Romans 2

nyankole

← Chapter 1 Jump to: Chapter 3 →

1N'ahabw'ekyo, iwe muntu 'we ocwera ondi orubanja, toine ky'okwekwatsa. Manya omu kurumucwera, naiwe oba noorwesingisa, ahabw'okuba naiwe kirucwa okora nk'ebyo.

2Nitumanya ku orubanja oru Ruhanga acwera abakora nk'ebyo, ruba ruhikire.

3Iwe muntu 'we ocwera abakora nk'ebyo orubanja, haza naiwe noobikora, nooteekateeka ngu oryakira orubanja oru Ruhanga arikucwera?

4Nainga shi nooyekiitira embabazi ze enyingi n'okukwata mpora kwe n'okugumisiriza kwe, haza otarikumanya ku ezo mbabazi za Ruhanga nizo zikureetera kwegarukamu?

5Kwonka ahabw'okugangaara kw'omutima gwawe ogutarikwenda kweteisa, oyebiikiire ekiniga ekiribaho aha kiro ky'ekiniga, eki Ruhanga arishuuruuriraho encwa ye y'orubanja ehikiriire,

6akazimuurira buri omwe nk'ebi yaakozire oku biri.

7Obwo abenda kutunga ekitiinwa n'okusiimwa n'okutafa, abagumisiriza nibakora ebirungi, aryabaha amagara agatahwaho.

8Abandi ab'empaka kandi abatoorobera mazima, kureka bakeeroha omu bibi, Ruhanga aryabafubira n'ekiniga.

9Omuntu weena okora ebibi, aryabonabonesibwa, areebe enaku, okubandiza aha Muyudaaya okuhika aha Muguriiki.

10Kandi omuntu weena okora ebirungi, aryaheebwa ekitiinwa, asiimwe kandi agire obusingye, okubandiza aha Muyudaaya okuhika aha Muguriiki.

11Manya Ruhanga tashoroora mu bantu.

12Boona abaakozire ebibi batarikumanya iteeka, baryahwerekyerera batarikuturwa iteeka. Kandi boona abaakozire ebibi nibamanya eiteeka, baryacwerwa orubanja nk'oku eiteeka riri.

13Ahabw'okuba abahurira eiteeka kwonka, tibo bahikiriire ahari Ruhanga, kureka abakora ebi eiteeka riragiira, nibo baribarwa kuba abahikiriire.

14Abanyamahanga abatagira iteeka, omu buhangwa ku bakora eki eiteeka riragiira, bo bonka beebeera eiteeka, nobu baba bataine eryo iteeka.

15Booreka ku eki eiteeka ryenda, kihandiikirwe omu mitima yaabo. Haza obwo eiraka ry'omu mitima yaabo riba nirikihamya, kandi ebiteekateeko byabo biba nibibashinja nari nibibahakanira.

16Nikwo kiriba n'aha izooba eri Ruhanga aricwisizaho Yesu Kristo orubanja rw'ebi abantu baakozire omu mubonano, nk'oku kiri omu Makuru Marungi agu naatumirwe kurangirira.

17Kwonka iwe oyeyeta Omuyudaaya, okabukaarira omu iteeka, okeehimbisiza omuri Ruhanga;

18okamanya ebi arikwenda, okasiima ebirikukira oburungi ahabw'okwegyesibwa eby'omu iteeka;

19iwe oyesiga ku ori omwebembezi w'empumi kandi ohwezesa abari omu mwirima,

20omuhabuzi w'abataine bwengye, omwegyesa w'abaana bato, ahabw'okuba omu iteeka okumanya kwona n'amazima goona nimwo biba.

21Mbwenu iwe, oyegyesa abandi, toyeyegyesa? Iwe, orangirira abandi okutaiba, oiba?

22Iwe, ogira ngu omuntu tashemereire kushambana, oshambana? Iwe, onuga ebishushani ebiramibwa, oiba eby'omu ndaaro?

23Iwe, oyehimbisiza omu iteeka, ogayisa Ruhanga noorihenda?

24Manya kikahandiikwa ngu Eiziina rya Ruhanga nirijumwa omu Banyamahanga ahabwanyu.

25N'ekya buzima, okusharwa nikugasha waaba noohitsya eiteeka, kureka ku orikuhenda eiteeka, biri okusharwa kwawe kwahinduka nk'otakasharwaga.

26Mbwenu shi omuntu otashazirwe ku araabe naahitsya ebiragiro by'omu iteeka, Ruhanga tarikwija kumubara nk'oshazirwe?

27Nari omuntu otashazirwe mubiri, kwonka akahitsya eby'omu iteeka, tarikusingisa orubanja iwe orikuhenda eby'omu iteeka, haza oine ebyahandiikirwe omu iteeka kandi oshazirwe?

28Manya Omuyudaaya kashushu tiwe ogwo oreeberwa omu byaharuguru; n'okusharwa okw'amazima tikwo okwo okw'aharuguru aha mubiri.

29Kureka Omuyudaaya kashushu niwe ogwo ow'omunda; n'okusharwa okw'amazima n'okw'omu mutima kutari kw'omu bihandiiko by'eiteeka, kureka okw'omuri Mutima. Okusiimwa kw'ogwo muntu tikuruga ha bantu, kureka ahari Ruhanga.

← Chapter 1 Jump to: Chapter 3 →