Psalms 107

Nuer Bible © Bible Society in South Sudan 1998,2012

← Chapter 106 Jump to: Chapter 108 →

1La̱rɛ Kuoth Nhial tɛ̈th lɔaac, kɛ kui̱ gɔɔyädɛ, kɛ ɣöö nhökdɛ min thil pek ɛ do̱raar!

2Kä ɛ nɛy tin ci Kuoth Nhial kɛ kän la ruac inɔ, kɛn nɛy tin cɛ kän rɛy rikni,

3kɛn tin cɛ ma̱a̱t wi̱i̱ni tin kɔ̱ŋ, nɛy tin cɛ ma̱a̱t kui̱ känyä ca̱ŋ kɛnɛ kui̱ konyä ca̱ŋ, kɛ cam ɣɔaa kɛnɛ cuec ɣɔaa.

4Kä cu tha̱a̱ŋ nath yi̱i̱c där dɔaar mi luɔ̱t, kä /ca duɔ̱ɔ̱p mi wee kɛ wec mi deekɛ cieŋ thi̱n jek,

5kä näk buɔthkɛ kɛnɛ rɛw, kä ci lo̱ckiɛn baath.

6Kä cukɛ Kuoth Nhial cɔl kɛ rikiɛn, kä cuɛ kɛ kän rɛy cucädiɛn,

7cuɛ kɛ bo̱th kɛ duɔ̱ɔ̱p mi cuŋ, cu mäni mëë cikɛ cop wi̱c mi deekɛ cieŋ thi̱n.

8Akɛ la̱r kɛ Kuoth Nhial tɛ̈th lɔaac kɛ kui̱ nho̱kädɛ min thil pek, kɛnɛ kui̱ lätnikɛ tin ga̱ykɛ naath kɛ kui̱ nath.

9Kɛ ɣöö cɛ ram mi näk rɛw ɛ kayŋua̱a̱k, kä cɛ ram mi näk buɔthɛ riäŋ kɛ ti gɔw.

10Kä tha̱a̱ŋ nath nyuurkɛ rɛy muɔ̱th mi col, kä nɛy tin ca yian cuckɛ kɛ kuatni ciikni,

11kɛ ɣöö cikɛ ruac Kuɔth Nhial lo̱k, kä cikɛ luek Kuɔth in Di̱t ni Jɛn lo̱k.

12Kä cuɛ kɛ jak kä cuc kɛ la̱t mi bɛc bɛc, la raan a tɛth kä thilɛ ram mi luäk jɛ.

13Kä cukɛ Kuoth Nhial cɔl kɛ rikiɛn, kä cuɛ kɛ kän rɛy cucädiɛn.

14Kä cu Kuoth kɛ ka̱m raar rɛy muɔ̱th mi col, kä cuɛ yieynikiɛn puɔ̱t.

15Akɛ la̱rkɛ Kuoth Nhial tɛ̈th lɔaac kɛ kui̱ nho̱kädɛ min thil pek, kɛnɛ kui̱ lätnikɛ tin ga̱ykɛ naath kɛ kui̱ nath.

16Kä cuɛ thiekni cikä min yian töl, kä cuɛ gääkni ladiitdä ŋuɔ̱k.

17Tha̱a̱ŋ nath te dɔ̱a̱a̱r cuckɛ kɛ kui̱ lätnikiɛn tin jiäk, kɛ kui̱ nyuɔɔnikiɛn ɛ jɛn moockɛ ti bɛ̈c bɛ̈ɛ̈c ɔ,

18kä thil ɛ mi̱eth mi go̱o̱r kɛn mi̱ethdɛ, ci thia̱k nikɛn kɛ lia̱a̱.

19Kä cukɛ Kuoth Nhial cɔl kɛ rikiɛn, kä cuɛ kɛ kän rɛy cucädiɛn,

20kä cu Kuoth ruacdɛ jäkä raar kä cuɛ kɛ jakä gɔaa, kä cuɛ kɛ kän rɛy däkä.

21Akɛ la̱r kɛ Kuoth Nhial tɛ̈th lɔaac kɛ kui̱ nho̱kädɛ min thil pek, kɛnɛ kui̱ lätnikɛ tin ga̱ykɛ naath kɛ kui̱ nath.

22Kä akɛ thöpkɛ muc tɛthä lɔaac, kä latdɛ lätkɛ kɛ ket din kɛ tɛ̈th lɔaac.

23Kä cu tha̱a̱ŋ nath wä rɛy baar kɛ babuuri, lätkɛn la̱t rɛy baar in di̱i̱t,

24cukɛ lät Kuɔth Nhial nɛn, lätkɛ tin ga̱ykɛ naath rɛy baar.

25Kä cuɛ ruac lat cu jiɔam mi di̱i̱t puɔ̱t, min cu muaŋ baar jiac ni pua̱a̱r.

26Kä cuɛ babuuri kap ni nhial, kä cuɛ kɛ luɔc ni piny baar. Cu naath rɔ̱ cu luär kɛ riɛk in cikɛ jek,

27cukɛ riääth kä cukɛ tëth ce̱tkɛ nɛy ti ci yɔ̱ŋ kɛ kɔaŋ, kä cu ŋäcdiɛn cua̱ baŋ.

28Kä cukɛ Kuoth Nhial cɔl kɛ rikiɛn, kä cuɛ kɛ kän ka̱m raar rɛy cucädiɛn,

29cuɛ jiɔam ka̱p cuɔ̱ŋ, kä cu muaŋ baar cu biɛt.

30Kä cu lo̱ckiɛn tɛɛth mëë ci jiɔam kɛnɛ muaŋ biɛt, kä cu Kuoth kɛ nööŋ thok waath guäth in go̱o̱r kɛn wä thi̱n.

31Akɛ la̱rkɛ Kuoth Nhial tɛ̈th lɔaac kɛ kui̱ nho̱kädɛ min thil pek, kɛnɛ kui̱ lätnikɛ tin ga̱ykɛ naath kɛ kui̱ nath.

32Akɛ liakɛ jɛ rɛy dolä nath, kä a jɛ puanykɛ rɛy matdä nɛɛni tin di̱t.

33Kä jɛn Kuoth Nhial la locɛ kiɛr ɛla dɔr, kä la locɛ wäŋ pi̱i̱ni piny mi ci ba̱k,

34kä locɛ mun ciɛkä bɛɛl kä mun milɛkä mi luɔ̱t, kɛ kui̱ nyuɔɔni nɛɛni tin cieŋ thi̱n.

35Kä duundɛ ɣöö la locɛ där dɔaar mi luɔ̱t pul pi̱i̱ni, kä jakɛ mun mi kööt kä waŋ pi̱i̱ni.

36Kä ɛn wani cuɛ nɛy tin näk buɔthkɛ naŋ thi̱n, kä cukɛ wec mi bikɛ cieŋ thi̱n la̱t.

37Cukɛ ka̱a̱k pith kä cukɛ ka̱a̱k wal kɛ kui̱ kɔaŋ pith, kä cukɛ dɛy ti ŋuan kuir.

38Kɛ puɔ̱th Kuɔth Nhial cukɛ rɔ̱ rep ɛlɔ̱ŋ, kä /ci ɣɔ̱ɔ̱kiɛn bi met kuɛ̈ɛ̈.

39Kä mi ci pekdiɛn kuɛ̈ɛ̈ ɛ cikɛ tuil, kɛ kui̱ yaakä kɛnɛ rik kɛ jiath lɔaac,

40la Kuoth kɛ la ɣɔɔr kä nɛy tin yɔaŋkɛ kɛ, lakɛ a jakɛ kä yi̱c rɛy dɔaar mi luɔ̱t mi thil duɔ̱ɔ̱p.

41Duundɛ ɣöö, la kämɛ can raar kä nɛy tin yakɛ kɛ, kä la jakɛ dho̱rkiɛn kä rëpkɛ rɔ̱ ce̱tnikɛ det.

42Kä mi ci ji̱ cuŋni nɔmɔ nɛn la lo̱ckiɛn cua̱ tɛ̈th, duundɛ ɣöö la ji̱ nyuɔɔni diaal cua̱ bit.

43Kä ɛ nɛy diaal tin pɛl tiɛtkɛ ŋɔak ti̱ti̱, kä carɛ nhök Kuɔth Nhial in thil pek.

← Chapter 106 Jump to: Chapter 108 →