John 2

Nyankole 1964

← Chapter 1 Jump to: Chapter 3 →

1Aha kiro kya kashatu hakabaho obugyenyi bw'okushwera omuri Kaana eya Galilaaya, na nyina wa Yesu akaba ariyo.

2Yesu nawe akeetwa aha bugyenyi n'abeegi be.

3Bwanyima, viinyo ku yaahweire, nyina wa Yesu yaamugira ati: Tibaine viinyo.

4Yesu yaamugira ati: Mukazi 'we, noofa ki naanye? Obunaku bwangye tibukahikire.

5Nyina yaagira abaheereza ati: Eki araabaragiire kyona, mukikore.

6Kandi hakaba hariho enyungu mpango mukaaga, ezibaizire omu mabaare, ezaabaire zihigikiirwe aho, zitairweho ahabw'okweyeza, nk'emigyenzo y'Abayudaaya oku eri; enyungu emwe ekaba ebamu enjoga ibiri nari ishatu.

7Yesu yaabaragiira ati: Mwijuze enyungu amaizi. Baaziijuriza kimwe.

8Yaabagira ati: Mbwenu mutahe, mutwarire omukuru w'obugyenyi. Baamutwarira.

9Omukuru w'obugyenyi, ku yaarorize aha maizi agaahinduka viinyo, atarikumanya i yaaruga, (kwonka abaheereza abatahire amaizi bo nibakimanya) yaayeta kishwera,

10yaamugira ati: Omuntu weena abanza kugabura viinyo enungi; bwanyima, abantu ku bahaaga, abaha viinyo etanuzire; kwonka iwe obiikire enungi okuhitsya hati.

11Aka niko kamanyiso k'okubanza aku Yesu yaakozire; akakakorera omuri Kaana eya Galilaaya, naayoreka ekitiinisa kye; n'abeegi be baamwikiriza.

12Bwanyima y'ekyo, yaashuuma, yaaza Kaperenaumu na nyina n'abarumuna n'abeegi be; baamarayo ebiro bikye.

13Okuhingurwaho kw'Abayudaaya kukaba kuri haihi kuhika; Yesu yainamuka Yerusaalemu.

14Ku yaataahire omuri hekalu, yaashangamu abarikutunda ente n'entaama n'enkombe, n'abarikuhingisa empiiha, bashutami nibazihingisa.

15Yaakwata emigoye, yaagigira nk'orukoba, yaababinga boona omuri hekalu, n'entaama n'ente zaabo; yaashuka ahansi empiiha z'abarikuhingisa, yaajuumika n'emeeza zaabo;

16n'abaabaire nibatunda enkombe yaabagira ati: Mwiheho ebi; enju ya Tata murekye kugigira enju y'abashuubuzi.

17Abeegi be baijuka ebyahandiikirwe ngu, Okusaasibwa enju yaawe kuryandya.

18Abayudaaya baagarukamu, baamubuuza bati: Ebyo wabikozire; mbwenu ni kamanyiso ki aku waakutworeka?

19Yesu yaabagarukamu ati: Musheenye hekalu egi; naanye ndyagiimutsya omu biro bishatu.

20Abayudaaya baagira bati: Hekalu egi ekamara emyaka makumi ana na mukaaga neeyombekwa; mbwenu iwe oryagiimutsya omu biro bishatu?

21Kwonka We akaba naagamba ahari hekalu ey'omubiri gwe.

22Bwanyima, ku yaazookire omu bafu, abeegi be baijuka ku yaagambire ekyo, baikiriza Ebyahandiikirwe, n'ekigambo eki Yesu yaagambire.

23Kandi ku yaabaire ari Yerusaalemu omu biro by'obugyenyi bw'Okuhingurwaho, baingi baikiriza eiziina rye, ku baareebire obumanyiso obu yaakozire.

24Kwonka Yesu tarabeesigire, ahakuba akaba naamanya abantu boona;

25n'ahabw'ekyo tarenzire muntu weena kumumanyisa eby'abantu; ahakuba We akaba naamanya ebiri omu muntu.

← Chapter 1 Jump to: Chapter 3 →