Nehemiah 13

Nuer Bible © Bible Society in South Sudan 1998,2012

← Chapter 12 Jump to:

1Ɛn cäŋ ɛmɔ cua bok ŋuɔ̱tni Muthɛ kuɛn kɛ jɔw mi di̱i̱t a liŋ naath ɛ. Kä cua jek ca jɛ gɔ̱r ɛn ɣöö thilɛ raan ji̱ Am-on kiɛ raan ji̱ Mo-ab mi bi wä rɛy dolä nɛɛni Kuɔth,

2kɛ ɣöö /ka̱n ji̱ I-thɛ-rɛl lor kɛ mi̱eth kɛnɛ pi̱w, cua kɔk ni Bil-am kɛ ɣöö bɛ kɛ lam, kä cu Kuothda lam kulɛ loc ni puɔ̱th.

3Kä mëë ci naath ŋuɔ̱t liŋ, cua nɛy diaal tin /ci tɔ̱a̱ ji̱ I-thɛ-rɛl lɛ̈y go̱lä.

4A ŋot nɛmɛ, bo̱o̱th palä ni Ɛl-ya-cib ɛ jɛn la ti̱i̱t duëël kuakni luaak Kuɔthda mɔ kä gɔaa kamdiɛn kɛnɛ To-bi-yaa,

5cuɛ To-bi-yaa ka̱m duel in di̱i̱t mëë la duel mucni bɛɛl kɛnɛ wal tin kɔp kɛ kuak kɛnɛ wa̱l wa̱a̱li bɛɛl kɛ kɔaŋ kɛnɛ liɛɛth tëë ca ka̱m ji̱ Lii-bay kɛnɛ këët din kɛ ga̱a̱ŋ thuɔk luaak kɛ min ŋuɔ̱nkɛ ɛ bööth palä thi̱n.

6Kä mëë tuɔɔk nɔmɔ /cä te kä Jɛ-ru-tha-lɛm, kɛ ɣöö kɛ ruɔ̱n jiɛn diɔ̱k wi̱cdɛ rɛw ruëc kua̱r Bɛ̈-bi-lɔn ni Är-tɛ̈k-cɛ̈th-tɛ cä ruac nöŋ kuäär. Kɛ kɔr ni̱ni cua jɛ thiec kɛ ɣöö dëë rɔ ri̱t,

7dëë loc kä Jɛ-ru-tha-lɛm. Cua̱ duer in ci Ɛl-ya-cib ɛ la̱t ben ŋa̱c ɛn ɣöö cɛ To-bi-yaa moc kɛ duel rɛy kal luaak Kuɔth.

8Ɣän cua̱ gaak ɛlɔ̱ŋ, kä cua̱ kuak To-bi-yaa diaal yuɔr raar rɛy duëël.

9Kä cua̱ naath jak kä yiackɛ duël, kä cua̱ kuak luaak Kuɔth nyɔk kɛ loc duëël kɛɛl kɛ muc bɛɛl kɛnɛ wäl in kɔp.

10Kä cua̱ jɛ ŋa̱c ɛn ɣöö /ka̱n ji̱ Lii-bay ka̱m kui̱diɛn, kä ɛ jɛn min loc kɛ ji̱ Lii-bay kɛnɛ këët din tin lät rɛy luaak rɛy ka̱a̱knikiɛn kɛ jɛ.

11Cua̱ ruëëc bɛl kä cua̱ thiec i̱, “Ɛŋu ca luak Kuɔth ba̱ny piny ɔ?” Cua̱ ji̱ Lii-bay kɛ këët din cɔl, kä cua kɛ luɔc gua̱thnikiɛn.

12Kä cu ji̱ Juda diaal wa̱l wa̱a̱li bɛɛl kɛnɛ kɔaŋ kɛ liɛɛth nööŋ rɛy duëli kuakni.

13Kä cua̱ bo̱o̱th palä ni Cɛ-lɛm-yaa kɛnɛ gɔ̱ɔ̱r ni Dha-dok kɛ raan Lii-bay ni Pɛ-da-yaa jak kä ga̱a̱ŋ duëli kuakni, kä cua luäk ɛ Ɣa-nan gat Dha-kur gat Mɛ̈-tɛ̈n-yaa, kɛ ɣöö kɛ nɛy ti ŋa̱thkɛ. Kä la̱tdiɛn ɛ dääk kuakni kä gaatmani.

14Tim ɣä lö Kuothdä kɛ kui̱ kä nɛmɛ, /cu la̱t in gɔaa in cä la̱t kɛ kui̱ luaakdu kɛnɛ lätkɛ yäk.

15Ɛ ni̱ni tɔ̱tɔ̱ cua naath nɛn kɔakɛ kɔaŋ kä Juda kɛ cäŋ lɔ̱ŋä, kä nööŋkɛ bɛl ti ɣa̱a̱ckɛ kɛ muɔ̱li, amäni kɔaŋ kɛ dɛy ŋɔ̱a̱p kɛ kuak kɔ̱kiɛn ti kɔ̱ŋ, cua kɛ nööŋ kä Jɛ-ru-tha-lɛm kɛ cäŋ lɔ̱ŋä. Kä cua̱ kɛ luek ɛn guäth ɛmɔ kɛ ɣöö /ca mi̱eth bi nyɔk kɛ kɔk kɛ cäŋ lɔ̱ŋä.

