Galatians 6

nyankole

← Chapter 5 Jump to:

1Banyaruganda, omuntu ku yaakushangwa akozire ekibi nanka, imwe aba Mutima, mumuhane n'omutima gw'obucureezi. Buri omwe omuriimwe ayerinde; manya naiwe noobaasa kwohibwa otyo.

2Mubangirane emitwaro yaanyu, mubone kuhikiiriza mutyo eiteeka rya Kristo.

3Ahabw'okuba omuntu weena oyeteekateekaho kuba ekintu, haza ataine oku ari, aba naayebeiha.

4Ka buri omwe ashwijume emitwarize ye, haza ku araayereebemu ekirikumwehimbisisa, kibe eky'omuriwe wenka, kitari ky'omuri mutaahi we.

5Manya buri muntu aryayekorera omutwaro gwe wenka.

6Weena orikwegyesibwa ekigambo kya Ruhanga, k'abagane ebirungi byona n'orikumwegyesa.

7Muteebeiha, Ruhanga tagaaniizibwa; manya eki omuntu abiba, nikyo agyesha.

8Ahabw'okuba orikubibira omu mubiri gwe, ogwo mubiri aryagugyeshamu okujunda. Kwonka orikubibira omuri Mutima, aryagyeshera omuri Mutima amagara agatahwaho.

9Mbwenu ka turekye kuruha nitukora ebirungi, ahabw'okuba obunaku ku burihika turyagyesha, twaba tuteehwaire matsiko.

10N'ahabw'ekyo nu nk'oku tukiine omwanya, ka tukorere abantu boona ebirungi, na munonga ab'oruganda rw'abaikiriza.

11Nimureebe oku naabahandiikira omu nyuguta mpango n'omukono gwangye,

12Manya abarikwenda kurangaanwa omu by'omubiri, nibo barikubagyemesereza kusharwa ahabwa kimwe kyonka, ngu batakaahiiganisibwa nibaturwa omusharaba gwa Kristo.

13Nangwa n'abasharwa nabo tibahitsya by'omu iteeka, kwonka benda ngu musharwe, babone kwesiima ahabw'emibiri yaanyu.

14Kwonka nikikabure! nyowe kugira ekirikuunyehimbisa, kureka omusharaba gwa Mukama waitu Yesu Kristo ogwareeteire ensi kubambwa ahariinye, naanye nkagibambwaho.

15Ahabw'okuba okusharwa nari okutasharwa ti kintu, kureka okuba ekihangirwe ekisya.

16Obusingye n'embabazi bibe ahari boona abaraakuratire eki naabahabura, kandi n'aha Baisiraeli aba Ruhanga.

17Okwiha hati hatarigira owanganzya; ahabw'okuba ntuura nyine enkojo za Yesu aha mubiri gwangye.

18Banyaruganda, embabazi za Mukama waitu Yesu Kristo zigume naimwe. Amiina.

← Chapter 5 Jump to: