Ruth 4

nyankole

← Chapter 3 Jump to:

1Ebyo ku byahwaire, Boazi yaagyenda, yaaza aha irembo, yaashutamaho. Ago magingo, ow'obuzaare bwa haihi ou yaagambire ku yaizire naahingura, Boazi yaamugira ati: Iwe mushaija 'we, ija, obe oshutami aha! N'onu akubuuka, ashutama.

2Kandi Boazi omu bantu bakuru b'omuri ekyo kirorero, atooranamu abashaija ikumi, abagira ati: Naimwe nimushutame aha, nabo bashutama.

3Mpaho agambira ogwo munyabuzaare wa haihi ati: Naomi, ogarukire naaruga omu nsi ya Moabu, naatunda ekibanja ekyabaire kiri ekya mwene waitu Elimeleki.

4Nikyo nteekateekyeire kukikugambira, ngu okigure aba bantu bashutami aha, n'abakuru b'oruganda rwaitu bariho. Mbwenu ku oraabe noija kukicungura, kicungure; kwonka ku oraabe otarikwenda, ongambire, nkimanye. Manya tihariho ondiijo weena ow'okukicungura, kureka iwe naanye orikukukurata. Nawe amugira ati: Eego, niinyija kukicungura.

5Reero Boazi amugira ati: Eizooba ri oraagurireho ekyo kibanja na Naomi, niryo oraagurireho na Ruuti Omumoabukazi muka nyakufa, eiziina rya nyakufa ribone kuguma niriijukirwa aha butaka bwe.

6Omunyabuzaare wa haihi agarukamu ati: Nyowe tindikwija kukyecungurira, ntakaafeerwa ekyangye eky'obuhunguzi. Mbwenu, ba niiwe waakicungura omu mwanya gwangye. Nyowe tindikwija kukicungura.

7Mbwenu obunyakare omu Isiraeli, ogu nigwo gwabaire guri omucwe gw'okucungura n'okuhingisa ebintu. Ku baabaire benda kuhamya eki baraakore, omuntu akaba ajuura enkaito agiha mugyenzi we ou arikuragaana nawe. Ogwo guri omuringo gw'okuhamya endagaano omu Baisiraeli.

8N'omunyabuzaare wa haihi ku yaagambiire Boazi ati: Ba niiwe waakyegurira, yaajuura enkaito.

9Mpaho Boazi agambira abakuru bari n'abantu boona ati: Eri izooba niimwe bajurizi b'okuhamya ku naagura na Naomi ebintu byona ebyabaire biri ebya Elimeleki, n'ebya Kilioni byona, kandi n'ebya Mahalooni.

10Na Ruuti Omumoabukazi owaabaire ari muka Mahalooni nawe naamuguriramu kuba omukazi wangye, eiziina rya nyakufa ribone kuguma niriijukwa. Eryo iziina ritaribuza obutsibyo omuri beene ishe, n'ahaka ye. Mbwenu eri izooba, niimwe baakareebi.

11Boona abaabaire bateeraniire aha kirorero n'abakuru omu ruganda baagira bati: Turi baakareebi. Ogwo mukazi ou waaza kutaasya, Nyakubaho amugire nka Rakeeli na Leeya abaayombekire kumwe eka ya Isiraeli. Naiwe nookagogyeere omuri Efuraati, okarangaanwa omuri Beetelehemu!

12N'eka yaawe neekabe nk'eya Pereezi, ou Yuda yaazaire ahari Tamari, ahabw'abaana bu Nyakubaho arikuheera omuri ogu mukazi muto.

13Boazi atyo atwara Ruuti, aba omukazi we. Ateerana nawe, Nyakubaho amuha omugisha, abaka enda, azaara omutabani.

14Reero abakazi bagira Naomi bati: Nyakubaho otaakureka eri izooba kuguma otaine w'obuzaare bwa haihi, ahimbisibwe, n'eiziina rye rirangaanwe omuri Isiraeli!

15Ogu mwana n'ow'okukugaruramu amagara, n'okukuriisa, waahika omu ngingo za bukuru. Manya, mukaamwana waawe okukunda, kandi orikukukirira abaana baboojo mushanju, niwe yaamuzaara.

16Mpaho Naomi aihaho omwana, amukiikira, aba omurezi we.

17Abakazi bataahi be bamweta eiziina, nibagira bati: Omwana omwojo azaariirwe Naomi. Batyo bamweta Obedi; niwe ishe wa Yese, ishe wa Daudi.

18Mbwenu, aba nibo baijukuru ba Pereezi: Pereezi akazaara Hezirooni,

19Hezirooni yaazaara Raamu, Raamu yaazaara Aminadabu,

20Aminadabu yaazaara Nahashoni, Nahashoni yaazaara Salumooni,

21Salumooni yaazaara Boazi, Boazi yaazaara Obedi,

22Obedi yaazaara Yese, na Yese yaazaara Daudi.

← Chapter 3 Jump to: