Exodus 35

nyankole

← Chapter 34 Jump to: Chapter 36 →

1Musa akateeranira hamwe Abaisiraeli boona, yaabagira ati: Ebi nibyo Nyakubaho abaragiire kukora.

2Mugume mukore emirimo omu biro mukaaga; kwonka ekiro kya mushanju kibabeere Sabato erikwera, ekiro kikuru ky'okuhuumuriraho ekihongyeirwe Nyakubaho. Omuntu weena orikikoreraho omurimo gwona aitwe.

3Hatarigira owaahemba omuriro omu maka gaanyu goona aha kiro kya Sabato.

4Musa agambira Abaisiraeli abari aho boona ati: Eki nikyo Nyakubaho yaaragiira:

5Mutoorane omuriimwe eby'okutoijera Nyakubaho, weena oine omutima gw'obufura amureetere omutoijo: ezaabu, efeeza n'omuringa;

6emyenda ya bururu n'eya bujwa n'eya karari; na kitaani enungi erukirwe enyabubiri; taho obwoshe bw'embuzi;

7empu zihazire ez'engondoore z'entaama, n'empu z'embuzi; embaaho z'omusisa;

8amajuta g'okuhemba, eby'emigaju y'okwoteza, amajuta g'okusiiga n'eby'obubaani burikutaamirana omugaju;

9amabaare g'erangi zitarikushushana n'agandi mabaare g'okuhundisa ekitaahiro n'eky'aha kifuba eky'okwehanuuzaho.

10Kandi weena omuriimwe orikwebaasa, aije akore byona ebi Nyakubaho aragiire; obutaaho,

11n'eihema ryabwo n'eby'okubushweka, ebikwatsi byabwo, embaaho zaabwo, embazi zaabwo, enyomyo zaabwo n'ebiina byabwo.

12Taho eshanduukye y'endagaano n'emigamba yaayo, ekitebe ky'okusaasira, n'omukingo gw'okugikingira;

13emeeza n'emigamba yaayo n'ebirikugikoresibwaho byona, kandi n'emigaati y'Okumurika;

14ekikondo ky'etaara y'okuhwezesa n'ebirikukikoresibwaho n'etaara zaakyo n'amajuta g'okuzihembesa.

15Eitambiro ry'okwotereraho obubaani n'emigamba yaaryo, amajuta g'okusiiga n'obubaani burikutaamirana omugaju, kandi n'omukingo gw'aha muryango, ogurikukinga aha muryango gw'obutaaho.

16Eitambiro ry'ebitambo by'okucwetsya, n'ekyoma kyaryo ky'omuringa ekirabainemu nk'akatimba, n'emigamba yaaryo, n'ebirikurikoresibwaho byona, n'ekinaabiro n'ekibunu kyakyo.

17Taho emikingo y'okwehinguririza orugo rw'ekibuga, enyomyo zaarwo n'ebiina byarwo, kandi n'omukingo gw'aha irembo ry'ekyo kibuga,

18enkondo z'obutaaho, n'ez'ekibuga n'emigoye yaazo.

19Ebijwaro bibaziirwe gye eby'okukoresa omu mwanya ogurikwera; ebijwaro ebirikwera ebya Arooni omuhongyerezi, n'eby'abatabani, eby'omurimo gwabo gw'obuhongyerezi.

20Ebyo ku byahwaire, omutwe gw'Abaisiraeli gwona gwayaabuuka gwaruga ahi Musa ari.

21Bwanyima abaagizire omuhimbo n'abaayekundiire baija bareetsire emitoijo ya Nyakubaho ey'okukoresibwa omu ihema ry'okubugabuganiramu, ahabw'emirimo yaaryo yoona n'eby'okukoresa ebijwaro ebirikwera.

22Abashaija n'abakazi abaayekundiire baija baareeta ebikwatsi birungi n'empeta z'omu matu, n'eziriho obumanyiso, n'ebirikujwarwa aha mikono n'omu maraka; ebintu byona eby'ezaabu; buri muntu yaatoijera Mukama omutoijo gw'ezaabu.

23Kandi buri muntu, owaashangirwe aine omwenda gwa bururu, ogwa bujwa, ogwa karari, nari kitaani enungi, nainga obwoshe bw'embuzi, nari empu z'engondoore z'entaama ezihazirwe, yaabireeta.

24Weena owaabaasize kugira eki yaaha; eky'efeeza nari eky'omuringa, yaakireeta, yaakitoijera Nyakubaho; n'owaashangirwe aine embaaho z'omusisa ezirikwetengwa ahabw'ogwo murimo, yaazireeta.

25Abakazi abanyamyoga baakora ehuuzi n'engaro zaabo, baareeta ebi baakozire: eby'emyenda ya bururu n'eya bujwa n'eya karari, na kitaani enungi erukirwe enyabubiri.

26Abakazi abanyamyoga, abaayekundiire, baakaraga obwoshe bw'embuzi.

27Abakuru omu ihanga baareeta amabaare g'erangi zitarikushushana, n'amabaare g'okuhundisa n'eky'aha kifuba ekyehanuuzibwaho

28n'eby'emigaju, n'amajuta g'okuhemba, n'ag'okusiiga, n'eby'okutaamiranisa obubaani omugaju.

29Abashaija n'abakazi boona Abaisiraeli, abaagizire omuhimbo kugira ebi baareeta ahabw'omurimo gu Nyakubaho yaabaragiire kukora naatuma Musa, baabireeta baabitoijera Nyakubaho biri emitoijo yaabo ei beekundiire.

30Mpaho Musa yaagambira Abaisiraeli, ati: Reeba Nyakubaho yaatoorana Bezaleeli mutabani wa Uuri mwene Huuri, ow'omuruganda rwa Yuda;

31kandi yaamwijuza Mutima wa Ruhanga n'obwengye n'okwetegyereza n'okumanya n'obunyamyoga bwona,

32kugunja eby'obwengye ebiraakorwe, kuheesha eby'ezaabu n'eby'efeeza n'eby'emiringa;

33kubaija amabaare g'okuhundisa, n'okusharura embaaho, n'okukora emyoga yoona ey'oburingaringo.

34Kandi Nyakubaho yaahabura Bezaleeli ogwo, na Oholiyaabu mwene Ahisamaaki, ow'omu ruganda rwa Daani, oku baraayegyese abandi.

35Yaabaijuza obwengye bw'okukora emirimo ekorwa abanyamyoga, nari ekorwa abagunzi, nainga ababaziira ebicwererane omu myenda ya bururu n'eya bujwa n'eya karari n'eya kitaani enungi erukirwe enyabubiri, nari abaruki, nainga ebikorwa ibara mukozi, nari omunyamyoga w'obwengye.

← Chapter 34 Jump to: Chapter 36 →