bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Nuer
/
Nuer Bible © Bible Society in South Sudan 1998,2012
/
1 Kings 11
1 Kings 11
Nuer Bible © Bible Society in South Sudan 1998,2012
← Chapter 10
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 12 →
1
Täämɛ cu kuäär ni Thɔ-lo-mon män ti jur ti ŋuan nhɔk. Nya Pɛro, kɛnɛ nya ji̱ Mo-ab, kɛ nya ji̱ Am-on, kɛ nya ji̱ Ɛ-dɔm, kɛ nya Dhi-don, kɛ nya Ɣɛ̈th,
2
nyier nɛɛni tëë ci Kuoth Nhial ji̱ I-thɛ-rɛl luek thi̱n i̱, “/Cuarɛ kuen kä kɛ, kä akɛ /ci kuen kä yɛ, kɛ ɣöö ba lo̱ckun dhil ri̱t a bia wä guɔ̱ɔ̱r ni kuthkiɛn.” Kɛ kɛn ci Thɔ-lo-mon rɔ wä ka̱p nhökdiɛn ɔ.
3
Jɛn tëë kɛ män ti cɛ kuɛn ti kur bärɔw, kɛ luɔɔm ti kur diɔ̱k. Kä cu mänkɛ jɛ buath raar.
4
Kä cu mänkɛ jɛ buath palä kuthnikiɛn kɛ ɣöö cɛ dɔ̱ŋ. Kä /kenɛ lɔcdɛ ka̱m Kuoth Nhial Kuothdɛ, ce̱tkɛ lɔc gua̱n ni Dee-bid.
5
Kɛ ɣöö cɛ wä guɔ̱ɔ̱r ni Ac-tar-te kuoth ji̱ Dhi-don, kɛnɛ Mil-kom kuoth ji̱ Am-on.
6
Inɔ cu Thɔ-lo-mon la̱t ni dueer waaŋ Kuɔth Nhial, kä /kenɛ guɔ̱ɔ̱r ni Kuoth Nhial kɛ lɔcdɛ kɛɛliw ce̱tkɛ mëë ci gua̱n ni Dee-bid ɛ la̱t.
7
Kä cuɛ Kɛ-moc kuoth ji̱ Mo-ab lät kä gua̱th palä, kɛnɛ Mo-lɛk kuoth ji̱ Am-on wi̱i̱ pa̱a̱m nhiam Jɛ-ru-tha-lɛm.
8
Ɛn nɔmɔ cuɛ lät kä mänkɛ diaal tin jur, tin cua kuthkiɛn wa̱ŋ wal kɛn muc.
9
Kä cu lɔc Kuɔth Nhial jiäk kɛ Thɔ-lo-mon, kɛ ɣöö cɛ rɔ ri̱t kɔr Kuɔth Nhial, Kuoth I-thɛ-rɛl, mëë ci rɔ nyuɔ̱th jɛ ni kä rɛɛw,
10
kä cɛ ruac kɛ jɛ kɛ kui̱ kä ɣöö /cɛ kuth kɔ̱kiɛn bi guɔ̱ɔ̱r. Duundɛ ɣöö /kenɛ ruac Kuɔth Nhial tit.
11
Kɛ kui̱c ɛmɔ cu Kuoth Nhial Thɔ-lo-mon jiök i̱, “Min ca jɛn ca̱ru ɛnɛ mi a/keni gukdä tit, kɛnɛ ŋuɔ̱tkä tëë cä la̱t ji̱, ɛ puc ɣän bä kuääru woc kä ji̱ kä bä jɛ ka̱m raan kɔaaru.
12
Kuɛ la ɣöö kɛ kui̱ guur ni Dee-bid /cä bi la̱t rɛy ni̱niku, duundɛ ɣöö bä woc tetdä gatdu.
13
Ɛni ɣöö ɣän /cä kuäär bi woc kɛɛliw. Bä thok duëël kɛl ka̱m gatdu, kɛ kui̱ guur ni Dee-bid kɛnɛ wec Jɛ-ru-tha-lɛm min cä mɛk.”
14
Kä cu Kuoth Nhial Thɔ-lo-mon moc ji̱ tɛ̈r, A-dad raan Ɛ-dɔm, thok duëël kuäärä kä Ɛ-dɔm.
15
Kɛ ɣöö mëë dan ëë wä Dee-bid kä Ɛ-dɔm, cu Yo-ab bo̱o̱th rɛ̈m wä, wëë nɛy tin ci li̱w kony, cuɛ tut diaal näk kä Ɛ-dɔm.
