Malachi 1

Nuer Bible © Bible Society in South Sudan 1998,2012

Jump to: Chapter 2 →

1Nɛmɛ ɛ ruac Kuɔth Nhial min cɛ ka̱m Mɛ̈l-a-ki kɛ kui̱ ji̱ I-thɛ-rɛl.

2Kä cu Kuoth Nhial nɛɛkɛ jiök i̱, “Ɣän nhɔakä yɛ” kä cuarɛ loc i̱, “Kä nhɔki kɔ i̱di?” Kä cu Kuoth Nhial wee i̱, “E-thɔ /ciɛ däman Je-kɔb?” Kä cua nhɔk ni Je-kɔb,

3kä cua E-thɔ lo̱k. Kä cua wec päämnidɛ däk, cua mundɛ jak kä gua̱a̱th leeyni dɔaar.

4Kä dɔ̱ŋ dee ji̱ Ɛ-dɔm wee i̱, “Cäŋ ni mi ca nɛy däk ɛ, bakɔ kɛ nyɔk kɛ lätni.” Kä bi Kuoth Nhial in la Ruey Ɣɔaa ɛ loc i̱, “Dɔ̱ŋ deekɛ jɛ la̱t, duundɛ ɣöö bäkɛ da̱k piny, amäni mi cakɛ cɔl i̱ wec gua̱n jiäkni, nɛy ti ci Kuoth Nhial gaak kɛ kɛ amäni cäŋ kɛl.”

5Kä bia jɛ nɛn kɛ nyinkun, kä bia wee i̱, “Kuoth Nhial di̱tdɛ, kɛ ɣɔw kɛɛliw!”

6Kä cu Kuoth Nhial in la Ruey Ɣɔaa in leny buɔ̱mdɛ ti diaal bööth palä jiök i̱, “La gat gua̱n a luth, kä la läät kuäärɛ a luth. Kä mi ɛ ɣän gua̱n nath luthdä kula nikä? Kä mi ɛ ɣän kuäär, luthdä kula nikä? Cia ciötdä yia̱r, kä laar yɛnɛ i̱, ‘Cakɔ ciötdu yia̱r i̱di?’

7Kɛ ɣöö cia muc mi jiääk thöp wi̱i̱ yi̱kädä cuarɛ wee i̱, ‘Ca̱kɔ yia̱r i̱di?’ Kä laar yɛnɛ yi̱k Kuɔth dëë yia̱r.

8Kä mi thöpɛ ley mi cɔr ala muc, caar yɛnɛ /ciɛ mi jiääk? Kä mi thöpɛ mi ŋɔl kiɛ mi tëë jɔk /ciɛ duer bä? Ɣɔ̱a̱nɛ jɛ kɛ tho̱p rueecdun, mi bi lɔcdɛ gɔaa kɛ yɛ? Ruacni Kuoth Nhial in la Ruey Ɣɔaa in leny buɔ̱mdɛ ti diaal.”

9Kä täämɛ thiecɛ Kuoth, dɔ̱ŋ bɛ gɔaa kɛ kɔn. Kä kɛ muc tɔ̱tɔ̱ derɛ raan nhɔk kä yɛ? Ruac ni ɣän Kuoth Nhial in la Ruey Ɣɔaa.

10Kä cu Kuoth Nhial in la Ruey Ɣɔaa wëë i̱, “Thilɛ ram kɛl mi dee thiekni luaak mal gäk, kɛ ɣöö /cia mac ɛ jiääk ɛ mɔ dee lɛ dɔp wi̱i̱ yi̱kädä! /Ci lɔcdä tɛth kɛ yɛ, kä thilɛ muc mi bä nhɔk kä yɛ.

11Kä bi ciötdä di̱t rɛy dööri, a känɛ kä käny ca̱ŋ a wä nikä kony ca̱ŋ. Kä ba wal tin kuɔ̱r kuɔ̱ɔ̱r kɛnɛ muc ti kök köök nööŋ kɛ kui̱dä gua̱thni diaal. Kɛ ɣöö di̱t ciötdä rɛy dööri.

12Kä bia tharbët Kuɔth Nhial yia̱r kɛ tho̱pdun kɛ mi̱eth mi jiääk thi̱n.

13Kä bia wee i̱, ‘Ɛ cuɔ̱c ŋukä ɛn nɛ,’ kä bia wuɔ̱thkun kap nhial kɛ ɣä, ruac ni ɣän Kuoth Nhial in la Ruey Ɣɔaa. Kä tho̱p yɛn ni mi mackɛ ni jɛ kɛnɛ mi ŋɔl kɛ cɔr kɛ mi tekɛ jɔk ala muc! Dëë kulɛ nhɔk tetnikun i̱di? Ruac ni ɣän Kuoth Nhial.

14Kuëth akɛ ram mi te rɛy deetkɛ kɛ thäk dɛ̈ɛ̈l mi cɛ lar i̱ bɛ thöp, kä bɛ wä thöp ni ɣä mi ŋɔl. Kä ɛ ɣän Kuäär mi di̱i̱t, ruac ni ɣän Kuoth Nhial in la Ruey Ɣɔaa, kä luɔ̱thkɛ ciötdä rɛy dööri.

Jump to: Chapter 2 →