Amos 9

Nuer Bible © Bible Society in South Sudan 1998,2012

← Chapter 8 Jump to:

1Cua Kuoth Nhial nɛn tëë cuŋä ge̱kä yi̱kä, laarɛ jɛ i̱, “Dua̱cɛ wuɔ̱th thieeri a bɛ ke̱ŋkiɛn lath, kä bä ti̱n ŋot kɛ tëk rɛydiɛn ben gi̱t köör, thilɛ ram kɛl mi bi rɔ bar, kä thilɛ mi bi kään.

2“Cäŋ bikɛ rɔ tɛ̈t ni jɔɔkni, ɛn wani bäkɛ wä ka̱n, cäŋ bikɛ kɔt ni puɔ̱rä, bäkɛ ka̱m piny ni thi̱n.

3Cäŋ bikɛ rɔ tɔ̱w ni nhial kä Kar-mɛl, bäkɛ war thi̱n kä bäkɛ ka̱n, kä cäŋ bikɛ rɔ̱ tɛ̱̈ɛ̱̈ waaŋdä ni lool bar, niɛ thɔ̱ŋ ɔ bä thɔ̱l in di̱i̱t jak kä käc kɛ.

4Kä cäŋ bi ji̱ tɛ̈riɛn kɛ naŋ ala pɛ̈ɛ̈c, niɛ thɔ̱ŋɔ, bä mut jak kä bɛ kɛ näk, bäkɛ ku ka̱m tiit kɛ ɣöö bäkɛ jak kä jiäk, ɛ /ci mɔ a mi gɔaa kɛ kui̱diɛn.”

5Jɛn Kuäär ni Kuoth, Kuoth in la Ruey Ɣɔaa, jɛn min thiap ni piny kä bɛ cu lath, kä bi ji̱kɛ diaal cu pa̱r, kä bi piny ɣönh nhial ce̱tkɛ muak kiɛr I-jëp kɛnɛ do̱ndɛ.

6Jɛn ram in ci päny duëëlɛ jak kä wi̱c muɔ̱ɔ̱n, kä cɛ gua̱a̱th cieeŋdɛ täth ni rööl nhial, jɛn ram in ruul pi̱ yieer, kä bɛ kɛ ben wuɔc raar wi̱i̱ muɔ̱ɔ̱n, ɛ jɛn min cɔal ciötdɛ i̱ Kuoth Nhial.

7Ci Kuoth Nhial ɛ lar i̱, “A /cikɛ yɛn ci cu ce̱tnikɛ ji̱ Kuc kɛ ɣä tɔ, yɛn ji̱ I-thɛ-rɛl?” “A /ciɛ ɣän ɛ nëë käm ji̱ I-thɛ-rɛl raar mun I-jëp, kä kamä ji̱ Pi-li-thɛt raar rööl Ku-riit kä kamä ji̱ Thi-ri-ya raar rööl Kir?

8Nɛnɛ jɛ waŋ kua̱r ni Kuoth Nhial a guic kuäärädun in jiääk, kä bɛ jɛ däk wi̱i̱ muɔ̱ɔ̱n, ɛ ni ɣöö /cä thok duëël Je-kɔb bi däk kɛ li̱w,” ruac ni Kuoth Nhial.

9“Kɛ ɣöö nɛnɛ jɛ, ɣän bä ruac jäkä raar i̱, ba thok duëël I-thɛ-rɛl lath rɛy dööri diaal, ce̱tkɛ bɛl ti ciɛ̈thkɛ rɛy pätdä, kä /ci waŋ kɛl bi pɛn piny thi̱n baaŋ.

10Kä bi ji̱ dueeri diaal kä nɛɛkä, kɛn ti̱n larkɛ jɛ i̱, ‘/Ci da̱k nɛy bi jek kiɛ /cɛ bi röm kɛ kɔ li̱w köör.’ ”

11Ci Kuoth Nhial ɛ lar i̱, “Ɛn cäŋ ɛmɔ, bä bi̱lɛ Dee-bid in ci ria̱p cuŋ, kä bä kuiilkɛ diaal buɔt, kä bä pa̱nykɛ cuɔ̱ŋ, kä bä jɛ nyɔk kɛ lätni nikɛ ta̱a̱dɛ mëë walkä.

12Kɛ ɣöö deekɛ duɔth muɔ̱ɔ̱n Ɛ-dɔm ka̱n, amäni döör diaal tëë ca kɔŋ ciöl ɣä,” ci Kuoth Nhial in bi jɛ jak kä tuɔɔk ɛ lar inɔ.

13Ci Kuoth Nhial ɛ lar i̱, “Nɛnɛ jɛ, ni̱ni tia̱ beenä, bi puur kakä, ŋeer bɛɛl cop, kä bi nyio̱o̱p dɛɛni wal, pi̱i̱thdiɛn cop, kä bi pääm diaal wuɔ̱th kɛ kɔaŋ mi kɛc kɛc, a bɛ lo̱o̱ny rɛy päämni.

14Kä bä nɛɛkä ni ji̱ I-thɛ-rɛl diaal tëë la pɛ̈ɛ̈c luɔ̱c wecdiɛn, kä bikɛ rɛ̈kiɛn ti̱n ci da̱k ben nyɔk kɛ ta̱th, kä bikɛ cu nyuur thi̱n, bikɛ ka̱a̱k walkiɛn kɛ kui̱ kɔaŋ cu pith, kä bikɛ dɛykiɛn cu cam, kä bikɛ kɔaŋdiɛn cu math.

15Kä bä nɛɛkä cu la̱th muun ëë cä ka̱m kɛ, kä /ca kɛ bi lɛ nyɔk kɛ pëc thi̱n,” ruac ni Kuoth Nhial ni Kuothdun.

← Chapter 8 Jump to: