Judges 7

nyankole

← Chapter 6 Jump to: Chapter 8 →

1Bwanyima, Yerubaali, niwe Gideoni, hamwe n'abantu boona abu yaabaire aine, bakaimuka kare, baasiisira haihi na Eniharodi, orusiisira rw'Abamidiyani rubari aha bukiizi-bwa-bumosho omu ruhanga, haihi n'ekibungo Moore.

2Reero Nyakubaho yaagambira Gideoni ati: Abantu abu oine barengyesereize obwingi, nyowe okubasinguza Abamidiyani; Abaisiraeli batakaanyehimbisaho bakagira bati: Emikono yaitu niyo etujunire.

3Mbwenu irooko orangirire, abantu boona bakihurire, oti; Omuntu weena orikutiina kandi orikutetema, agarukye omuka. Gideoni atyo abagyeza; abantu obukumi bubiri n'enkumi ibiri bagarukayo; hatsigara kakumi.

4Nyakubaho agaruka agambira Gideoni ati: Abantu bakiri baingi ekihinguraine; bashuumye aha mugyera, mbakugyerezeho. Ou ndaagire nti: Ogu agyende naiwe, niwe araagyende naiwe, n'ou ndaakugire nti: Ogu atagyenda naiwe, atagyenda.

5Gideoni ashuumya abantu aha mugyera, Nyakubaho amugira ati: Omuntu weena oraajabe amaizi n'orurimi nk'embwa, omwegyekye hangahari, n'oraatsimbe amaju kunywa, omute ahakwe.

6Abaatahiise amaizi engaro bakagajabisa orurimi baaba magana ashatu, abandi boona baaganywa batsimbire amaju.

7Mpaho Mukama agambira Gideoni ati: Abantu magana ashatu abaajaba amaizi nibo ndaabajunise, nkakurekurira Abamidiyani, okabasingura. Mbwenu reka abandi boona bagarukyeyo, biri muntu omu ka ye.

8Gideoni abo Baisiraeli abaihaho entanda zaabo n'enzamba zaabo, aboohereza, buri muntu kugarukayo omu ihema rye; aguma n'abashaija magana ashatu bonka, orusiisira rw'Abamidiyani rumuri ahaifo omu ruhanga.

9Ekyo kiro Nyakubaho akagambira Gideoni ati: Imuka, oshuume, oteere orusiisira, ahabw'okuba naarukurekurira.

10Kwonka ku oraabe nootiina kuzayo wenka, shuuma omuri orwo rusiisira hamwe na Puura omugaragwa waawe.

11Haza noija kuhurira ebi barikugamba, otetuurukye, ogire amaani g'okuruteera. Atyo ashuuma n'omugaragwa we Puura, bahikira aha myanya erikubandizibwaho ey'engabo eziine eby'okurwanisa omuri orwo rusiisira.

12Obwo Abamidiyani n'Abaamaleki abantu boona ab'omu burugwa-izooba bateekire enteeko omu ruhanga, bari baingi nk'enzigye, n'engamira zaabo zitarikubarwa, ziri nyingi nk'omusheenyi gw'aha nyanja.

13Gideoni ku yaahikireyo, yaahurira omuntu naagambira mugyenzi we eki arootsire, naagira ati: Ndootsire ekirooto, naareeba akagaati ka sayiri kaija nikeekumbagaza omu rusiisira rw'Abamidiyani, kaahika aha ihema kaariteera, ryagwa ryakumbagara, ryabandama.

14Mugyenzi we amurootororera ati: Manya ekyo ti kindi, ni rurara ya Gideoni mwene Yoashi, omushaija w'omu Baisiraeli, ou Ruhanga arekuriire Abamidiyaani n'eihe ryona kubisingura.

15Gideoni ku yaahuriire eby'ekyo kirooto n'oku baakirootorora, yaatsimba amaju, yaaramya Ruhanga. Bwanyima yaagaruka omu rusiisira rw'Abaisiraeli, yaabagira ati: Nimwimukye. Manya Nyakubaho yaabarekurira eihe ry'Abamidiyani kurisingura.

16Abo bashaija be magana ashatu yaababaganisa omu mitwe eshatu; boona yaabakwatsa enzamba n'enyungu zirimu busha; baazitamu emuri.

17Yaabagira ati: Mumpangye amaisho; haza oku ndaagire, mube nikwo mwagira. Ku ndaahikye ah'orusiisira rurikutandikira, mukore eki ndaakore.

18Ku ndaateere enzamba hamwe n'abu nyine boona, naimwe muziteerere aha mbaju zoona ez'orusiisira, nimwamuza muti: Ahabwa Nyakubaho n'ahabwa Gideoni.

19Gideoni atyo n'abashaija igana abu yaabaire aine bahika ahu orusiisira rurikutandikira abantu baahirwayo, ah'abarinzi baihaihanira; batyo bateera enzamba, baata enyungu ezi baabaire bakwaitse.

20Egyo mitwe eshatu eteera enzamba, eyata enyungu; obwo bakwatiise emuri emikono yaabo ya bumosho, kandi eya buryo ekwaitse enzamba z'okuteera. Reero bayogoora bati: Rurara, ahabwa Nyakubaho n'ahabwa Gideoni.

21Buri muntu yaayemerera omu mwanya gwe, beehinguririize orusiisira; engabo z'Abamidiyani zoona zairuka niziyogoorekana, zaahunga.

22Abaisiraeli ku baateire enzamba magana ashatu, Nyakubaho yaareetera ab'omu ihe ryona kutukurana na rurara, omuntu naita mugyenzi we. Eihe ryabo ryahunga, ryahika Beetishiita ogurikugarura Zeerera, ryahika Abelimehoola, haihi na Tabati.

23Kandi Abaisiraeli ab'oruganda rwa Nafutaali, n'ab'orwa Asheri, n'ab'orwa Manaase boona, baahurura, baabinga Abamidiyani.

24Gideoni yaatuma entumwa omu nsi yoona ey'ebibungo eya Efuraimu, naagira ati: Mushuume, murwanise Abamidiyani, mubatangire aha maizi, okuhika Betibaara n'ahari Yorudaani. Batyo bahuruza abashaija ba Efuraimu boona, bakwata emyanya erimu amaizi, okuhika Betibaara na Yorudaani.

25Bakwata abategyeki babiri b'Abamidiyani, Orebu na Zeebu. Orebu bamwitira aha rukiri rwa Orebu, na Zeebu bamwitira aha inyuukiro rya viino erya Zeebu, obwo babingire Abamidiyani. Bareetera Gideoni emitwe, ogwa Orebu n'ogwa Zeebu, seeri ya Yorudaani.

← Chapter 6 Jump to: Chapter 8 →