Romans 13

nyankole

← Chapter 12 Jump to: Chapter 14 →

1Omuntu weena ayorobere abaine obushoboorozi bw'okutegyeka, ahabw'okuba tihariho butegyeki obutaruga hari Ruhanga; kandi abategyeki abariho bakateebwaho Ruhanga.

2N'ahabw'ekyo ogomera abategyeki, aba agomeire ekyatairweho Ruhanga, kandi abagoma beesingisa orubanja.

3Manya abategyeki tibaba b'okutiinisa abarikukora gye, kureka abarikukora kubi. Nooyenda kutatiina orikutegyeka? Mbwenu nu kora gye, haza naija kukusiima.

4Manya we n'omuheereza wa Ruhanga ow'okukureetera ebirungi. Kwonka ku oraakore kubi, tiina, ahabw'okuba takwatira busha rurara. N'omuheereza wa Ruhanga kufubira owaakora kubi.

5N'ahabw'ekyo mushemereire kworoba, ti habw'okutiina ekiniga kya Ruhanga kwonka, kureka n'ahabw'okuhaburwa omutima.

6Nikyo muheera emishoro, ahabw'okuba nabo n'abaheereza ba Ruhanga abeehayo kukora ogwo murimo.

7Mwihure boona ebi barikubaihuza: abarikushoza omushoro mugubahe, abarikuhooza empooza mugibahe, ab'okutiinwa mubatiine, ab'ekitiinwa mukibahe.

8Mutarigira eibanja aha muntu weena, kureka ery'okukundana; ahabw'okuba okunda mutaahi we, aba ahikiriize eiteeka.

9Manya ebiragiro bigira biti: Otarishambana, Otariita, Otariiba, Otaryetenga kubi, n'ebindi biragiro, byona biteeranirwa omu kigambo ekirikugira kiti: Kunda mutaahi waawe nk'oku oyekunda.

10Oine rukundo takora mutaahi we kubi, n'ahabw'ekyo rukundo niyo ehikiiriza eiteeka.

11Kandi ekindi, nimumanya ku obu nibwo bunaku, eshaaha yaahika, imwe kusisiimuka omu turo; ahabw'okuba okujunwa kutwiriire haihi okukira obu twaikiriza.

12Ekiro kyahwaire, bwagiire kusheesha. Mbwenu ka turekyere aho kukora eby'omu mwirima; tujware eby'okurwanisa eby'omushana.

13Tutwaze gye nk'oku kitwazibwa nyomushana, tutarikwecuutiira byokurya, tutarikusinda, tutarikushambana n'okukora eby'enshoni, tutarikutongana n'okugirirana eihari.

14Kureka mwekwate Mukama Yesu Kristo, murekye kuha omubiri obwiho bw'okukora ebibi bi gurikwetenga.

← Chapter 12 Jump to: Chapter 14 →