16Amäni ji̱ Dhor tin cieŋ kä Jɛ-ru-tha-lɛm la nööŋkɛ rɛc kɛnɛ kuak ko̱kä ti ŋuan ti kɔ̱ŋ bakɛ ben kök ji̱ Juda kɛ cäŋ lɔ̱ŋä kä Jɛ-ru-tha-lɛm.

17Kä cua̱ bööth ji̱ Juda bɛl, kä cua̱ kɛ jiök i̱, “Ɛ mi jiääk mi tëë di lät yɛn ɛ mi, mɔ yär yɛn cäŋ lɔ̱ŋä mɔ?

18Kä /ciɛ jɛn mëë ci guuri jɛ kɔŋ la̱t ɛn nɛmɛ, kä ci Kuothdan kɛn jiäk ti diaal ti̱ti̱ kɔŋ nöŋ kɔn kɛ jɛn wec ɛmɛ? Kä ŋotdɛ no̱o̱ŋ yɛn rik ji̱ I-thɛ-rɛl kɛ yäridun kɛ cäŋ lɔ̱ŋä.”

19Kä min ci ti̱eep thiaŋ cop thi̱ekni Jɛ-ru-tha-lɛm ɛ /ken cäŋ lɔ̱ŋä ni cop, cua ruac lat ɛn ɣöö ba thi̱ekni ga̱k, kä /cakɛ bi lɛp amäni mi ci cäŋ lɔ̱ŋä thuɔ̱k. Kä cua ji̱ kɔarä la̱th thukni thi̱ekni, kɛ ɣöö bɛ thil nyin ko̱kä ti ba nööŋ kɛ cäŋ lɔ̱ŋä.

20Kä cu nɛy tin la kɔakɛ ŋɔak niɛn raar jɔk kal Jɛ-ru-tha-lɛm kä kɛɛl kiɛ kä rɛɛw.

21Duundɛ ɣöö cua̱ kɛ luek, kä cua̱ kɛ jiök i̱, “Ɛŋu nin yɛn puɔ̱ɔ̱ny pa̱a̱ny ɔ? Mi wä yɛn ɛ nyɔk ɣän bä yɛ woc kɛ buɔ̱m.” Niɛ guäth ɛmɔ /ken kɛn rɔ̱ nyɔk kɛ ben kɛ cäŋ lɔ̱ŋä.

22Kä cua ji̱ Lii-bay jak kä lɛ̈ykɛ rɔ̱ kɛ ɣöö bikɛ thi̱ekni gaŋ, kɛ ɣöö ba cäŋ lɔ̱ŋä tit ala mi rɛl rɔ. Tim nɛmɛ bä lö Kuothdä, kɛ kui̱dä, kä nyuth ni ɣä gɔɔydu ce̱tnikɛ nhökdu min thil pek.

23Ɛn ni̱ni tɔ̱tɔ̱ bä cua̱ ji̱ Juudh nɛn cikɛ kuɛɛn kɛ nyier ji̱ Ac-dod kɛnɛ ji̱ Am-on kɛ ji̱ Mo-ab,

24kä tha̱a̱ŋ gankiɛn ruackɛ kɛ thok ji̱ Ac-dod kɛnɛ thuk nɛɛni tin kɔ̱ŋ, kui̱c kɛn ruac kɛ thok ji̱ Juda.

25Cua̱ kɛ bɛl, kä cua̱ kɛ lam, kä cua̱ tha̱a̱ŋkiɛn duäc, kä cua̱ mi̱emkiɛn yut. Cua̱ kɛ jak kä yackɛ rɔ̱ kɛ ciöt Kuɔth jiökä kɛ i̱, “/Cia nyieekun bi kuën gaatkiɛn, kä /cia nyieekiɛn bi kuën gaatkun kiɛ pua̱nykun.

26Kä /ciɛ kuën mään ɛ nëë jak kuäär I-thɛ-rɛl ni Thɔ-lo-mon kä dui̱r? Kä thilɛ kuäär mi päär kɛ jɛ rɛy dööri ti ŋuan, kä nhɔk Kuothdɛ jɛ, kä cu Kuoth ɛ jak kä kuäär I-thɛ-rɛl kɛɛliw. Kä cu män tin jur jɛ jak kä dui̱r.

27Ɛ kɔn bakɔ ku guɔ̱ɔ̱r ni ta̱a̱dun kɛ lätni dui̱rä mi ce̱tkɛ nɛ kä Kuothda kɛ kuën mään ti jur?”

28Kä cua̱ Yɛ-ɣo-ya-da gat Ɛl-ya-cib bo̱o̱th palä min di̱i̱t tuk kä Jɛ-ru-tha-lɛm, kɛ ɣöö ci gatdɛ kɛl nya Thɛ̈n-bɛ̈-lat raan Beth-o-ron kuɛn.

29Tim kɛ lö Kuothdä, kɛ ɣöö ca böth palä, kɛnɛ mat ruac bo̱thä palä kɛnɛ ji̱ Lii-bay ya̱r.

30Cua̱ bööth palä kɛ ji̱ Lii-bay lɛy kä ti diaal tin /ci tɔ̱a̱ ciɛŋkiɛn, cua̱ lät bööthni palä kɛnɛ ji̱ Lii-bay lɛ̈y, ramɔ kɛ la̱tdɛ.

31Kä cua̱ jiɛn tin la waŋkɛ muc jak kä nööŋkɛ kɛ gua̱a̱th in görkɛ nikɛ, amäni muc dɛɛni wal tin nhiam. Kä tim ɣä lö Kuothdä kɛ kui̱ gɔyni ti diaal ti̱ti̱.

← Chapter 12 Jump to: