Galatians 5

nyankole

← Chapter 4 Jump to: Chapter 6 →

1Kristo akatwiha omu buhuuku ngu tugire obusingye; n'ahabw'ekyo muhame, murekye kugaruka omu nkomo y'obuhuuku.

2Mbwenu, nyowe Paulo, nimbagambira nti: ku muraasharwe, Kristo naaba atakibainiire mugasho.

3Ningaruka kuhamiza omuntu weena oikiriza kusharwa, ku aba ow'okuhitsya eby'omu iteeka byona.

4Imwe abarikwenda kuheebwa okuhikiirira ahabw'eiteeka, mwecwire ahari Kristo mwagwa, mwateishuka embabazi za Ruhanga.

5Kwonka itwe, Mutima niwe atubaasisa kugira amatsiko g'okuheebwa okuhikiirira ahabw'okwikiriza.

6Manya ku tuba turi omuri Kristo Yesu, okusharwa nari okutasharwa ti kintu, kureka okwikiriza okurikukoresibwa rukundo.

7Ka mwabaire nimugyenda gye! Mbwenu n'oha owaabazibiire kworobera amazima?

8Okwo kwikiriza kubeihwabeihwa tikurarugire hari ogwo owaabeetsire.

9Ekitumbisa kikye kitumbisa eisyanga ryona.

10Nimbeesiga omuri Mukama, ngu nimwija kugira ebiteekateeko nk'ebyangye. Kwonka ogwo orikubarabanisamu aryayereetera okusingwa orubanja, nobu yaakuba ari oha.

11Mbwenu, banyaruganda, ku ndaabe ninkirangirira eby'okusharwa, ahabw'enki nimpiiganisibwa? Nikwo kugira ngu obwo enkongi y'omusharaba neeba eihirweho.

12Nkaahenwa ki abo abarikubarabanisamu beeshahurira kimwe!

13Mbwenu banyaruganda, mukeeterwa obugabe; kwonka obwo bugabe bwanyu mutabuhindura orwekwatso rw'okukora eby'okwetenga kw'omubiri, kureka mugume muheerezane nimukundana.

14Manya eiteeka ryona rihikiiririzibwa omu kigambo kimwe eki: Kunda mutaahi waawe nk'oku oyekunda.

15Kwonka ku muraabe nimurumana, kandi nimushonshomerana, mwerinde mutamaranaho.

16Nimbagambira nti: Mugume mugyende nimwebemberwa Mutima, haza obwo nibwo mutarihaazya ebyetengwa omubiri.

17Ahabw'okuba ebi omubiri gwetenga birwanisa Mutima; n'ebi Mutima ayenda birwanisa omubiri. Manya byombi birwanisana, ngu mutakaakora ebi murikwenda.

18Kwonka ku muba mwebembeirwe Mutima, muba mutarikutegyekwa iteeka.

19Mbwenu ebikorwa omubiri nibimanywa: obushambani n'ebikwatiraine nabwo, okurya enshoni,

20okuramya emandwa, okuroga, obuzigu, okurwana, eihari, ekiniga, okuharikana, okwebaganisamu, okugwera orubaju,

21eitima, obusinzi, enkyeera, n'ebiri nk'ebyo. Nimbahuguura, nk'oku naabahugwire kare, ku abakora ebiri nk'ebyo batariheebwa bukama bwa Ruhanga.

22Kwonka ebigirwa abaine Mutima n'ebi: okukunda, okushemererwa, obusingye, okugumisiriza, embabazi, oburungi, obwesigwa,

23obucureezi, okwebarira. Haza ebiri nk'ebyo tihariho iteeka eririkubihakanisa.

24Kandi aba Kristo Yesu bakabamba omubiri gwabo aha musharaba n'okwetenga kwagwo okubi n'amairu gaagwo.

25Mutima ku araabe niwe atubaisaho, ka tugume tugyende atwebembeire.

26Turekye kwetunguura n'okugwisana kubi, nari okugirirana eihari.

← Chapter 4 Jump to: Chapter 6 →