16
(Kɛ ɣöö cu Yo-ab kɛnɛ ji̱ I-thɛ-rɛl diaal duɔth ɛn wi̱ni kɛ päth bäkɛl, amäni mëë cɛ tut diaal näk kä Ɛ-dɔm.)
17
Duundɛ ɣöö cu A-dad rɔ bar kä I-jëp, kɛɛl kɛ naath kä ji̱ Ɛ-dɔm kuany gua̱n kɛ ɣöö ŋotdɛ kɛ kuɛ̈ɛ̈.
18
Cukɛ jiɛn kä Mid-yan cukɛ ben kä Pa-ran, kä cukɛ naath ka̱n thi̱n, cukɛ ben kä I-jëp, kä Pɛro, min cu jɛ moc duel kä cuɛ moc mun kɛnɛ mi̱eth.
19
Kä cu A-dad gɔɔy mi di̱i̱t jek kä Pɛro, kä cu Pɛro jɛ kuën nyimanthudɛ, nyiman Tɛ̈-pɛ-neth ciek kua̱r.
20
Kä cuɛ jɛ da̱p gat mi dho̱o̱l mi cɔali Gɛ-nu-bɛ̈th, min cu Tɛ̈-pɛ-neth ɛ do̱th dhɔr Pɛro. Cu Gɛ-nu-bɛ̈th piith dhɔr Pɛro kɛɛl kɛ gaatkɛ.
21
Kä mëë ci A-dad ɛliŋ kä I-jëp ɛn ɣöö ci Dee-bid li̱w, kɛnɛ bo̱o̱th rɛ̈m ni Yo-ab, cuɛ Pɛro jiök i̱, “Jak ni ɣä kä jiɛn, bä wä wi̱i̱dä.”
22
Duundɛ ɣöö cu Pɛro ɛ loc i̱, “Ɛŋu mi dak kä ɣä, mɔ go̱o̱ri ɣöö loci wi̱i̱du mɔ?” Kä cuɛ Pɛro loc i̱, “Thilɛ ŋu, duundɛ ɣöö jak ni ɣä kä wä.”
23
Kä cu Kuoth Thɔ-lo-mon lɛni moc kɛ gua̱n tɛ̈r mi dɔ̱ŋ, Rɛ-dhon gat Ɛl-yada mëë ci rɔ bar kɛ kuäärɛ ni Ɣä-dɛ̈d-ɛdhɛr kuäär Dho-baa.
24
Cuɛ rɔ duɔ̱l naath, kä cua bo̱o̱th nɛɛni ti ji̱ nyuɔɔni, kɛ kɔr kä mëë ci Dee-bid Dho-baa däk. Kä cuɛ wä cieŋ kä Da-math-kɛth, kä cua jɛ jak kä kuäär kä Da-math-kɛth.
25
Kä cua gua̱n tɛ̈r I-thɛ-rɛl kɛ ni̱n teekä Thɔ-lo-mon diaal, nyonɛ naath ce̱tkɛ mëë ci A-dad ɛ la̱t. Cuɛ I-thɛ-rɛl ciɛŋ ɛ jiäk, kä cuɛ Thi-ri-ya ruac.
26
Kä cu Ya-rɔ-baam gat Nɛ-bat raan Ɛ-pa-rim kä Dhɛ-re-daa raan kɔaar Thɔ-lo-mon, mi cɔal man i̱ Dhɛ-ruwaa mi ciek jɔkä cuɛ la gua̱n tɛ̈r kua̱r ni Thɔ-lo-mon.
27
Kä min tɛɛrɛ kɛ kuäär ɛn. Ɛ ɣöö ci Thɔ-lo-mon duel mi tɔt täth mi cu duɔ̱ɔ̱p in wä wi̱c gua̱n ni Dee-bid gäk.
28
Kä ɛn Ya-rɔ-baam ɛ ram mi te lua̱ŋ, kä min ci Thɔ-lo-mon jɛ nɛn ɛ ŋuɛ̈t mi luäŋ la̱tdɛ, cuɛ jɛ la̱th wi̱i̱ nɛɛni diaal tin la̱tkɛ la̱t duëël Jo-thɛp.
29
Kä niɛ guäth ëë ci Ya-rɔ-baam jiɛn kä Jɛ-ru-tha-lɛm, cu gök ni Ä-ɣi-yaa raan Cilo röm kɛ jɛ dup. Kä täämɛ Ä-ɣi-yaa cɛ rɔ rith kɛ bi̱i̱ mi pay kɔk. Kä kɛ kɛn da̱ŋ rɛw kä rɔ rɛy dɔaar.
