِسِّه، اوشانه باَگوته: «چِرا مَرِه آزمون کانید؟ ایتا سِکِّه یه دیناری مَرِه بیارین تا اونِه بِینَم»

16اوشان ایتا سِکِّه‌ بیاردَن. عیسی اوشانه جی بَپُرسیِه: «کی یِه نَقش و نِگار این سِکّه یه سَر دَرِه؟» جَواب هَدَن: «رومِ امپراطورنَقش و نِگار.»

17عیسی اوشانه باَگوته: «پَس امپراطور مالِ امپراطورِ هَدین و خُدایِ مالِ خُدا رِه.» اوشان اونه گَبِ جی هاج و واج بُمانِسَّن.

18ایما عُلَمایِ فِرقِه صَدوقی که مُردِگانِ زندهِ هَبوسَّن قَبول نِداشتَن، عیسی یِه وَرجه بومَن و اونه جی ایتا سوال هَکُردَن، باگوتَن:

19«اُسّا، موسی یِه پیغمبر اَمِرِه بَنوِیشته اَگه ایتا مَردَایِ اَداش بَمیرِه و اونه زِنا وَچِه نِداشتِه بو، اون مَردَای بایسّی خودشه بَمِردِه اَداشِ زِنا رِه بَبِره تا خودشه اَداشِ وَسین ایتا نسل بِجا بَنِه.

20هفت تا اَداش بان. اوَّلین اَداش زَن بَبِرده و بی وَچِه بَمِردِه.

21دُوّمین اَداش خودشه بَمِردِه اَداشِ زِنا رِه بَبِرده، وَلی اون هم بی وَچه بَمِردِه. سِوّمین اَداش هَم هَمینجور هَبا.

22هَمینجوری، هیچکِدام از هَفتا اَداش خودِشانِه جی هیچ وَچِه ایی بِجا نُذاشتَن، سَرآخَر، اون زِنا هَم بَمِردِه.

23اَسِه، قیامتِ روز وَختی که اوشان باز زندهِ بونَن، اون زِنا کُدام ایتا اَداشِ زِنا بونه، چون هَر هَفتا اَداش اونه بَبِردِه بان؟»

24عیسی اوشانه باَگوته: «شُما چَنِّی گُمراهین، چون نه مُقَدَّسِ نِوِشتِه های جی چیزی دانید نه خُدایِ قُوَّتِ جی؟

25چون وَختی مُردِگان زندهِ هَبون، نه زَن گیرنَن و نه شو کانَن، بلکه آسِمانی فِرِشتِگانِ مِثان بونَن.

26وَلی مُردِگانِ زندهِ هَبوسَّن بارِه مَگِه موسیِ کِتابِ دِلِه لَمبَسِ جَریانِ سَر نُخوانِسّید، خُدا چِطور اونه باگوته ”مَن ابراهیمِ خدا و اسحاقِ خدا و یعقوبِ خُدا هیسَم“؟

27خُدا مُردِگانِ خُدا نییِه، بلکه زندهِ شانه خُدا هیسِه. شُما خِیلی گُمراهین!»

28توراتِ ایتا از مُعَلِمین که اوجِه ایسَبا و اوشانه بَحثِ گوش دَنِه با. وَختی بَدییَه عیسی چقدر خوُب اوشانه جَوابِ هَدَه، عیسی یِه جی بَپُرسیِه: «کُدام حُکم، هَمِه یه جی مُهِمتَرِه؟»

29عیسی اونه باَگوته: «این حُکم همه یه جی مُهِمتَره: ”اِی اِسراییلِ قوم بِشنُئین، خُداوند اَمیی خُدا، ایتا خداوند هیسه.

30خُداوند تیِ خُدا رِه تمام تیِ دِلِ هَمرَه و تمام تیِ جانِ هَمرَه و تمام تیِ فِکر هَمرَه و تمام تیِ قُوَّتِ هَمرَه دوس بِدار.“

31دُوّمین حُکم اینِه: ”تی هَمسادِه رِه تیِ مِثان دوس بِدار.“ این دُتا حُکمِ جی گَتِ تَر دَنییِه.»

32اون توراتِ مُعلِم عیسی رِه باَگوته: «اُسّا دُرس گوُنی! دُرس باگوتی که خُدا ایتا هیسه و بِجُز اون دِ خُداییِ دَنییِه،

33اونه تمام دِلِ هَمره و تمام عقلِ هَمرَه و تمام تیِ قُوَّتِ هَمرَه دوس داشتَن و تی هَمسادِه رِه تیِ مِثان دوس داشتَن، همه یه تمام سوزهَدایا و قُربانیهای جی مُهمتَرِه.»

34وَختی عیسی بَدییَه اون مَردَای چقدر عاقلانِه جَواب هَدَه، اونه باَگوته: «تو خُدایِ پادشاهی یه جی دور نییَی.» ایما، دِ هیچ کَس جرأت نَکُردِه عیسی یِه جی هیچی بَپُرسِه.

35وَختی که عیسی دَبا مَعبَدِ دِلِه تَعلیم هَدِه، بَپُرسیِه: «چطوریه که توراتِ مُعَلِمین گونَن مَسیحِ موعود داوودِ پادشاهِ ریکائِه؟

36داوود خودِش روح القُدُسِ وَحی هَمرَه باَگوته: «‌”خداوند می خُداوَندِ باَگوته: «می راس دَس بِنیش تا موقِه ایی که تی دُشمَنانِه تی لِنگِ جیر تووادَم.“»

37اَگه خودِ داوودِ پادشاه اونه خداوند دُخواندِنِه، پس چِطور مسیحِ موعود تانهِ داوود ریکا هَبو؟» اون ازدِحام که اوجِه دَبان خُشحالی یه هَمرَه عیسی یِه گَبان رِه گوش دَنهِ بان.

38عیسی خودشه تَعلیم هَدَئنِ موقِه باَگوته: «توراتِ مُعَلِّمینِ جی دُوری هَکُنید، اوشان دوس دارَن بُلَندِ قَوایِ هَمرَه راه بوشون و مَردُم، کوچِه بازارِ دِلِه اوشانه سلام هَکُنَن،

39وَ عِبادَتگاهِ دِلِه خُجیرتَرین جا رِه بِدارِن و مِهمانی یه دِلِه بالاسَر بِنیشَن.

40اوشان یه طَرَفِ جی بیوِه زِناکانِ سِرِه رِه بالا کَشِنَن و از طَرَفی دیگه خُدنَمایی یه وَسین، خودِشانِه دُعا رِه کِش دَنِن. اوشانه مُجازات خِیلی گَت تَرِه.»

41عیسی معبد بیت المالِ صِندوخ جلو نیشته با و مردمی که صندوخِ دِلِه پول تووادِنِه بان رِه دینه با. خیلی از پولداران گَتِه پول تووادِنِه بان.

42ایما ایتا فَقیرِ بیوِه زِنا بوما و صِندوخِ دِلِه دو قَرَن تُووادَه.

43عیسی خودشه شاگِردانِ خودشه ور دُخوانِسِّه و اوشانه باَگوته: «راس راسی شِمِره گونَم، این فَقیرِ بیوِه زِنا تمام اوشانیکه صِندوخِ دِلِه پول تُووادَن جی، بیشتر پول تُووادَه.

44چون تمام اوشان، خودِشانِه اضافِه مالِ جی هَدَئن، ولی این زِنا خودشه فَقیری یه دِلِه، هَر چی که داشتِه رِه هَدَه، یَعنی تمام خودشه روزی رِه هَدَه.»

← Chapter 11 Jump to: Chapter 13 →