Genesis 38

Nuer Bible © Bible Society in South Sudan 1998,2012

← Chapter 37 Jump to: Chapter 39 →

1Ni kɛ jɛn gua̱a̱th ɛmɔ cu Juda rɔ koc kä dämani kä cuɛ rɔ na̱a̱n kɛ kɛ. Täämɛ Juda tëë kɛ wut mi määthdɛ rɛy wec Ä-du-lam, jɛn wut ɛmɔ cɔal ciötdɛ i̱ Ira. Ɛn guäth ɛmɔ mëë ci Juda dämani ba̱ny piny, jɛn cuɛ ben cieŋ kɛɛl kɛnɛ jɛn wut ɛmɔ.

2Cuɛ lɛ tekɛ wut rööl Kɛ-naan mi cieŋ ɛn wi̱ni bä, wut ɛmɔ cɔal ciötdɛ i̱ Cuä. Kä ci ɛn tëë kɛ nyaadɛ. Mëë ci Juda nyam ɛmɔ nɛn, cuɛ jɛ kuɛn kä cuɛ la ciekdɛ.

3Kä mëë ci ciekdɛ ruët, cuɛ dap kɛ dho̱o̱l kä cu gua̱n ciötdɛ cak, kä cua jɛ cɔl i̱ Ër.

4Kä mëë cɛ rɔ nyɔk kɛ ruët, cuɛ lɛni dap kɛ dho̱o̱l kä cu man ciötdɛ cak, kä cuɛ wee ba jɛ cɔl i̱ O-nan.

5Kä mëë tekɛ dhɔɔr mi cɔal i̱ Kɛ-dhib cu ciekdɛ dho̱o̱l dɔ̱diɛn lɛni dap, kä cu man ciötdɛ lɛni cak, kä cuɛ wee ba jɛ cɔl i̱ Cɛla.

6Täämɛ mëë ci gua̱a̱th in dëë kuɛɛn kɛ gatdɛ min kɛ̱̈ɛ̱̈ ni Ër cop, cu Juda jɛ kuën ciek mi cɔal i̱ Ta-mar.

7Kä mëë ci Kuoth Nhial Ër nɛn a tëë kɛ ciɛŋ ti nyuɔn nyuɔɔn, cuɛ jɛ näk.

8Kä mëë ci Ër li̱w, cu Juda O-nan jiök i̱, “Läthni ciek dämuɔɔr due̱e̱l kä di̱ethni dämuɔɔr gaat.”

9Kä nɛ̈nɛ jɛ, mëë wä O-nan tɔ̱ɔ̱c kɛnɛ ciek däman, la wocɛ ti̱eydɛ piny kɛ ɣöö tiilɛ ɣöö de̱rɛ gaat ti /ca bi ciöl jɛ di̱eth kɛ kui̱ däman.

10Kä cu Kuoth Nhial min cɛ la̱t lok, kä kɛ kui̱ ɛmɔ cuɛ jɛ lɛni näk bä.

11Min ci Juda jɛ guic, cuɛ Ta-mar min mɔ ciek gatdɛ jiök i̱, “Locni dhɔɔr guur, kä teni ɛn wani amäni mi wä gatdä ni Cɛla di̱t.” Cɛ mɛmɛ la̱t inɔ kɛ ɣöö luthɛ ni ɣöö dɔ̱ŋ ba Cɛla lɛni näk bä. Inɔ cu Ta-mar loc dhɔɔr gua̱n.

12Kä mëë ci ni̱n lɛ wä nhiam, cu Juda ciekdɛ li̱w. Mëë ci ni̱n tëë paarkɛ ni jɛ thuuk, cu Juda wä wi̱c mi cɔal i̱ Tim-naa kɛɛl kɛnɛ määthdɛ ni Ira. Wec ɛmɔ ɛ jɛn gua̱a̱th in la tëmkɛ mi̱em de̱e̱tkɛ thi̱n.

13Kä mëë ca jɛ wä la̱r Ta-mar ɛn ɣöö guuthu wëë Tim-naa kɛ ɣöö bɛ mi̱em de̱e̱tkɛ wä tëm thi̱n,

14jɛn, mëë cɛ mɔmɔ liŋ, cuɛ bieyni mään jɔɔkni wäny kä cuɛ rɔ ruk kɛ bieyni lëëri, kä cuɛ wi̱cdɛ bur kɛ bi̱i̱, kä cuɛ wä nyuur thok duɔ̱p in wä wi̱c in cɔal i̱ Ee-na-yim in te dup in la wee naath Tim-naa. Lätdɛ mɛmɛ kɛ ɣöö ŋäcɛ jɛ ɛn ɣöö ci Cɛla thuɔ̱k kɛ pi̱eth kä ŋotdɛ kɛ mi /ca jɛ tho̱p jɛ ala ciekdɛ.

15Mëë ci Juda ben rët kɛ jɛn gua̱a̱th ɛmɔ, cuɛ jɛ nɛn nyuurä, kä cuɛ ŋa̱c ni ɣöö ɛ riär kɛ ɣöö cɛ wi̱cdɛ bur kɛ bi̱i̱.

16Kä ŋotdɛ /ke̱nɛ jɛ ni ŋa̱c ɛn ɣöö ɛ jɛn ciek gatdɛ ɛnɛ, inɔ cuɛ cu wä kä jɛ guäthdɛ min tëë thi̱n, kä cuɛ jɛ wä jiök i̱, “Bër, ɣän cä ji̱ nhɔk kä göörä ji̱ täämɛ.” Cu nyam indaan jɛ thi̱ec i̱, “Ji̱n bi ɣä ka̱m ŋu?”

17Cuɛ jɛ loc i̱, “Ɣän bä ji̱ ka̱m dɔdɛ̈ɛ̈l böwä.” Kä cu nyam indaan ɛ thi̱ec i̱, “Ji̱n tëë kɛ nyuuth mi thuɔ̱k mi bi ba̱ny te̱tädä amäni mi wi̱i̱ dɔdɛ̈ɛ̈l wä nöŋä?”

18Cuɛ nyam indaan thi̱ec i̱, “Ɛ nyuuth mi ce̱tkɛ ŋu mi dëë ka̱m ji̱.” Kä cuɛ jɛ loc i̱, “Kämni ɣä kaatimdu kɛnɛ la̱a̱k kɛ kɛɛt ɛ te te̱tädu mɔ.” Ɛ jɛ nɔ, cu Juda kɛ cu ka̱m jɛ, kä cuɛ jɛ la̱th duëël, kä cuɛ jɛ ruët.

19Min ci Juda cu jiɛɛn, cu Ta-mar jiɛɛn bä, kä cuɛ bi̱i̱ nhiamdɛ woc kä cuɛ rɔ nyɔk kɛ ruk kɛ bieyni mään jɔɔkni.

20Kɛ gua̱a̱th ɛmɔ mëë ci Juda cop wi̱c, cuɛ määthdɛ ni Ira ja̱k kɛ ɣöö bɛ dɔdɛ̈ɛ̈l naŋ kä ba tëë cɛ ba̱ny ciek ben luɔ̱c jɛ. Kä Ira /ke̱nɛ ciek ɛmɔ ben jek.

21Min /ke̱nɛ jɛ jek, cuɛ nɛy tin te kä Ee-na-yim thi̱ec i̱, “Jɛn a ni ɛn riär ëë te gekä duɔ̱p wanɛ mɛ?” Cukɛ jɛ loc i̱, “Thilɛ riär mi ci me̱t te ɛn wanɛ.”

22Min cɛ mɛmɛ liŋ, cuɛ loc kä Juda kä cuɛ jɛ wä jiök i̱, “Ɣän /ka̱n ciek ɛmɔ jek, kä cä ji̱ dhɔaariɛn thi̱ec, cikɛ ɣä jiök i̱, ‘Thilɛ riär mi ci me̱t te ɛn wanɛ.’ ”

23Kä cu Juda jɛ jiök i̱, “Akɛ tekɛ jɛ, kɛ ɣöö /canɛ bi̱lɛ tekɛ buar, ɛpuc cä jɛ dhil nöŋ dɔdɛ̈ɛ̈l kɛ ɣöö dëë jɛ ka̱m pe̱k ko̱kädɛ, kä ci dha̱l kɛ ɣöö bi jɛ jek.”

24Täämɛ mëë ci ruac ɛmɔ tekɛ päth da̱ŋ diɔ̱k, cua Juda ben jiök i̱, “Ta-mar, ciek gatdu, cɛ rɔ jak kä le̱r, kä kɛ kui̱ ɛmɔ täämɛ jɛn ruëtdɛ.” Ɛ jɛn cu Juda naath cu giɛk laarɛ jɛ i̱, “Nööŋɛ jɛ raar kä a jɛ waŋkɛ kɛ mac.”

25Kä inɔ, min nööŋkɛ jɛ raar cu Ta-mar kuak tëë kɔŋ jäk kä gua̱nthudɛ, laarɛ jɛ i̱, “Ruëtdä gua̱n kuakni ti̱ti̱. Kɛ gɔɔy lɔacdu carkɛ mi bi tekɛ ŋäc kɛ gua̱n kaatimä ɛmɛ kɛnɛ la̱a̱k kɛ kɛɛt ɛmɛ.”

26Min ci Juda kɛ nɛn, cuɛ kɛ ŋic, kä cuɛ wee i̱, “Ɛ cuɔ̱ɔ̱ŋdɛ, kä ɛ duerä ɛn ɣöö /ka̱n jɛ jak kä ciek gatdä ni Cɛla.” Kä ɛn guäth ɛmɔ /ke̱nɛ rɔ nyɔk kɛ nien kɛɛl kɛ jɛ.

27Täämɛ, mëë ci gua̱a̱th in dap kɛ jɛ cop, cuɛ dap kɛ cuɛ̈ɛ̈k.

28Guäth ëë tëë kɛ mäc cu tet gatdä kɛl ben raar, cu ciek in gääm jɛ käp kä cuɛ jɛ yiën lath mi lual, laarɛ jɛ i̱, “Mɛmɛ ɛ böth.”

29Kä duundɛ ɣöö gat ɛmɔ cuɛ tetdɛ nyɔk kɛ yuth jɔk kä cu däman ben raar kɛ nhiam, kä cu gääm wee i̱, “Kua jɛn tölu raar ɛnɛ.” Inɔ, cua ciötdɛ cu cɔl i̱ Pɛ-rɛdh.

30Kɛ kɔrɛ cua däman in te tetdɛ kɛ lath dap, kä cua ciötdɛ cɔl i̱ Dhɛra.

← Chapter 37 Jump to: Chapter 39 →