Mark 3

nyankole

← Chapter 2 Jump to: Chapter 4 →

1Yesu akagaruka yaataaha omu iteeraniro; haashangwa harimu omuntu okokootsire omukono.

2Baaguma bamutaireho eriisho, kureeba yaaba araamukize ahari Sabato, babone kugira eki baraiheho kumurega.

3Yaagira ogwo muntu okokootsire omukono ati: Ija aha ahagati.

4Bwanyima yaababuuza ati: Nikiikirizibwa eiteeka ahari Sabato kukora ebirungi, nari okukora ebibi? Okukiza amagara, nari okugahwerekyereza? Kwonka bo baafa mamigye.

5Yaababuzyamu amaisho abainiire ekiniga, yaabasaasibwa ahabw'okureeba emitima yaabo egangaire etyo. Nikwo kugira ogwo mushaija, ati: Gorora omukono gwawe. Onu yaagugorora, gwakira.

6Abafarisaayo baashohora, ahonaaho baatandika kumucumira enaama mbi n'ab'ekigombe ky'aba Herode, nibahanuura oku baraamwite.

7Yesu yaarugayo n'abatendekwa be, yaaza aha rubaju rw'enyanja; abantu baingi munonga, abaarugire Galilaaya, baamukuratayo; kandi abandi baingi abaarugire Buyudaaya,

8na Yerusalemu, na Idumaaya, n'obuseeri bwa Yorudaani, n'ab'ebirorero ebyehinguririize Tuuro na Sidoni, abaabaire baahuriire byona ebi akozire, baamwijaho.

9Yaashaba abatendekwa be kumutungira obwato ahabw'okutenda bantu baingi kumumiga.

10Manya akaba akirize abantu baingi. Boona abaabaire nibagangibwa endwara z'emiringo yoona bakaba nibahimintika kumukoraho.

11Kandi n'abaabaire bariho ebyago, ku baabaire bamureeba, bamugwa omu maguru, baborooga bati: Ori Omwana wa Ruhanga.

12Kwonka we abeehanangiriza munonga kutamubuzya mu bantu.

13Bwanyima Yesu akainamuka omu rushozi, yaayeta abu yaayenzire; batyo baija ahu ari.

14Yaabatooranamu ikumi na babiri kuguma nawe n'okubatuma kurangirira Amakuru Marungi;

15kandi yaabaha obushoboorozi bw'okubinga ebyago.

16Nibo aba, Simooni ou yaayetsire Petero,

17Yakobo mwene Zebedaayo na Yohaana murumuna wa Yakobo, bombi abu yaayetsire Boneregye, amakuru gaaryo ngu, abaana abarikuhinda makuba;

18taho Andereya, Filipo, Baritolomaayo, Matayo, Tomasi, Yakobo mwene Alufaayo, Tadaayo, Simooni enkunzi y'eihanga,

19na Yuda owa Kariota, owaabaire ari ow'okumureebya. Bwanyima yaataaha omuka owaabo,

20kandi ekimbuuro ky'abantu nabwo kyateerana, n'ahabw'ekyo Yesu n'abatendekwa be tibaabaasa na kurya.

21Abaabo, ku baakihuriire, baija kumutwara, ahabw'okuba bakaba nibagira ngu ashazire.

22Abahangu b'eiteeka abaarugire Yerusalemu bakaba nibagira ngu aine Beelizebuli, kandi ngu ebyago naabibingisa obushoboorozi bwa Beelizebuli ogwo, omukuru waabyo.

23Atyo yaabeeta kwija ahu ari, yaabagambira, yaabacwera enfumu, ati: Sitaane naabaasa ata kubinga Sitaane?

24Manya obugabe, ku bwebaganisamu, tibugumaho;

25n'eka, ku eyebaganisamu, tegira bu ehamire.

26Mbwenu Sitaane ku araabe ayerwaniise, akeetaanisamu tarikubaasa kugumaho, biri omuheru gwe gwahika.

27Manya tihariho n'omwe obaasa kutaaha omu nju y'omuntu w'amaani, akanyaga ebye atabandize kumuboha, reero akabona kwaya eby'omu nju ye.

28Buzimazima nimbagambira nti: Ebibi byona ebi abantu bakora, otaireho n'eby'okurogota, baryabisaasirwa.

29Kwonka orirogota ahari Mutima Orikwera tarisaasirwa ebiro byona, ahabw'okuba aryaguma asingirwe orubanja rw'ekibi ekitarimurugaho.

30Ekyo akakigamba ahabw'okuba bakagira ngu ariho ekyago.

31Nyina na barumuna ba Yesu bakaija, baaguma beemereire aheeru, baamutumaho nibamweta.

32Obwo omutwe gw'abantu ku gwabaire gushutami gumwehinguririize, abaatumirwe nikwo kumugira bati: Reeba, nyoko na barumuna baawe bari aheeru nibakwenda.

33Yaagarukamu ati: Maawe n'oha, na barumuna bangye ni baahi?

34Atyo yaabuzya amaisho omu baabaire bashutami bamwehinguririize, yaagira ati: Maawe na barumuna bangye n'aba!

35Weena okora eki Ruhanga akunda, niwe murumuna wangye, niwe munyaanyazi, kandi niwe maawe.

← Chapter 2 Jump to: Chapter 4 →