Haggai 2

Nuer Bible © Bible Society in South Sudan 1998,2012

← Chapter 1 Jump to:

1Kɛ rɛw runä mëë Dɔr-ya-wɛc ɛ kuäär in di̱i̱t kɛ cäŋ kä jiɛn da̱ŋ rɛw wi̱cdɛ kɛl kä pay bärɔw (pay Yi̱etni), cu Kuoth Nhial rɔ nyɔk kɛ ruac kɛ gök ni Ɣa-gay wëë i̱,

2“Täämɛ, ruacni kɛ Dhɛ-ru-ba-bɛl gat Cɛ-ɛ̈l-ti-el in la kuäär Juda, kɛnɛ Jɔ-cua gat Yɛ-ɣo-dha-dak bööth palä min di̱t, matdiɛn amäni ni kɛn duɔth nɛɛni tëë luny jɔk ro̱o̱l pe̱cä, kä jio̱kni kɛ i̱,

3‘Ɛ ŋaadun ci ŋot te̱e̱kä rɛydun ɔ kä nɛy tëë ca luak ɛmɛ kɔŋ nɛn kɛ maandɛ mëë walkä? Kä guɛcɛ jɛ i̱di täämɛ? Cɛ ce̱tkɛ thil kä duɔ̱ɔ̱r waaŋdun?

4Kä täämɛ, cu lɛ dual, lö Dhɛ-ru-ba-bɛl ci Kuoth Nhial ɛ lar, kä bum lɔcdu, lö Jɔ-cua gat Yɛ-ɣo-dha-dak bööth palä in di̱t, kä yɛn ji̱ wec diaal a lo̱ckun bum, kä la̱tdɛ kɛ ɣöö ɣän ta̱a̱ kɛɛl kɛ yɛ, lar ɛ Kuoth Nhial in la Ruey Ɣɔaa,

5nikɛ ruac ëë cä mat kɛ yɛ mëë biaa raar ro̱o̱l I-jëp ɛn ɣöö bi yiëëdä te rɛydun, /cuarɛ lɛ dual.

6Kɛ ɣöö ci Kuoth Nhial in la Ruey Ɣɔaa ɛ lar i̱.’ ” Kɛ gua̱a̱th mi thia̱k ɛlɔ̱ŋ, ɣän bä nhial kɛnɛ piny, kɛ kuër kɛ bar moc lath,

7kä bä dör diaal kuer lath kɛɛl kɛ kɛ, kɛ ɣöö ba kuakiɛn diaal nöŋ ɣä kä bä luak ɛmɛ pik kɛ ti gɔw.

8Lar Kuoth Nhial in la Ruey Ɣɔaa ɛ i̱, ciɛk in bo̱r kɛnɛ da̱a̱p rɛy ɣɔaa kɛ nyinkä.

9Luak ɛ jɔak ɛmɛ bi di̱t ni gɔɔydɛ kä mëë jio̱l. Kä bä nɛɛkä cu ka̱m mal ɛn wanɛ ɛ. Ci Kuoth Nhial in la Ruey Ɣɔaa ɛ ri̱t.

10Kɛ cäŋ kä jiɛn rɛw wi̱cdɛ ŋuaan kä pay bäŋuan, kɛ ruɔ̱n in rɛwdɛ kuäärä Dɔr-ya-wɛc, cu Kuoth Nhial rɔ nyɔk kɛ ruac kɛ thok go̱kä ni Ɣa-gay wëë i̱,

11“Wër kä thi̱ec bööth palä kɛ luɔt kä thiecä kɛ ŋuɔ̱t i̱,

12‘Carɛ jɛ, ɛŋu mi dee tuɔɔk mi ci raan ri̱ŋ mi ca lëy Kuoth yian thok bieydɛ kä bɛ jiɛɛn bɛ mi̱eth mi tëë wa̱nɛ mɔ wä yiny kɛ jɛ, kuän, kiɛ kɔaŋ, kiɛ liɛɛth Ɔ-lip, kiɛ mi̱eth dɔ̱diɛn kä mi̱th, ɛn wanɛ ɔ, de̱rɛ mi̱eth ɛmɔ jak kä lɛy lɛy bä?’ ” Mëë cɛ thi̱ec, cu bööth palä jɛ loc i̱, “Ëëy.”

