Haggai 1

Nuer Bible © Bible Society in South Sudan 1998,2012

Jump to: Chapter 2 →

1Runä min rɛwdɛ guäth ëë la Dɔr-ya-wɛc a kuäär in di̱i̱t ro̱o̱l Pɛ-re-thia, kɛ cäŋ in jio̱l kä pay bäkɛl (Kornyot), cu Kuoth Nhial ruac kɛ thok go̱kä mi cɔal i̱ Ɣa-gay. Kɛ ruac mi no̱pɛ kuäär Juda ni Dhɛ-ru-ba-bɛl gat Cal-ti-ɛl, kɛnɛ bo̱o̱th palä in di̱i̱t ni Jɔ-cua gat Yɛ-ɣo-dha-dak, cuɛ wee i̱,

2“Ci Kuoth Nhial in la Ruey Ɣɔaa ɛ lar i̱ kɛn nɛy ti̱ti̱ larkɛ jɛ i̱ ŋot gua̱a̱th in dëë nyɔk ni ta̱th luaak Kuɔth in di̱i̱t.”

3Kɛ kui̱ ɛmɔ, cuɛ gök ni Ɣa-gay ku jäk kä naath jio̱kɛ kɛ i̱,

4“Yɛn nɛɛkä, ɛ thuɔ̱k ɛn ɣöö dërɛ cieŋ duëli ti da̱pda̱a̱p guäth in te luaakdä riäpä!

5Kɛ kui̱ ɛmɔ, jio̱k Kuoth Nhial yɛ i̱, carɛ min la̱tdɛ agɔaa.

6Yɛn piɛthɛ be̱e̱l mi duŋ di̱i̱t kä ciɛ̈cɛ ni ti tɔt. Mi̱ethɛ kä /cia riäŋ, ma̱thɛ kä /cia kayŋua̱a̱k, ruɔnyɛ rɔ̱ kɛ bieyni kä /ci pua̱nykun rɔ̱ nyäk kɛ muɔr, kä kääp raan yio̱w la̱t ti pikɛ ki̱eth mi ci wuɔ̱th.”

7“Inɔ ci Kuoth Nhial in la Ruey Ɣɔaa ɛ lar i̱, carɛ min la̱tdɛ agɔaa.

8Kɔatdɛ päm wiaa jɔapɛ jiɛn bia luaakdä ben täth, a dee lɔcdä cu tɛ̈th, kɛnɛ ɣöö dëë cu jɔɔc rɛy wutädä.

9Mëë ŋa̱thɛ ni ti ŋuan nɛ̈nɛ jɛ cikɛ ben a ti tɔt. Kä min cia kɛ nööŋ ciëëŋni, cä kɛ ben nyäk. Ɛ ɣöö di? Laarä jɛ i̱ ɛ kui̱ luaakdä in te riäpä kä yɛn ci lo̱ckun ruey lät, tit ram ɔ ni cieeŋdɛ kärɔa.

10Kɛ kui̱ ɛmɔ, ci ɣɔw thil nhiaal, kä ci mun riɔw.

11Cä wi̱c muɔ̱ɔ̱n kuer rɛ̈ɛ̈th, kɛnɛ pääm, kɛ ka̱a̱k bɛɛl, kɛnɛ ka̱a̱k dɛɛni wal, amäni ni ŋɔak diaal kɔ̱kiɛn ti ciɛk muun, kɛ naath kɛnɛ ɣɔ̱k, amäni lätkiɛn diaal.”

12Ɛ jɛn, cu Dhɛ-ru-ba-bɛl gat Cal-ti-ɛl kɛnɛ Jɔ-cua gat Yo-dha-dak, amäni duɔth nɛɛni diaal tëë luny jɔk ro̱o̱l pe̱cä tëë /ken ruac Kuɔthdiɛn ni Kuoth Nhial liŋ. Cukɛ dual kä cukɛ ruac go̱kä ni Ɣa-gay in ca ja̱k ɛ Kuoth Nhial nhɔk.

13Ɛ jɛn, cu Ɣa-gay kɛ ku la̱t nöp Kuɔth Nhial wëë i̱, “Ci Kuoth Nhial ɛ lar i̱ ɣän a yɛ kɛɛl.”

14Kä cu Kuoth Nhial Dhɛ-ru-ba-bɛl gat Cal-ti-ɛl in la kuäär Juda ku jak kä cär kɛnɛ Jɔ-cua gat Yɛ-ɣo-dha-dak in la bööth palä min di̱t, kɛ duɔth nɛɛni diaal tëë luny jɔk ro̱o̱l pe̱cä, kä cukɛ ben, kä cukɛ la̱t luaak Kuɔth Nhial in la Ruey Ɣɔaa ni Kuothdiɛn yiath piny.

15Kɛ cäŋ kä jiɛn rɛw wi̱cdɛ ŋuaan kä pay bäkɛl (Kornyot).

Jump to: Chapter 2 →