Acts 24

nyankole

← Chapter 23 Jump to: Chapter 25 →

1Ku haahingwireho ebiro bitaano, Ananiya omuhongyerezi omukuru, yaija n'abakuru omu ihanga hamwe n'ow'okubatonganira orikwetwa Terutuulo; baatabaariza Paulo omu maisho g'omutegyeki omukuru. Ku baamwetsire, Terutuulo yaatandika kumutabaariza ati:

2Ow'ekitiinwa Felikisi, eihanga eri nirikusiima ahabw'okurireetera obusingye bwingi, n'ebindi ebi okora kurishemeza.

3Ebyo byona nitubiikiriza, kandi obutoosha ahi turi hoona nitubikusiimira munonga.

4Ntakusiibiizeyo, ninkushaba otuhurireho kakye.

5Okukugambira amazima, tureebire ngu omushaija ogu atunyangaraize munonga; naarabanisamu Abayudaaya omu nsi yoona, kandi niwe mwebembezi w'ekigombe ky'Abanazareeti.

6Ataireho n'okuhagaza Nyaruju, nikwo kumukwata [ngu tumucwere orubanja nk'oku eiteeka ryaitu riri.

7Kwonka Lusiya, omukuru w'eihe, yaabitaahamu, yaamutwaka n'amaani.

8Yaaragiira abarikumutabaariza kwija aha omu maisho gaawe.] Na' mbwenu ku oraamubuuze, nibwo oraayemanyire amazima ga byona ebi turikumutabaariza.

9Abayudaaya nabo baakwatanisa nawe nibahamya ebyo ku nikwo biri.

10Omutegyeki omukuru ku yaasimiize Paulo ngu agambe, onu yaagira ati: Nimmanya ku omazire emyaka mingi noocwera abantu b'ensi egi emanja. Mbwenu nikyo ndikwetonganirira omu maisho gaawe nyine obwesigye.

11Iwe wenka ku oraabuuze, noija kumanya ku hatakahingwireho biro birikweshumba ikumi na bibiri nyinamukire Yerusalemu kuramya.

12Kandi ti kyamazima okugira ngu baranshangire nimpakana n'omuntu weena, nari ningomesa abantu, yaaba muri Nyaruju, yaaba mu mateeraniro, nari ahandi hoona omu rurembo.

13N'ebi barikuntabaariza hati, tibaine buhamya bwabyo.

14Eki ndikwemera omu maisho gaawe n'eki: Nyowe ndamya Ruhanga wa baatatenkuriitwe, ninkuratira Omuhanda gwe, ogu bo barikweta ogw'ekigombe ekyecwireho, obwo niinyikiriza byona ebiri omu iteeka kandi n'ebyahandiikirwe abarangi.

15Obwo nyine amatsiko omuri Ruhanga nkabo, ku haribaho okuzooka kw'abahikiriire n'abatahikiriire.

16Omuri ebyo nkora kyona eki ndikubaasa kugira omutima gutarikushinjwa obunaku bwona ahari Ruhanga n'aha bantu.

17Ku haahingwireho emyaka, naareetera abanaku b'eihanga ryangye eby'okubahwera n'okureeta emitoijo.

18Ku naabaire ninkibikora, banshanga omuri Nyaruju, naaherize kwezibwa, ntainemu bantu kandi ntaine bu njagaraize. Kwonka Abayudaaya abaarugire Asiya,

19nibo baakwizire aha, bakantabaariza ku baakuba baine eki barikufa naanye.

20Nangwa n'aba abari aha, bagambe ekicumuro eki baareebire nikinsinga, obu baanyemereza omu maisho g'eishengyero.

21Kureka kimwe kyonka eki naagambire nyemereire omu maisho gaabo, nikyo ekyo eky'okuzooka kw'abafiire, eki murikuntonganisa hati omu maisho gaanyu.

22Mpaho Felikisi owaabaire naamanya gye eby'ogwo Muhanda, ku yaahuriire ekyo, orubanja yaarurinza agandi mazooba, naagira ati: Lusiya, omukuru w'eihe, ku araabe yaizire, nibwo ndaahurire orubaja rwawe.

23Atyo yaaragiira omukuru w'abaserukare igana kuguma arinzire Paulo ari enkwatwa, kwonka atarikukumwakumwa kandi batarikuzibira bantu be kwija kumushuura.

24Ku haahingwireho ebiro, Felikisi yaija n'omukazi we Durusila Omuyudaayakazi. Yaatuma, baareeta Paulo; yaamutega okutu, yaahurira ebi arikwegyesa aha by'okwikiriza Kristo Yesu.

25Kwonka Paulo ku yaatandikire kugamba aha by'okuhikiirira n'eby'okwerinda n'eby'ekiro ky'okucwererwaho orubanja okuribaho, Felikisi yaatiina, yaamugira ati: Mbwenu obwa hati ogyende; ku ndikwenda ndyakweta.

26Obwo bwona akaba aine amatsiko, ngu Paulo naija kumuha enguzi, nikyo yaagumiire naamweta atyo kaingi kugaaniira nawe.

27Emyaka ebiri ku yaahwaireho, omwanya gwa Felikisi gwagiibwamu Porikio-Fesito; kandi Felikisi ogwo, ahabw'okwenda kusiimwa Abayudaaya, yaatsiga Paulo omu kihome.

← Chapter 23 Jump to: Chapter 25 →