30
Kä cu Ä-ɣi-yaa bi̱i̱ in te puɔ̱nydɛ ka̱n, kä cuɛ jɛ rɛt kä rɛ̈ɛ̈t wäl rɛw.
31
Kä cuɛ Ya-rɔ-baam jiök i̱, “Moc rɔ kɛ rɛ̈ɛ̈t wäl. Kɛ ɣöö nɛmɛ ɛ min ci Kuoth Nhial Kuoth I-thɛ-rɛl ɛ lar i̱, ‘Nɛnɛ ɣän bä kuäär rɛt tetdä Thɔ-lo-mon, kä bɛ ji̱ ka̱m thuk duëli da̱ŋ wäl,
32
(duundɛ ɣöö bɛ tekɛ thok duëël kɛl, kɛ kui̱ jäŋädä ni Dee-bid, kɛnɛ Jɛ-ru-tha-lɛm, wec in cä mɛk rɛy thuk duëli I-thɛ-rɛl diaal),
33
kɛ ɣöö ca ɣä ba̱ny piny ca wä pal ni Ac-tar-te kuoth ji̱ Dhi-don, kɛnɛ Kɛ-moc kuoth Mo-ab, kɛ Mil-kom kuoth ji̱ Am-on, kä/ca guur ni dupkä, kä /cɛ lät ni min gɔaa waaŋdä, kä/ca ŋuɔ̱tkä kɛnɛ luëëkä tit ce̱tkɛ mëë ci gua̱n ni Dee-bid ɛ la̱t.
34
Ɛni ɣöö cä kuäär bi ka̱m raar tetkädɛ kɛɛliw. Bä jak kä ruec kɛ ni̱n teekädɛ diaal, kɛ kui̱ jäŋädä ni Dee-bid min cä mɛk, kä ci ŋuɔ̱tkä tit.
35
Duundɛ ɣöö bä kuäär ka̱m raar tetni gankɛ, kä bä ji̱ ka̱m thuk duëli da̱ŋ wäl.
36
Kä ŋotdɛ bä gatdɛ ka̱m thok duëël kɛl, kɛ ɣöö bi ja̱ŋdä ni Dee-bid tekɛ kuɛ̈ɛ̈ nhiamdä kä Jɛ-ru-tha-lɛm, wec in cä mɛk kɛ ɣöö bä te thi̱n.
37
Kä bä ji̱ ka̱n, kä bi tin diaal tin go̱ri ruac, bia̱ kuäär kä I-thɛ-rɛl.
38
Kä mi wi̱i̱ tin diaal ti la̱tdä ji̱ ti tit, kä bi lot ni dupkä, kä bi la̱t ni mi gɔaa waaŋdä kɛ ti̱etdu kɛ ŋuɔ̱tkä kɛnɛ luëëkä, ce̱tkɛ mëë ci ja̱ŋdä ni Dee-bid ɛ la̱t, bä te kɛɛl kɛ ji̱, kä bä kuayku jak kä ruec, ce̱tkɛ mëë cä lät kä Dee-bid, kä bi ka̱m ruec kä I-thɛ-rɛl.
39
Kɛ kui̱c kä nɛmɛ bä kuay Dee-bid duäc, duundɛ ɣöö /ci bi mäni cäŋ kɛl.’ ”
40
Kä cu Thɔ-lo-mon jɛ go̱r i̱ näkɛ Ya-rɔ-baam. Duundɛ ɣöö cu Ya-rɔ-baam rɔ bar kä I-jëp, cuɛ rɔ ba̱r Ci-cɛ̈k kuäär I-jëp, cuɛ te kä I-jëp amäni lia̱a̱ Thɔ-lo-mon.
41
Täämɛ cua duɔth lätni Thɔ-lo-mon, kɛnɛ tin diaal tin cɛ la̱t, kɛ pɛlɛ, ɛ /ka̱nkɛ ku gɔ̱a̱r rɛy buɔk lätni Thɔ-lo-mon?
42
Kä cu pek gua̱th ëë ruac Thɔ-lo-mon jɛ ni I-thɛ-rɛl kɛɛliw kä Jɛ-ru-tha-lɛm a run ti jiɛn ŋuaan.
43
Kä cu Thɔ-lo-mon li̱w, kä cua jɛ kony däär wec gua̱n ni Dee-bid. Kä cu gatdɛ ni Rɛ-ɣɛ̈-bɔm ruec kɛ gua̱a̱thdɛ.
← Chapter 10
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 12 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22