1 Corinthians 4

nyankole

← Chapter 3 Jump to: Chapter 5 →

1Oku nikwo omuntu ashemereire kututwaza, nk'abaheereza ba Kristo, n'abarikujunaanwa eby'amabanga ga Ruhanga.

2Manya ekyetengwa aha barikujunaanwa n'okushangwa bari abeesigwa.

3Kandi imwe okuncwera orubanja, nari okurucwerwa ekyetwa eiramuriro ry'abantu, ahariinye n'akantu kakye. Nangwa naanye tindwecwera.

4Nobu ndaabe ntaine ki ndikwemanyaho ekirikunshinja, kwonka ekyo tikirikuunyihisaho rubanja. Mukama niwe arikuruncwera.

5N'ahabw'ekyo mutaricwa orubanja obunaku butakahikire, Mukama atakaizire; niwe ogwo oryanika ebisherekirwe omu mwirima, akashuuruura enaama z'omu mutima; haza obwo nibwo Ruhanga arisiima buri muntu nk'oku kimushemereire.

6Banyaruganda, ebyo naabyegambaho na Apolo nimbarengyeza, ngu mutwegyereho kugira emitwarize erikuhikaana n'Ebyahandiikirwe, ngu hatagira omuriimwe owaayetunguura, naasiima omuntu omwe okukira ondiijo.

7N'oha okureebamu eki abandi bataine? Oine ki eki otarahairwe? Mbwenu ku oraabe waakihairwe, nooyehimbisiza ki nk'otarakihairwe?

8Ebishi muherize kwiguta! Ebishi muherize kuba abatungi! Ebishi, muherize kuba abagabe mutatwine! Nakabaasibwa ki muba abategyeki, naitwe tutegyeka hamwe naimwe!

9Manya ninteekateeka ngu itwe entumwa Ruhanga atworekire nk'abarikuhereeruka aha bandi boona, twaba nk'abacwereirwe orw'okufa; ahabw'okuba tubaire ab'okushungwa ensi na baamaraika n'abantu.

10Itwe turi abashema ahabwa Kristo, kwonka imwe muri abanyabwengye omuri Kristo. Itwe turi abataine maani, kwonka imwe muri ab'amaani; imwe nimuheebwa ekitiinwa, kwonka itwe nitugaywa.

11N'okuhitsya aga magingo twine enjara n'eiriho, tujwaire obucancabari, nituteerwa empi, titwine butaaho,

12kandi twehenenga nitukoresa emikono yaitu. Ku tujumwa, twendeza emigisha; ku tuhiiganisibwa, tugumisiriza;

13ku tubeihererwa, tuteeraho kugarukanisa; n'okuhitsya hati tuhindukire efa y'omu nsi n'ekumbwe y'ebintu byona.

14Ebyo tinaabibahandiikira kubahemura, kureka okubahuguura nk'abaana bangye abakundwa.

15Manya nobu muraabe mwine abahabuzi enkumi n'enkumi omu by'amagara g'obukristo, kwonka mwine shoimwe omwe. Manya nyowe, omu by'amagara gaanyu g'obukristo, nkaba shoimwe nimbarangirira Amakuru Marungi.

16N'ahabw'ekyo nimbeehanangiriza ku muntooreza.

17Nikyo naabatumiraho Timoteeho, omwana wangye omukundwa kandi omwesigwa omuri Kristo, kubaijutsya emitwarize yangye ey'omuri Kristo, nk'oku ngyegyesa hoonahoona omuri buri kigombe ky'Abakristo.

18Abamwe nibeeraata kushusha oti tindiija waanyu.

19Kwonka ndi ow'okwija juba, Mukama yaaba akisiimire, haza nyereebere amaani g'abo banyamaryo, bitari bi barikugamba kusha.

20Ahabw'okuba obukama bwa Ruhanga tiburi mu bigambo, kureka omu kukora n'amaani.

21Mbwenu nimusiima ki? Ngu nyije owaanyu n'omunyaafu, nari nyije n'omutima ogwine rukundo n'obucureezi?

← Chapter 3 Jump to: Chapter 5 →