Hosea 2

Ndebele Bible (SND) 2012 (IsiNdebele 2012 Translation)

← Chapter 1 Jump to: Chapter 3 →

1Yithini kubafowenu “Bantu bami”, kibodadwenu nithi “Thandiwe”.

2“Mangalelani unyoko, nimmangalele ngombana akasese mkami, nami angisese myenakhe! Ubangakameli ukuba namehlo amanengi nokuqoqoma.

3Nakungasinjalo bekumele ngimhlubulise abe bhunubhunu njengamhlana abelethwako. Bengizamenza abe njengerhalawumba, athunye njengebhudu, ngimbulalise ngokoma.

4Bengingazukuba nesirhawu ebantwaneni bakhe ngombana babantwana bokonakala.

5Unina wathuwelela ngobungwadla, wabamitha ngehlazo. Nje-ke umfazi lo wathi: ‘Ngizakulandela iinthandwa zami ezingipha ukudla kwami namanzami, zingembathise ngezoboya nelineni, zingiphe namagugwami’.

6Yeke ngaqeda ngokuthi: Ngizakubiyela isivande samesi ngomunga nangomthangala wamatje. Nangenza njalo amaqhingakhe azakufelela:

7Iinthandwa zakhe azilandelelako zingameyami, azifune angazifunyani. Khona-ke uzakuqaquluka athi: ‘Awa-yeke, angibuyele kusobentwana ngombana bekangiphethe kuhle.’

8Khonapho umfazi lo akhange avume bonyana ngimi omondla ngamabele, ngewayini nangamafutha we-oliva. Bengamtotosa ngemali enengi nangegolide (abalisebenzisa ukubumba isithombe sakaBhali).

9Nje-ke, ngiseqhingeni lokobana ikoroyi newayini abaseze ayifunyana kimi nakuvunwako le, ngimdime kwanjesi. Nezambatho zoboya nezelineni ebengimupha zonezi, ngizamemuka akhambe bhunubhunu.”

10“Nje-ke ngizomhlubulisa phambi kweenthandwa zakhezo, abe atlhoge nomenyeli.

11Ngizakuphelisa koke ukuzithabisa kwakhe: kweminyaka, kweenyanga nekwamalanga. Iye, ngiphelise yoke iminyanyakhe.

12Ngizakutjhabalalisa isidiribe namakhiwanakhe athe ngawo: ‘Yikokhelo iinthandwa zami ezingikhokhela ngayo.’ Ngenze isimakhe ifukufuku bese idliwa ziimbandana zommango.

13Ngizamhlawulisela amalanga agade atjhisela ngawo aboBhali itjhwalo: Amalanga azimomonda ngawo ngobuphaziphazi, walandelana neenthandwa zakhe. Kodwana mina wangikhohlwa.” Kutjho uSomnini.

14“Nakanjani ngizamsomasoma, ngimdosele erhalawumbeni, ngikhulume naye kuhle.

15Ukusuka lapho ngizambuyisela isidiribe sakhe, ngenze nomrhoba we-Akori isango lethemba. Lapho-ke uzangilalela njengalokha nasesemutjha, njengamhlana aphuma eGibhide.”

16USomnini uthi: “Mhlokho uzangibiza uthi ‘babakwami’; ungasathi ‘Bhalami’.

17Ngizamkhafulisa amabizo waboBhali emlonyenakhe, angabe asawabiza.

18“Mhlokho ngizakwenzela u-Israyeli isivumelwano neembandana zommango, neenyoni zezulu, neenrhurhubi zephasi. Ngizakwephula imisubela neensabula, neenhlabano zoke zepi enarheni, ukuze nibe nokuphumula nokuthula.

19“Ngizakuthatha ube mkami isikhathi soke. Ngikuthathe ube mkami ngikusize, ngikuvikele; ngithembeke bengikurhawukele kube sisipho sami kuwe.

20Ngikuthathe ube mkami weenkomo, ube netjhebiswano noSomnini.”

21USomnini uthi: “Mhlokho ngizakuphendula; Ngiphendule izulu, izulu liphendule iphasi.

22Iphasi liphendule ikoroyi, isidiribe namafutha we-oliva; zona-ke zizakuphendula uJizriyela.

23Ngizazitjalela yena enarheni. Ngirhawukele uLo-Rurhama, ngithi kuLo-Ami ‘Bantu bami’, bese bona bathi ‘Zimethu’.”

← Chapter 1 Jump to: Chapter 3 →