13Ɛ jɛn cu Ɣa-gay kɛ lɛni thi̱ec i̱, “Kä carɛ jɛ i̱ dee ram mi ci puɔ̱nydɛ ya̱r kɛ thiëp pua̱a̱ny raam mi ci li̱w mi̱th tɔ̱tɔ̱ ya̱r bä?” Cua jɛ loc ɛ kɛn i̱, “Derɛ kɛ ya̱r bä.”

14Cu Ɣa-gay ku wee i̱, “Ci Kuoth Nhial ɛ lar i̱ nɔmɔ ɛ kɛl kɛnɛ mɔ bi tuɔɔk ɔ kä nɛy tin te do̱o̱r ɛmɛ amäni tin la̱tkɛ ɛ kɛn kɛ te̱tkiɛn. Inɔ a amäni ni tin thöpkɛ wi̱i̱ yi̱kä bikɛ la ti ca ya̱r.”

15Täämɛ, carɛ nɛmɛ rɛydɛ agɔaa ɛn wa̱lɛ amäni cäŋ i̱ bëë nhiam i̱ kä carɛ tëë ci tuɔɔk a /ka̱n ta̱th luaak Kuɔth Nhial ni tok.

16Ce̱tkɛ min la raan wëë ŋɛɛrɛ diënyni ti jiɛn rɛw kä bɛ wä je̱k ni jiath kɛl thi̱n. Ce̱tkɛ mi lät raan kɔaŋ mi dee dha̱a̱ri ti jiɛn dhie̱e̱c thiäŋ, kä bɛ wä jek ni jiɛn da̱ŋ rɛw.

17Cä yɛ riäth kɛ jua̱th kä cä bɛlkun kuer dua̱ŋ kɛnɛ thul guiiyni nhial, kä /ŋuɔtdɛ cia ni luny kä ɣä, ɛ Kuoth Nhial inɔ.

18Kua nɛmɛ tit agɔaa niɛ wa̱lɛ mi a wä nhiam, nikɛ cäŋ ɛ ca thuuk ni yiɛth luaak Kuɔth in di̱i̱t piny ɛ, kɛ jɛn cäŋ kä jiɛn rɛw wi̱cdɛ ŋuaan kä pay bäŋuan ɛmɛ (pay Yi̱etni), tiɛtdɛ mɔ bi tuɔɔk ɔ.

19Cäŋ thilɛ kuay bɛɛl ti ŋot wan ɔ kä /ke̱n naywali kɛnɛ ŋɔ̱p kɛ buɔ̱w amäni jiath Ɔ-lip kuer kɛ dɛy ti ŋuan, ɣän bä yɛ poth.

20Nikɛ jɛn cäŋ ɛmɔ pa̱ny, jɛn cäŋ kä jiɛn da̱ŋ rɛw wi̱cdɛ ŋuaan kä pay cu Kuoth Nhial ruac nyɔk kɛ jäkni kɛ Ɣa-gay

21kä Dhɛ-ru-ba-bɛl kuäär Juda wëë i̱, “Täämɛ min göörä ɛ ɣöö bä nhial kɛnɛ piny moc lath,

22kä bä kuäär kua̱ri woc, kä bä lua̱ŋdiɛn moc pe̱k. Bä thurbiɛɛli ko̱o̱r buɔ̱p kɛnɛ ji̱kiɛn. Bi jio̱o̱k tuɔ̱ruɔ̱k li̱w kä bi ji̱kiɛn rɔ̱ cɔ̱k.

23Ɛn cäŋ ɛmɔ, bi̱i̱ naŋ, lö kuanydä ni Dhɛ-ru-ba-bɛl. Kä bi̱i̱ ka̱m ruëc kɛ ciötdä kɛ ɣöö ɛ ji̱n raandä min cä mɛk.” Lar ɛ Kuoth Nhial in le̱ny buɔ̱mdɛ ti diaal.

← Chapter 1 Jump to: