Micah 7

Nuer Bible © Bible Society in South Sudan 1998,2012

← Chapter 6 Jump to:

1Riɛk akɛ ɣä! Kɛ ɣöö cä ce̱tkɛ ram mi ruul dɛy jiɛɛn kɛ mey, rɛy kakä, a cɛ cu thil dɔw mi dëë cam, a cäŋɛ ni dɛy ŋɔ̱a̱p tin ciɛk, kɛ nhiam tin go̱o̱r lɔcdä kɛ.

2Kä ca nɛɛ Kuɔth tɛŋ wi̱i̱ muɔ̱ɔ̱n, a cɛ cu thil gua̱n cuŋni kɛl rɛy nath. Kɛn diaal liɛpkɛ ni ɣöö ba raan näk a dɛɛp ramɔ däman kɛ cambak.

3Kä lät kɛn ni ti jiäk. Kä thieec bööth kɛnɛ rueec ni kök, kä nɛy tin tekɛ buɔ̱m ka̱nkɛ min go̱o̱r kɛnɛ, inɔ bikɛ cu la̱t kɛɛl.

4Kä ram in gɔaa ni jɛn kä kɛ ce̱tdɛ nikɛ thilɛ. Kä gua̱n cuŋni kä kɛ ce̱tdɛ nikɛ kuɔɔk kɛ muɔth. Ɛn täämɛ ci cäŋ in ba duäc ni nɛɛku, cäŋ bɛcädiɛn cɛ cop.

5/Cu gua̱n thieekädu ŋäth, kä /cu lɔcdu lät määthdu. Kä tit ruacdu kɛ ciek in tɔ̱ɔ̱c kɛ ji̱.

6Kɛ ɣöö ciɛŋ gaat gua̱ni ce̱tkɛ dɔa̱a̱r, kä ŋɛ̈ɛ̈ny nyal kɛ man, kä gak ciek kɛnɛ manthudɛ. Kä ji̱ tɛ̈r ran bikɛn a ni ji̱ dhɔaarɛ.

7Duundɛ ɣöö ɣän bä guic ni Kuoth Nhial, ɣän bä lip ni käändä ni Kuoth, ɛn Kuothdä bɛ ɣä liŋ.

8Ɛ lɔcdun /ci tɛth kɛ ɣä lö ji̱ tɛ̈rä, a cäŋ cä tɛɛth ɣän bä rɔ lɛni jiɛc bä. Kä mi wa̱a̱ wä nyuur rɛy muɔ̱th, bi Kuoth Nhial a buaydä.

9Ɣän bä ŋɛ̈ɛ̈ny Kuɔth Nhial rut, kɛ ɣöö cä jɛ lät kä duer, amäni mi cɛ ɣä gaŋ rɛy luɔ̱k kä cɛ ɣä ka̱m cuɔ̱ɔ̱ŋdä. Bɛ ɣä cu nööŋ rɛy buɔyä, kä bä cuŋkɛ ku nɛn.

10Kä bi gua̱n tɛ̈rä jɛ cu nɛn, kä bɛ cu pöc ɛn ram in ci ɣä jiök i̱, “Kuoth Nhial Kuothdu a nikä?” Bä cu guic ala mi caanyä, kä bä cu dɔny kä piny ce̱tkɛ tuäk duɔ̱p.

11Kä bi cäŋ in ba täth ni pa̱nyni wecdun cu ben, ɛn cäŋ ɛmɔ ba këthnikun ti̱ec jɔk.

12Ɛn cäŋ ɛmɔ bi naath ben kä yɛ, kä A-thi-ri-ya kɛnɛ rɛ̈k I-jëp, kä bɛ ka̱n ni kä I-jëp a wä ni kiir Yu-pɛ-ree-tidh, a lɛnɛ ka̱n ni yieer a wä yieer in dɔ̱ŋ, kä a lɛnɛ ka̱n ni kä päm a wä pääm in dɔ̱ŋ.

13Kä duundɛ ɣöö bi wi̱c muɔ̱ɔ̱n a day, kɛ kui̱ lätni dueeri ji̱kɛ.

14Yien nɛɛku kɛnɛ detku kɛ kɛɛtdu, lö Kuoth Nhial, tin cieŋ kärɔ rɛy ruɔ̱ɔ̱p, rɛy muɔ̱ɔ̱n mi tëë wal. Jak nikɛ kä läk kä Ba-can kɛnɛ Gil-yad ce̱tnikɛ ni̱n tëë wal.

15Lätni ti ga̱ykɛ naath lö Kuoth ce̱tkɛ mëë no̱o̱ŋi kɔ raar kä I-jëp.

16Kä bi dör ɛ nɛn kä bikɛ cu ga̱a̱c kɛ buɔ̱mdiɛn kɛɛliw. Kä bikɛ thukiɛn cu dɛŋ kä thi̱n kä ba ji̱thkiɛn kum.

17Kä bikɛ cu bɛ̈l ni tur ce̱tkɛ thɔ̱l, kä bikɛ ben raar rɛy duëlikiɛn tin buɔ̱m buɔ̱ɔ̱m ce̱tnikɛ muɔɔl piɛny. Kä bikɛ luny kä Kuoth Nhial. Kuothdan a lathɛ kɛ, kä bikɛ jɛ luɔ̱th.

18Kä ɛ Kuoth in mith dee ce̱tkɛ ji̱ mɔ kɛ päl dueeri kɛ duɔth nɛɛnikɛ tin la nyinkɛ? Kä /ci gakdu la rɔmi amäni cäŋ kɛl, kä la nyuthi ni nɛɛku nhök mi thil pek.

19Kä bi lɔcdu lɛni nyɔk kɛ päl piny kɛ kui̱da, kä bi dueerkɔ dɔany piny. Kä bi jiäkɔ diaal wä yuɔr ni lool baar.

20Kä bi cua̱ thuɔ̱k kä Je-kɔb kä nhök mi thil pek kä A-bɛ-ram, nikɛ mëë ci la̱r gua̱a̱ri mëëdan.

← Chapter 6 Jump to: