bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Nyankole
/
nyankole
/
Exodus 34
Exodus 34
nyankole
← Chapter 33
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 35 →
1
Nyakubaho akagambira Musa ati: Beija ebishate bibiri by'amabaare ebiri nk'ebyabandize, naanye mbihandiikyeho ebigambo ebi naabaire ntaire aha bishate by'okubanza ebi waayatsire.
2
Mbwenu nyencakare omu kasheeshe oyeteekateekye, kandi omuri ako kasheeshe oinamukye aha Rushozi Sinaayi, onyegaranjure omu maisho aha mutwe gw'orwo rushozi.
3
Hatagira omuntu owainamukayo naiwe, nobu yaakuba omuntu weena owaareebwa ahari orwo rushozi rwona. Hatagira kandi amasyo g'entaama nari ag'ente agaariira omu maisho g'orwo rushozi.
4
Musa atyo abeija ebishate bibiri by'amabaare ebirikushushana n'ebyabandize. Aguruka kare omu kasheeshe, atemba Orushozi Sinaayi, nk'oku Nyakubaho yaamuragiire, aine omu ngaro ebishate bibiri by'amabaare.
5
Nyakubaho atyo ashuumira omu kicu ayemererayo nawe, haza ayeranga ku ari Nyakubaho.
6
Mpaho Nyakubaho amuraba omu maisho; reero arangirira ati: Niinye Nyakubaho, Mukama Ruhanga ow'embabazi kandi ow'esaasi, otarahuka kugira kiniga kandi oijwire rukundo etahararuka n'obwesigwa,
7
oguma ainiire embabazi enkumi n'enkumi z'abantu, osaasira ebitahikire n'ebicumuro n'ebibi, kwonka otarenzya maisho n'akakye omuntu oine orubanja; kandi ofubira abaana n'abaana baabo, okuhitsya aha ruzaaro rwa kashatu n'orwa kana, naabatura ebibi bya baishenkurubo.
8
Mpaho Musa arahuka kwinika omutwe, ajuumara ahansi aramya;
9
kandi agira ati: Ai Nyakubaho, ku oraabe wangirira embabazi, mbwenu ninkweshengyereza, oikirize kugyenda naitwe oturi ahagati, eri ihanga nobu riraabe riri entahurira, haza otusaasire ebicumuro byaitu n'ebibi byaitu, kandi otutungye tube abaawe b'empungurano.
10
Mukama nawe amugira ati: Reeba naaza kubakorera Endagaano. Niinyija kukorera omu maisho g'abantu baawe boona eby'okutangaaza ebitakakorwaga mu nsi yoona nari omu ihanga ryona, haza abantu abu mutwiremu bareebe ebikoro byangye Nyowe Nyakubaho; ahabw'okuba ebi ndaakorere omuriimwe nibiija kutiinisa.
11
Mbwenu mute omutima aha bi ndikubaragiira eri izooba. Reeba naaza kubinga Abaamori n'Abanyakanaani n'Abahiiti n'Abaperizi n'Abahiivi n'Abayebusi babahungye.
12
Kwonka imwe mwerinde mutakaakora endagaano n'abatwire omu nsi ei murikuzamu, egyo ndagaano etakaababeera ekiina ky'aha muryango.
13
Kureka musheenye amatambiro gaabo, muhigure enyomyo zaabo, kandi mutemagure Baasheri baabo.
14
Manya timuriramya ruhanga ondi, ahabw'okuba Nyakubaho ou eiziina rye riba Munyaihato ni Ruhanga w'eihato.
15
Mwerinde mutarikora endagaano n'abatwire omuri egyo nsi, ahabw'okuba ku barikuhampukira ahari baaruhanga baabo, baatambira baaruhanga abo ebitambo; haza haagira owaabeeta, nimwija kurya aha ki yaatamba;
16
mushwererere batabani baanyu bahara baabo, haza bahara baabo bahampukire ahari baaruhanga baabo; reero ekyo kireetere batabani baanyu kuhampukira ahari baaruhanga baabo.
17
Otaryekorera baaruhanga abaheesirwe.
18
Oryaguma ogire obugyenyi bw'emigaati etatumbisiibwe. Omare ebiro mushanju noorya emigaati etatumbisiibwe nk'oku naakuragiire omu bunaku obwatairweho obw'omu kwezi Abiihu, ahabw'okuba okwo kwezi Abiihu nikwo waarugiiremu Misiri.
19
Ekiigura-nda kyona n'ekyangye, ekyetwa enimi n'empaya eby'omu matungo gaanyu ebirijigaijwa omu nte n'omu ntaama.
20
Eki endogoya erijigaija okicunguze omwana gw'entaama, nainga shi ku oriba otakicungwire okihende ebitsya. Haza hatarigira owaija omu maisho gangye engaro nsha.
21
Ogume okore omu biro mukaaga, kwonka aha kiro kya mushanju ohuumure, nobu bwakuba omu ibiba n'omu igyesha.
22
Ekindi ogume ogire obugyenyi bw'ewiiki mushanju, obw'emiganuro y'eigyesha ry'engano, n'obw'eishaaruura ry'aha muheru gw'omwaka.
23
Abantu baawe boona abeetwa abashaija bagume babonekye emirundi eshatu omu mwaka omu maisho ga Mukama Ruhanga, Ruhanga wa Isiraeli.
24
Manya omuri egyo mirundi eshatu omu mwaka, ku oriba nooyeyoreka omu maisho ga Mukama Ruhanga waawe, ndyabinga amahanga gakuhungye, nyirize omu maisho emyatano yaawe, kandi tiharigira muntu n'omwe owaayetenga kukubuura ensi yaawe.
25
Otarintoijera eshagama y'ekitambo, hamwe n'omugaati gurimu ekitumbisa, kandi ekitambo ky'obugyenyi bw'Okuhingurwaho kitarigumaho okuhitsya omu kasheeshe.
26
Emiganuro y'ebi mwerize omu misiri yaanyu mugume mugireete omu nju ya Mukama Ruhanga waanyu. Mutariteekyesa omwana gw'embuzi amahenahene ga nyinagwo.
27
Bwanyima Nyakubaho yaagira Musa ati: Handiika ebyo bigambo, ahabw'okuba nibyo birimu endagaano ei naakora naiwe n'Abaisiraeli.
28
Musa atyo aguma hamwe na Nyakubaho ebiro makumi ana nyomushana na nyekiro atarikurya ky'okurya kyona, nobu kwakuba okunywa amaizi. Kandi ahandiika ahari ebyo bishate ebigambo by'egyo ndagaano, nibyo biragiro ikumi.
29
Musa ku yaarugire aha Rushozi Sinaayi, yaashuuma aine ebishate by'obuhamya byombi omu ngaro. Mbwenu ku yaabaire naatsintsimuka orwo rushozi, tiyaamanya ku ahamaisho ge harikumurinkana, ahabw'okuba akaba agaaniire na Ruhanga.
30
Reero Arooni n'Abaisiraeli boona ku baateereire Musa amaisho bati, baareeba ahamaisho ge nihamurinkana, baatiina kumuhika.
31
Kwonka Musa yaabeeta. Arooni n'abeebembezi b'ogwo mutwe boona baija ahu ari yaagaaniira nabo.
32
Bwanyima Abaisiraeli boona bairira haihi, Musa yaabamanyisa ebiragiro ebi Nyakubaho yaamugambiriire aha Rushozi Sinaayi.
33
Musa ku yaaherize kugamba nabo, yaayeshangira ahamaisho.
34
Reero Musa ku yaabaire aza omu maisho ga Nyakubaho kugamba nawe, ekyo ky'okwesangiza akiihaho, okuhitsya obu araashohore. Kandi ku yaabaire ashohora, yaagambira Abaisiraeli eki Nyakubaho yaamuragiira;
35
Abaisiraeli bakiteerera bati Musa amaisho, bareeba ahamaisho ge nihamurinkana, nawe agaruka ayesangira, okuhitsya yaagarukayo kugamba na Nyakubaho.
← Chapter 33
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 35 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39
40