Jonah 3

nyankole

← Chapter 2 Jump to: Chapter 4 →

1Bwanyima Nyakubaho akagambira Yona obwa kabiri ati:

2Imuka oze Nineeve orurembo orwo oruhango orurangirire ebi ndikukutuma.

3Yona atyo aimuka, aza Nineeve nk'oku Nyakubaho yaamugambira. Reero Nineeve ekaba eri orurembo ruhango, orurikugyenderwa ebiro bishatu kurucwekanisa.

4Yona atandika kugyendagyenda omuri orwo rurembo, arenzya eizooba naayamuza ati: Hatsigaire ebiro makumi ana, Nineeve ecwekyerezibwe!

5Aba Nineeve baikiriza eki Ruhanga yaabagambira, baarangirira okwesiibyakwo, baajwara ebiguniya, okwiha aha mukuru okuta aha muto.

6Bwanyima enkuru yaahika omugabe wa Nineeve. Nawe yaimuka aha kitebe kye ky'obugabe, yaajuura bushuuti, yaajwara ebiguniya, yaashutama omu iju.

7Yaakora ekirangiriro, yaakibuzya omuri Nineeve ati: Ahabw'ekiragiro ky'omugabe n'abakungu be hatagira omuntu nari amatungo g'obusyo bw'ente nari obw'entaama, ebyaroza aha kintu. Bitagira eki byarya, nobu kwakuba okunywa amaizi;

8kureka abantu boona n'ebitungaanwa byona bijwekwe ebiguniya, biboroogyere Ruhanga. Kandi buzimazima buri muntu arekye emitwarize ye emibi, n'eby'obwinazi ebi arikukora.

9Mbwenu n'oha orikumanya ngu Ruhanga takaayegarukamu, akarekyera aho ekiniga kye ekingi, tukareka kufa.

10Ruhanga ku yaareebire ebi bakozire, n'oku barekire emitwarize yaabo emibi, nawe yaayegarukamu, yaareka ekifubiro ky'akabi eki yaabaire amaramaize kubaha, tiyaakibaha.

← Chapter 2 Jump to: Chapter 4 →