Mark 13

Ndebele Bible (SND) 2012 (IsiNdebele 2012 Translation)

← Chapter 12 Jump to: Chapter 14 →

1Kuthe uJesu nasele aphuma ngethempelini, omunye wabafundi bakhe wathi kuye: “Mfundisi, akhese uthi uyaqala amatje la! Nakumumakhiwo wona, maye ubuhle obulapha!”

2UJesu waphendula wathi: “Uyayibona yoke imakhiwo emikhulu le na? Angekhe kwasala nelilodwa ilitje phezu kwelinye. Elinye nelinye lizakugirizelwa phasi.”

3Kwathi uJesu asahlezi entabeni ye-Oliva aqalane nethempeli, uPitrosi, uJakopo, uJwanisi no-Andrisi bambuza babodwa bathi:

4“Sitjela bona lokhu kuzakwenzeka nini na? Sizakuba yini isibonakaliso sokobana isikhathi sesifikile sokwenzeka kwezintwezi na?”

5UJesu wabaphendula wathi: “Yelelani bona kungabikhona namunye onikhohlisako.

6Abanengi bazakuza ebizweni lami bathi, ‘Nginguye’ bese bakhohlisa abanengi.

7Nanizwa ngezipi neendumela zezipi, ningesabi. Izinto ezinjalo kufanele bona zenzeke, kodwana isiphetho siseza.

8Isizwe sizakuvukela isizwe nombuso uvukele umbuso. Kuzakuba nokusikinyeka kwephasi eendaweni ezahlukeneko kanye nendlala. Lokho kukuthoma kwemirhelo.

9“Yeke ziyeleleni nina ngombana nizokudoselwa emabandla benimadlhwe ngemasinagogini. Nizakujama phambi kwababusi namakhosi ngesimanga sami ninikele ubufakazi ngami kibo.

10Ivangeli lifanele litjhunyayelwe kizo zoke izizwe qangi.

11Lokha nabanibambako banisa ebandla, ningathomi nikhathazeke bona nizakuthini. Khulumani lokho eninikelwe khona ngesikhatheso ngombana akusini enikhulumako, kukhuluma uMoya oCwengileko.

12Umfo uzakukhaphela umfo ekufeni nobaba akhaphele umntwanakhe. Abantwana bazakuvukela ababelethi babo bebabakhaphele ekufeni.

13Boke abantu bazanihloya ngebanga lami kodwana loyo obambelela bekube sekupheleni uzakusindiswa.”

14“Lokha nanibona isinyenyiso esibhubhisako esijanyiswe endaweni engasi ngeyaso, umfundi akazwisise; kuthi labo abaseJudiya babalekele eentabeni.

15Loyo ophezu kwephahla lekumbakhe akangehli namkha angene ngekumbeni ayokuthatha okuthileko.

16Osemasimini akangabuyeli emuva ayokuthatha isambatho sakhe.

17Maye kuzokuba buhlungu kangangani mhlokho ebafazini abazithweleko kanye nabamunyisako!

18Thandazani bona lokhu kungenzeki ebusika

19ngombana leyo kuzokuba mimihla yesizi engafani neyaphambilini lokha uZimu nakadala iphasi, bekube kunamhlanje, begodu nengasoze yabuye yafana nayo.

20Ngathana uSomnini akhange anciphise amalanga lawo, bekungekhe kwaphunyurha muntu. Kodwana ngebanga labakhethiweko, iye labo uSomnini abakhethileko, uwanciphisile amalanga lawo.

21“Ngesikhatheso nanyana ngubani othi kini, ‘Qalani nanguKrestu!’ namkha, ‘Qalani nanguya lapha akhona!’, ningakukholwa lokho.

22Kuzokuvela abosingaKrestu nabaphorofidi bamanga, benze iimbonakaliso neemangaliso kobana bakhohlise abakhethiweko nakube bayakghona.

23Yeke tjhejani, sele nginitjele koke ngaphambi kwesikhathi.”

24“Kodwana emihleni leyo ngemva kwesizi lelo, “ilanga lizakufiphala nenyezi ingakhanyisi.

25Iinkwekwezi zizokukhithika emkayini, amandla asezulwini asikinywe.

26“Ngesikhatheso abantu bazakubona iNdodana yoMuntu isiza emafini ngamandla amakhulu nangephazimulo.

27Izokuthumela iingilozi zayo beyibuthele ndawonye abakhethiweko bayo emajikeni womane wephasi, epelazwe nemaphelelweni womkayi.”

28“Yeke fundani isifundwesi ngomuthi wamakhiwani: Msinyana ngemva kobana amahlumelawo aba buthakathakana bese kutlhurhe amakari, seniyazi bonyana ihlobo litjhidele.

29Kunjalo-ke, nanibona izintwezi zisenzeka, nizokwazi bona isikhathi sesitjhidele, sele sisemnyango.

30Ngiqinisile ngiyanitjela bona isizukulwanesi ngambala asisoze sadlula kungakenzeki zoke izintwezi.

31Izulu nephasi kuzokudlula, kodwana amezwami angekhe adlula.

32“Akakho owaziko ngelangelo namkha nge-awarelo, ngitjho neengilozi ezulwini neNdodana ngokwayo, kodwana nguBaba kwaphela owaziko.

33Qaphelani! Yelelani! Anazi bona isikhatheso sizokufika nini.

34Kuzokuba njengendoda enekhambo: Itjhiya umzayo ezandleni zeensebenzi zayo, esinye nesinye isisebenzi sinomsebenzaso bese itjela leso esisesangweni bona sibeke ilihlo.

35Ngalokho-ke hlalani niqaphile ngombana anazi bona umninimuzi uzokufika nini, kungaba sentambama, phakathi kobusuku, ngamasa namkha ekuseni.

36Nakeza ningakatjheji, anganifumani nilele.

37Lokho engikutjho kini, ngikutjho kibo boke: Qaphelani!”

← Chapter 12 Jump to: Chapter 14 →