Deuteronomy 19

Nuer Bible © Bible Society in South Sudan 1998,2012

← Chapter 18 Jump to: Chapter 20 →

1“Mi wä Kuoth Nhial Kuothdun dör tin bɛ yɛ wä ka̱m wi̱i̱kiɛn kɛnɛ ti̱eckiɛn, tin bia wä cieŋ thi̱n wä näk,

2lɛyɛ wi̱i̱ da̱ŋ diɔ̱k muun in ci Kuoth Nhial Kuothdun ɛ ka̱m yɛ i̱ bia ciɛŋ.

3La̱t ɛ kɛ kä dup, kä da̱a̱kɛ jɛ kä diɔ̱ɔ̱k ɛn mun in ci Kuoth Nhial Kuothdun ɛ ka̱m yɛ ala gua̱a̱th cieŋä, kɛ ɣöö bi ram mi ci raan näk rɔ bar thi̱n.

4“Nɛmɛ ɛ ŋut kɛ kui̱ raam mi ci raan näk, mi bi tëkdɛ lëny thi̱n. Mi ci raan raan näk kɛ guäc, kä thilɛ kɛ thok juacä ni wen.

5Ce̱tkɛ kɛ mi ci raan wä jɔp kɛ jiɛn rɛy ruɔ̱ɔ̱p kɛn gua̱n thieekädɛ, mi cɛ wee yɔ̱ɔ̱tdɛ jiath, kä ci jio̱p rɔɔdɛ kui̱th, a cɛ gua̱n thieekädɛ wä näk, ɛn ram ɛ mɔ derɛ tëkdɛ lëny wi̱c kɛl kä wi̱i̱ tɔ̱tɔ̱.

6Kɛ kɛ̈c lɔaac däman ran, ɛ bɛ ram in näk raan guɔ̱ɔ̱r, kä cɛ ro̱ŋ kɛ ɣöö dëë näk, kɛ ɣöö thilɛ kɛ thok juacä kɛn gua̱n thieekädɛ.

7Kɛ kui̱ ɛmɔ la̱rä jɛ yɛ, muɔcɛ rɔ kɛ wi̱i̱ da̱ŋ diɔ̱k.

8Kä mi wä Kuoth Nhial Kuothdun wi̱i̱kun wä rep ce̱tkɛ mëë cɛ ya̱c guurikun, a bɛ yɛ ka̱m mun kɛɛliw mëë cɛ lari bɛ ka̱m guurikun,

9(mi wä yɛn luëëk ti diaal ɛ ti wä tit, ti la̱tdä yɛ ti walɛ, kɛ nhökdun kɛ Kuoth Nhial Kuothdun, kɛnɛ lätnidun kɛ dupkɛ) in ɔ bia wi̱i̱ da̱ŋ diɔ̱k ti kɔ̱kiɛn mat wi̱i̱ni da̱ŋ diɔ̱k tin wen,

10la̱tdɛ jɛ kɛ ɣöö ca riɛm raam mi thil duer bi wuɔ̱th piny baaŋ muundun in ci Kuoth Nhial Kuothdun ɛ ka̱m yɛ i̱ bia ciɛŋ, inɔ /cia bi lɛ tekɛ duer kɛ wuth riɛm piny.

11“Kä mi nyiir raan gua̱n thieekädɛ, a bɛ jɛ ka̱c kac, kä bɛ jɛ mak a bɛ jɛ näk, mi cɛ rɔ bar wi̱c kɛl kä wi̱i̱ ɛ tɔ̱,

12bi bööth wecdɛ raan ja̱k, ba jɛ wä nööŋ ɛn wi̱ni, ba jɛ ka̱m ram in cɛ raandɛ näk, kä bɛ jɛ näk.

13Ɛ waŋdun ci gɔaa kɛ jɛ, bia duer wuthä riɛm piny baaŋ woc kä I-thɛ-rɛl, bɛ cu gɔaa kɛ yɛ.

14“Rɛy muɔ̱ɔ̱ndun in bia ka̱n in ba ka̱m yɛ ɛ Kuoth Nhial Kuothdun i̱ bia ciɛŋ, cu keydun ɣöth yɛnɛ gua̱n thieekädu min ca lätkä yɛ ɛ naath.”

15“Thilɛ nën raam kɛl mi ba gua̱ndɛ lar i̱ tëë kɛ dueer ti cɛ la̱t a cäŋ ɛ kueth. Ɛ ni nën nɛɛni da̱ŋ rɛw kiɛ diɔ̱k, ɛ jɛn ba lukɔ.

16Kä mi ɛ gua̱n la̱a̱t jiäkni ciɛ lar ɔ i̱ cɛ raan nɛn lätdɛ mi jiääk,

17ba kɛn kui̱ da̱ŋ rɛw nööŋ guäth palä, nhiam bööth palä kɛnɛ kua̱r luɔ̱k tin te wi̱i̱ kɔam ɛ ni̱ni tɔ̱tɔ̱.

18Bi kua̱r ɛ go̱r agɔaa, kä mi neen duundɛ ɛ nën kacä, a cäkɛ ni däman lätikä,

19bia jɛ lät kä min go̱o̱rɛ i̱ dëë lät kä däman. Inɔ bia duer woc rɛydun.

20Bi duɔth nath ɛ liŋ, kä bikɛ dual, ca mi jiääk mi ce̱tkɛ nɛmɛ bi mät nyɔk kɛ lätni rɛydun.

21/Cuarɛ waŋ mi gɔaa nyoth. Kɛ ɣöö ɛ tëk kɛnɛ tëk, waŋ kɛ waŋ, ley kɛ ley, tet kɛ tet, ciök kɛ ciök.”

← Chapter 18 Jump to: Chapter 20 →