Mark 16

nyankole

← Chapter 15 Jump to:

1Sabato ku yaahwaire, Mariya Magadaleena na Mariya nyina wa Yakobo na Saalome baagura eby'omugaju by'okuza kumusiiga.

2Omu kasheeshe munonga aha kiro ky'okubanza omu wiiki, baaza aha kituuro eizooba ryaturukire;

3baagambirana bati: N'oha oraatukumbagarize eibaare kuriiha aha munwa gw'ekituuro?

4Ku baanagireyo amaisho, baareeba eibaare, eryabaire riri rihango munonga, rikumbagaziibwe.

5Ku baataahire omu kituuro, baareeba omutsigazi ojwaire ekanzu erikwera, ashutami aha rubaju rwa buryo; baatangaara.

6Kwonka we yaabagira ati: Murekye kutangaara, manya nimusherura Yesu owa Nazareeti obambirwe aha musharaba. Azookire, tari aha; nimureebe ahi babaire bamutaire.

7Mbwenu nimwirooko, mugambire abatendekwa be na Petero, ku yaabeebembera kuza Galilaaya; niyo muraamureebere nk'oku yaabagambiire.

8Abo bakazi baashohora, baaruga aha kituuro, bairuka baine orutetema kandi nibatangaara; haza tibaagira muntu weena ou baakigambira, ahabw'okuba bakaba bahahaire omutima. [

9Yesu, ku yaazookire omu kasheeshe, aha kiro ky'okubanza omu wiiki, yaabanza kubonekyera Mariya Magadaleena, ou yaabaire abingireho ebyago mushanju.

10Nawe yaagyenda, yaabigambira abu Yesu yaabaire atuura nabo, abaabaire nibacura, nibarira.

11Kwonka ku yaabagambiire ngu ahuriire, kandi ngu yaamureeba, tibaikiriza.

12Ebyo ku byahwaire, Yesu yaayeyoreka babiri ahari bo abaabaire nibaza omu kyaro, naashusha okundi.

13Abo nabo baagarukayo, baabigambira abandi; kwonka nabo tibaabaikiriza.

14Bwanyima yaayeyoreka eikumi n'omwe nibarya. Yaabajuukirira ahabw'okutaikiriza n'okugangaaza emitima, ahabw'okuba tibaraikiriize by'abaamureebire aherize kuzooka omu bafiire.

15Kandi yaabagira ati: Mugeyende omu nsi yoona, murangirire ebihangirwe byona Amakuru Marungi.

16Oriikiriza akabatizibwa, aryajunwa; kandi otariikiriza, aryasingwa orubanja.

17Obu nibwo bumanyiso obu abaikiriza barimanyirwaho: baryabinga ebyago omu iziina ryangye, baryagamba endimi nsya;

18baryakwata enjoka, kandi ku barinywa ekirikwita kyona tikiribakora kubi; baryata engaro aha barwaire, bakire.

19Mpaho Mukama Yesu, ku yaaherize kugamba nabo, yaatwarwa omu iguru, yaashutama aha rubaju rwa buryo orwa Ruhanga.

20Nabo baagyenda, baarangirira hoona, Mukama naakorera hamwe nabo kandi naahamya obutumwa bwabo n'obumanyiso obwabaire bukuratana nabwo. Amiina.] [ Abahandiiki abamwe tibatamu mishororongo 9-20. Kandi abandi bahandiiki omu mwanya gw'emishorongo egyo bahendera Mariko n'ebigambo ebi: Abo bakazi, byona ebi baagambiirwe, baagyenda baabiteekyerereza Petero na bagyenzi be omu bigufu. Ebyo ku byahwaire, Yesu wenka yaatuma abo batendekwa be kurangirira hoonahoona amakuru ge agarikwera kandi agahuriire ag'okujunwa kw'ebiro n'ebiro. ]

← Chapter 15 Jump to: