1 Corinthians 8

nyankole

← Chapter 7 Jump to: Chapter 9 →

1Mbwenu aha bikwatiraine n'ebyokurya ebihongyeirwe ebishushani, nituhamya ku twena twine okumanya. Okumanya nk'okwo kuteera ebihagi, kwonka rukundo yo ehangaana.

2Weena oteekateeka ngu aine eki arikumanya, aba atakamanyire nk'oku ashemereire kumanya.

3Kwonka omuntu ku akunda Ruhanga, Ruhanga nawe amumanya.

4Mbwenu aha bikwatiraine n'okurya ebihongyeirwe ebishushani; nitumanya ku ebishushani bitabaho, kandi ku hatariho Ruhanga ondi kureka Ruhanga omwe.

5Nobu haraabe hariho ebyetwa baaruhanga omu iguru n'omu nsi, nk'oku buzimazima hariho baaruhanga baingi n'abakama baingi,

6kwonka ahabwaitu hariho Ruhanga omwe, Taata, ou ebintu byona bikomookaho, naitwe ou tubaho ahabwe; kandi hariho Mukama omwe Yesu Kristo, obaisaho byona, naitwe akatubaisaho.

7Kwonka okwo kumanya, ti boona abakwine. Abantu abamwe n'okuhitsya hati ku barya ebyokurya nk'ebyo, bateekateeka ngu baarya ebihongyeirwe ebishushani. Emitima yaabo eba etahamire, batyo bateekateeka ngu ebyo byokurya byabahagaza.

8Manya ebyokurya tibyo bitusiimisa ahari Ruhanga, ahabw'okuba ku tuba tutabiriire titugira ki tufeerwa, kandi ku tubirya titugira ki twongyerwaho.

9Kureka mwerinde, okubirya kwanyu nari okutabirya kutakaateeza entsibo abaine okwikiriza kutahamire.

10Mbwenu iwe omuntu oyetegyereize, ondiijo ow'omutima gutahamire ku yaakukureeba nooriira omu ndaaro y'ekishushani, takaatetuuka akarya ebyokurya bihongyeirwe ebishushani?

11Reero ogwo muntu otahamire akahwerekyerera atyo ahabw'okumanya kwawe, haza ari mwene waanyu ou Kristo yaafeereire.

12Manya ku mukora ekibi ahari beene waanyu, mwahutaaza emitima yaabo etahamire, muba mukozire ekibi ahari Kristo.

13N'ahabw'ekyo ebyokurya ku byakuba nibigwisa mwene waitu, tindigira bu ndiire enyama n'akakye, mbone kutagwisa mwene waitu.

← Chapter 7 Jump to: Chapter 9 →