Amos 3

Nuer Bible © Bible Society in South Sudan 1998,2012

← Chapter 2 Jump to: Chapter 4 →

1Liɛŋɛ thok ɛmɛ in lär Kuoth Nhial ɛ yɛ, lö ji̱ I-thɛ-rɛl, kɛ kui̱dun yɛn diaal tëë kämɛ raar rööl I-jëp wee i̱,

2“Rɛy dööri diaal wi̱i̱ muɔ̱ɔ̱n, cä ŋa̱c ni yɛ kärɔ̱, kɛ kui̱ ɛmɔ, bä yɛ luk kɛ dueerkun diaal.”

3/Ci nɛy da̱ŋ rɛw ja̱l dee mat, ɛ ni mi ŋa̱c kɛ rɔ̱?

4/Ci lony dee bur dɔɔr mi thilɛ le̱y mi kääpɛ? Kä /ci ruath lony dee bur mi thilɛ mi camɛ?

5/Ci dit dee rääp mi thilɛ dhuur mi ciɛ käp, kä /ci dhuur rɔ̱ dee kap nhial mi thilɛ mi cɛ käp.

6Thilɛ wec mi cua wiee köörɛ kɔŋ liŋ, kä /ci ji̱kɛ lo̱ckiɛn jiɛth. Thilɛ wec mi ci riɛkdɛ kɔn ben, ɛ ni mi ci Kuoth Nhial ɛ jäk kä thi̱n.

7Ɛpuc, thilɛ mi dee Kuäär ni Kuoth Nhial ɛ la̱t, ɛ ni mi cɛ ca̱pdɛ kɔŋ nyuɔ̱th kuaanykɛ ni go̱o̱k.

8Ci lony ku thuŋ bur! Ɛŋa mi /ci bi dual? Ci Kuäär ni Kuoth Nhial ku thuŋ ruac! Ɛŋa mi /ci bi la̱t ni ruaacni göökni?

9A liɛŋkɛ ɛ ji̱ ti̱ecni Ac-dod, kɛnɛ ji̱ ti̱ecni rööl I-jëp, kä jiökɛ kɛ i̱, “Ruɔlɛ rɔ̱ guäth kɛl päämni Tha-mɛ-ria. Kä bia nɛ̈nɛ rɔal mi di̱i̱t rɛydɛ, kɛnɛ nɛy ti̱n ca yɔŋ thi̱n.”

10Lar Kuoth Nhial ɛ i̱, “Kɛn kuɛ̱ckɛ la̱t cuŋni, kɛn nɛy ti̱n ca ti̱eckiɛn ti̱n di̱t pik kɛ pɛ̈c kɛnɛ ti̱n mackɛ.”

11Kɛ kui̱ ɛmɔ, ci kuäär ni Kuoth Nhial wee i̱, “Bi gua̱n tɛ̈r wec ɛmɔ go̱l, kä ba ti̱eckun ti̱n buɔ̱m buɔ̱ɔ̱m wuɔ̱l piny, kä ba kɛ war.”

12Ci Kuoth Nhial wee i̱, “Ce̱tkɛ min la yie̱e̱n deet a luäk ni ciök rɛw kiɛ ŋuɔk ji̱th thok luɔny, inɔ bä, bi kään ni nɛy ti tɔt kä gaat I-thɛ-rɛl ti̱n ciaŋkɛ Tha-mɛ-ria. Tin nyuur kɛ kɔamnikiɛn ti̱n puath puaath kɛnɛ dhaaŋnikiɛn ti̱n da̱p da̱a̱p.”

13Ci kuäär ni Kuoth Nhial in la Ruey Ɣɔaa ɛ lar, “Täämɛ liɛŋɛ nɛmɛ, kä latdɛ thuɔ̱k kɛ kui̱ dhɔaar Je-kɔb.

14Kɛ ɣöö cäŋ in wa̱a̱ I-thɛ-rɛl luk kɛ dueerkɛ, bä tuɔ̱ŋ yi̱kä to̱l kä piny kä Beth-ɛl a bɛ cu da̱k.

15Ɣän bä duel jiɔam kɛnɛ duel ma̱y däk amäni duel ti̱n ca biɛl kɛ guiy, kä bɛ cua̱ ria̱p duëli ti̱n di̱t bä,” ruac ni Kuoth Nhial.

← Chapter 2 Jump to: Chapter 4 →