Ruth 2

nyankole

← Chapter 1 Jump to: Chapter 3 →

1Mbwenu Naomi akaba aine omunyabuzaare w'omu b'oruganda rwa iba, omushaija omutungi rugambwa, ow'omuryango gwa Elimeleki, orikwetwa Boazi.

2Reero Ruuti Omumoabukazi yaagira Naomi ati: Ka nze omu misiri, mpumbe ebishiisha by'engano ebiraatsigare omu kibuba, nkuratiire orangirire embabazi. Naomi amugarukamu ati: Irooko, mwana wangye!

3Onu atyo aimuka, agyenda, ahumba omu misiri naakuratira abagyesi. Kyakahiire, arugaho ahika aha kicweka ky'emisiri ekyabaire kiri ekya Boazi, ow'omu b'omu muryango gwa Elimeleki.

4Ago magingo Boazi aruga Beetelehemu, aramutsya abagyesi ati: Mukama agume naimwe! Nabo bamugarukamu bati: Nyakubaho akuhe emigisha!

5Reero Boazi abuuza omunyampara orikureeberera abagyesi ati: Ogu mwishiki n'ow'oha?

6Nyampara amugarukamu ati: Omwishiki ogu, n'Omumoabukazi owaizire na Naomi, naaruga omu nsi y'Abamoabu.

7Yangira ati: Naakweshengyereza, nyikiriza mpumbe, kandi nshanguruze, mpitsye emishamato y'engano, ninkuratira abagyesi. Atyo aija, agumizamu naahumba okwiha omu kasheeshe okuhitsya aga magingo atahuumwireho mu nju, nangwa nobu kaakuba akaanya kakye.

8Mpaho Boazi agira Ruuti ati: Mbwenu, mwana wangye, hurira. Otaza kuhumba omu gundi musiri gwona, okatsigaho ogu, kureka ogume haihi n'abazaana bangye.

9Gumya amaisho aha barikugyesha, ogyende obakuratiire. Reeba, naaragiira abatsigazi ngu hatagira owaakuganzya. Kandi ku oraagire eiriho, oze ah'enyungu ziri, onywe aha maizi gu baataha.

10Ogwo mwishiki ajuumara aha nsi, amugira ati: Naahiirwa nta, kureeba nongirira embabazi, okantaho omutima, haza ndi omunyamahanga?

11Boazi amugarukamu ati: Banshoboororera gye byona ebi okoreire nyokozaara okwiha obu baro yaafa, n'oku waatsigireho sho na nyoko n'eihanga ryanyu, okaija omu bantu bu otarikumanya.

12Nyakubaho akuzimuurire ebi waakozire! Mukama Ruhanga wa Isiraeli ou ohungiireho, akuhe ebihembo biijwire!

13Ruuti amugarukamu ati: Mukama wangye, wangirira embabazi nyingi, kureeba n'ompuumuriza, noogamba gye naanye omuzaana waawe, nobu ndaabe ntari w'omu bazaana baawe.

14Obunaku bw'okurya ku bwahikire Boazi yaamugira ati: Ija aha, orye ebyokurya, okoze ekitongye kyawe omu viino. Nawe atyo ashutama aha rubaju rw'abagyesi, n'onu amuha embumburi ya sayiri ekarangire, arya, ahaaga, bimuremeraho.

15Ku yaimukire kuhumba, Boazi yaaragiira abatsigazi be ati: Mumurekye ahumbe n'omu biba, mutamugambira kubi;

16kandi mumushohoororere ezindi ngano omu biba, muzimurekyere azihumbe mutamukabukira.

17Atyo ahumba omuri ogwo musiri okuhitsya omu mwabazyo. Bwanyima ahuura ebi yaahumba, bihitsya ekitenga kya sayiri.

18Agyekorera, aza omu kirorero, ayoreka nyinazaara ebi yaahumba, kandi amwihirayo ebyokurya ebyatsigaraho yaaheza kuhaaga, abimuha.

19Nyinazaara nikwo kumubuuza ati: Beitu eri izooba waahumba hi? Kandi waakora hi? Ogwo mushaija waakwetaho, naakagire emigisha! Ruuti agambira nyinazaara ou yaakora nawe. Amugira ati: Ogwo mushaija ou naakora nawe eri izooba, naayetwa Boazi.

20Naomi nawe agira omukaamwana ati: Nyakubaho, otakaburaga kugirira embabazi abahuriire n'abafiire, naakahe emigisha ogwo mushaija! Naomi ayongyera amugira ati: Manya ogwo mushaija twine nawe obuzaare bwa haihi.

21Ruuti Omumoabukazi amugira ati: Kandi ekindi yaagira ati: Ogume haihi n'abakozi bangye, okuhitsya obu baraashaaruure emisiri yangye yoona ei barikugyesha.

22Naomi agarukamu Ruuti omukaamwana ati: Mwana wangye, ni kirungi okugyenda n'abazaana be, okukira okuza omu gundi musiri ei baakukuganzya.

23Ruuti okwiha obwo yaaguma haihi n'abazaana ba Boazi, naahumba, okuhitsya obu baahereize kimwe kushaaruura sayiri n'engano; kandi yaaguma na nyinazaara.

← Chapter 1 Jump to: Chapter 3 →