Jonah 2

nyankole

← Chapter 1 Jump to: Chapter 3 →

1Bwanyima Yona ari omu nda y'ekyo kyenyanja, ashaba Mukama Ruhanga we ati:

2Ai Nyakubaho nkakutakira nyine enaku, wangarukamu, nkataka ndi omu nda y'Okuzimu owa Nyamuteza, wampurira.

3Manya okannaga omu maizi g'engyezi, ahagati y'enyanja, omwegyemure gwanyehinguririza, ebingonzi byawe by'amaani byona byandengyeraho.

4Naagira nti: Mbwenu reero naacuubwa omu maisho gaawe. Nyaruju yaawe erikwera ndyagireeba nta obundi?

5Amaizi ganshwekire, engyezi enyehinguririize, Amarebe gaanyezingiriire omu mutwe; omu mizi y'enshozi.

6Nshuumire naaza omu nsi ei empimbi zaayo zinkingiraniire kimwe; kwonka, ai Mukama Ruhanga wangye, amagara gangye ogatuuhwire okuzimu omu kiina.

7Ku naagwire enshazi, naakwijuka Iwe Nyakubaho, okushaba kwangye kwakuhikaho omuri Nyaruju yaawe erikwera.

8Abaramya ebishushani bitaine muhoho, baba batakiri beesigwa hariiwe.

9Kwonka nyowe ndyakutambira ekitambo ky'okukusiima. Eki naakuragaanisa nkihikiiriza; ahabw'okuba, ai Nyakubaho, niiwe ojuna.

10Nyakubaho atyo aragiira ekyenyanja, kitanaka Yona aha nkungu.

← Chapter 1 Jump to: Chapter 3 →