1 Timothy 6

Norwegian 1938

← Chapter 5 Jump to:

1So mange som er trælar under åket, skal halda herrane sine all æra verde, so ikkje Guds namn og læra skal verta spotta.

2Men dei som hev truande herrar, skal ikkje vanmæta dei, for di dei er brør, men skal so mykje heller gjera si tenesta, av di dei som nyt godt av velgjerningi deira, er truande og elska. Dette skal du læra og påminna um.

3Dersom nokon fer med framand lære og ikkje held seg til vår Herre Jesu Kristi heilsame ord og den læra som høver til gudlegdom,

4so er han ovmodig endå han ingen ting skynar, men er sjuk for stridsspursmål og ordstrid, som det kjem ovund av og tretta, spotting, vond mistru,

5stendig krangling millom menneske som er øydelagde i hugen og skilde med sanningi, med di dei held gudlegdomen for ein veg til vinning.

6Ja, gudlegdom saman med nøgsemd er ei stor vinning;

7for me hev ikkje havt noko med oss til verdi; det er då audsynt at me ikkje heller kann taka noko med oss derifrå;

8men når me hev føda og klæde, skal me vera nøgde med det.

9Men dei som vil verta rike, fell i freisting og snara og mange dårlege og skadelege lyster, som søkkjer menneski ned i undergang og fortaping.

10For pengehug er ei rot til alt vondt; av trådom deretter hev sume fare vilt frå trui og hev gjenomstunge seg sjølve med mange pinslor.

11Men du, Guds menneske, fly frå desse ting! Men jaga etter rettferd, gudlegdom, tru, kjærleik, tolmod, spaklynde!

12Strid den gode striden i trui, grip det ævelege liv, som du vart kalla til, du som og bar fram den gode vedkjenningi for mange vitne!

13Eg byd deg for Gud, som gjev alle ting liv, og for Kristus Jesus, som vitna den gode vedkjenningi for Pontius Pilatus,

14at du skal halda bodet uflekka og ulastande til vår Herre Jesu Kristi openberring,

15som den sæle og einaste mektige Herre skal visa oss i si tid, han som er kongen yver kongane og herren yver herrane,

16han som åleine hev udøyelegdom, som bur i eit ljos som ingen kann koma til, han som inkje menneske hev set eller kann sjå; honom vere æra og æveleg makt! Amen.

17Bjod dei som er rike i den noverande verdi, at dei ikkje skal ovmoda seg eller setja si von til den uvisse rikdomen, men til Gud, som gjev oss rikleg alle ting å njota,

18at dei skal gjera godt, vera rike på gode gjerningar, gjevmilde, velgjerdsame,

19so dei legg seg upp ein god grunnvoll for den komande tid, so dei kann gripa det sanne liv.

20Du, Timoteus, tak vare på det som er yvergjeve til deg, so du vender deg frå det vanheilage tome svallet og motsegnene frå den kunnskap som falskeleg vert kalla so,

21som sume vedkjenner seg, so dei hev fare vilt i trui! Nåden vere med deg!

← Chapter 5 Jump to: