Judges 10

nyankole

← Chapter 9 Jump to: Chapter 11 →

1Abimeleki ku yaafiire, haimuka Toola mwene Pua, mwijukuru wa Dodo, ow'omu ruganda rwa Isakaari, kujuna Isiraeli. Akaba atwire Shamiri omu nsi y'ebibungo eya Efuraimu.

2Akaramurira Isiraeli emyaka makumi abiri n'eshatu, bwanyima yaafa, baamuziika Shamiri.

3Ogwo ku yaarugireho, haimuka Yairo Omugileadi, yaamara emyaka makumi abiri n'ebiri ari omuramuzi w'Abaisiraeli.

4Akaba aine abatabani makumi ashatu, abaabaire batemba endogoya nto makumi ashatu, baine endembo makumi ashatu, ezirikwetwa Haavoti-Yairo n'eri izooba, eziri omu nsi ya Gileadi.

5Bwanyima Yairo akafa, baamuziika Kamoni.

6Mbwenu Abaisiraeli bakagaruka baakorera Nyakubaho ekirikumugwisa kubi, baaramya Baabaali na Baashitarooti; baaruhanga ba Siriya, n'aba Sidoni, n'aba Moabu, n'ab'Abaamoni, n'ab'Abafilisiti; baimuura Nyakubaho, tibaamuramya.

7Nyakubaho yaagirira Abaisiraeli ekiniga kingi, yaabarekurira Abafilisiti n'Abaamoni.

8Baita kubi Abaisiraeli omuri ogwo mwaka. Baamara emyaka ikumi na munaana nibareebesa enaku Abaisiraeli abaabaire batwire seeri ya Yorudaani, omu nsi y'Abaamoni ey'omu Gileadi,

9kandi Abaamoni baayambuka Yorudaani kurwanisa Abaayuda, n'Abaabenyamiini, n'ab'oruganda rwa Efuraimu; baaguma nibaganzya munonga Abaisiraeli.

10Abaisiraeli nikwo kutakira Nyakubaho bati: Tukucumwireho, twakwimuura, Iwe Ruhanga waitu, twagaragira Baabaali.

11Nyakubaho nawe agira Abaisiraeli ati: Tindabajunire Abanyamisiri, n'Abaamori, n'Abaamoni n'Abafilisiti?

12Abaasidoni nabo n'Abaamaleki, n'Abaamaoni obu baabaita kubi mukampoogyera, ka naababajunire.

13Mbwenu, nk'oku muunyimwire, mukagaragira baaruhanga abandi, naanye tinkibajuna bundi.

14Nimwirooko, muhoogyere baaruhanga abu mwesiimiire, babe nibo baabajuna mugwirweho akabi.

15Abaisiraeli baagarukamu Nyakubaho bati: Tucumwire! Mbwenu otukore eki oraareebe ngu kihikire; kwonka nitukweshengyereza eri izooba otukize.

16Batyo baiha omuribo baaruhanga b'abanyamahanga, baaramya Nyakubaho; nawe yaagira obujune bwingi ahabw'enaku z'Abaisiraeli. Nawe tiyaabaasa kugumisiriza kureeba Abaisiraeli nibongyera kureebesibwa enaku.

17Bwanyima Abaamoni baahurura, baateera ensiisira omuri Gileadi; Abaisiraeli nabo baayeteerana, baasiisira Mizipa.

18Reero abantu bakuru aba Gileadi baabuuzana bati: N'oha oraabanze kurwanisa Abaamoni? Ogwo niwe araabe omukuru w'abatwire omuri Gileadi boona.

← Chapter 9 Jump to: Chapter 11 →