Psalms 89

Chewa Bible (BL) 1992 - Buku Lopatulika

← Chapter 88 Jump to: Chapter 90 →

1Ndidzayimbira zacifundo za Yehova nthawi yonse: Pakamwa panga ndidzadziwitsira cikhulupiriko canu ku mibadwo mibadwo.

2Pakuti ndinati, Cifundo adzacimanga kosaleka; Mudzakhazika cikhulupiriko canu m'Mwamba mweni mweni.

3Ndinacita cipangano ndi wosankhika wanga, Ndinalumbirira Davide mtumiki wanga:

4Ndidzakhazika mbeu yako ku nthawi yonse, Ndipo ndidzamanga mpando wacifumu wako ku mibadwo mibadwo.

5Ndipo kumwamba kudzalemekeza zodabwiza zanu, Yehova; Cikhulupiriko canunso mu msonkhano wa oyera mtima.

6Pakuti kuli yani kuthambo timlinganize ndi Yehova? Afanana ndi Yehova ndani mwa ana a amphamvu?

7Ndiye Mulungu, ayenera kumuopa kwambiri m'upo wa oyera mtima, Ndiye wocititsa mantha koposa onse akumzinga.

8Yehova, Mulungu wa makamu, wamphamvu ndani wonga Inu, Yehova? Ndipo cikhulupiriko canu cikuzingani.

9Inu ndinu wakucita ufumu pa kudzikuza kwa nyanja; Pakuuka mafunde ace muwacititsa bata.

10Mudathyola Rahabu, monga munthu wophedwa; Munabalalitsa adani anu ndi mkono wa mphamvu yanu.

11Kumwamba ndi kwanu, dziko lapansi lomwe ndi lanu; Munakhazika dziko lokhalamo anthu ndi kudzala kwace.

12Munalenga kumpoto ndi kumwela; Tabora ndi Hermoni apfuula mokondwera m'dzina lanu.

13Muli nao mkono wanu wolimba; M'dzanja mwanu muli mphamvu, dzanja lamanja lanu nlokwezeka.

14Cilungamo ndi ciweruzo ndiwo maziko a mpando wacifumu wanu; Cifundo ndi coonadi zitsogolera pankhope panu.

15Odala anthu odziwa liu la lipenga; Ayenda m'kuunika kwa nkhope yanu, Yehova.

16Akondwera m'dzina lanu tsiku lonse; Ndipo akwezeka m'cilungamo canu.

17Popeza Inu ndinu ulemerero wa mphamvu yao; Ndipo potibvomereza Inu nyanga yathu idzakwezeka.

18Pakuti cikopa cathu cifuma kwa Yehova; Ndi mfumuyathu kwa Woyera wa Israyeli.

19Pamenepo munalankhula m'masompenya ndi okondedwa anu, Ndipo mudati, Ndasenza thandizo pa ciphona; Ndakweza wina wosankhika mwa anthu.

20Ndapeza Davide mtumiki wanga; Ndamdzoza mafuta anga oyera.

21Amene dzanja langa lidzakhazikika naye; Inde mkono wanga udzalimbitsa.

22Mdani sadzamuumira mtima; Ndi mwana wa cisalungamo sadzamzunza.

23Ndipo ndidzaphwanya omsautsa pamaso pace; Ndidzapandanso odana naye.

24Koma cikhulupiriko canga ndi cifundo canga zidzakhala naye; Ndipo nyanga yace idzakwezeka m'dzina langa.

25Ndipo ndidzaika dzanja lace panyanja, Ndi dzanja lamanja lace pamitsinje.

26Iye adzandichula, ndi kuti, Inu ndinu Atate wanga, Mulungu wanga, ndi thanthwe la cipulumutso canga.

27Inde ndidzamuyesa mwana wanga woyamba, Womveka wa mafumu a pa dziko lapansi.

28Ndidzamsungira cifundo canga ku nthawi yonse, Ndipo cipangano canga cidzalimbika pa iye.

29Ndidzakhalitsanso mbeu yace cikhalire, Ndi mpando wacifumu wace ngati masiku a m'mwamba.

30Ana ace akataya cilamulo canga, Osayenda m'maweruzo anga:

31Nakaipsa malembo anga; Osasunga malamulo anga;

32Pamenepo ndidzazonda zolakwa zao ndi ndodo, Ndi mphulupulu zao ndi mikwingwirima.

33Koma sindidzamcotsera cifundo canga conse, Ndi cikhulupiriko canga sicidzamsowa.

34Sindidzaipsa cipangano canga, Kapena kusintha mau oturuka m'milomo yanga.

35Ndinalumbira kamodzi m'ciyero canga; Sindidzanamizira Davide;

36Mbeu yace idzakhala ku nthawi yonse, Ndi mpando wacifumu wace ngati dzuwa pamaso panga.

37Udzakhazikika ngati mwezi ku nthawi yonse, Ndi ngati mboni yokhulupirika kuthambo.

38Koma Inu munamtaya, nimunamkaniza, Munakwiya naye wodzozedwa wanu.

39Munakaniza cipangano ca mtumiki wanu; Munaipsa korona wace ndi kumponya pansi,

40Munapasula maguta ace onse; Munagumula malinga ace.

41Onse opita panjirapa amfunkhira: Akhala cotonza ca anansi ace.

42Munakweza dzanja lamanja la iwo omsautsa; Munakondweretsa adani ace onse.

43Munapinditsa kukamwa kwace kwa lupanga lace, Osamuimika kunkhondo.

44Munaleketsa kuwala kwace, Ndipo munagwetsa pansi mpando wacifumu wace.

45Munafupikitsa masiku a mnyamata wace; Munamkuta nao manyazi.

46Mudzabisala kosatha kufikira liti, Yehova; Ndi kuzaza kwanu kudzatentha ngati moto kufikira liti?

47Kumbukilani kuti nthawi yanga njapafupi; Munalengeranji ana onse a anthu kwacabe?

48Munthu ndani amene adzakhalabe ndi moyo, osaona imfa? Amene adzapulumutsa moyo wace ku mphamvu ya manda?

49Ciri kuti cifundo canu cakale, Ambuye, Munacilumbirira Davide pa cikhulupiriko canu?

50Kumbukilani, Ambuye, cotonzera atumiki anu; Ndicisenza m'cifuwa mwanga cacokera ku mitundu yonse yaikuru ya anthu;

51Cimene adani anu, Yehova, atonza naco; Cimene atonzera naco mayendedwe a wodzozedwa wanu.

52Wodalitsika Yehova ku nthawi yonse, Amen ndi Amen.

← Chapter 88 Jump to: Chapter 90 →