2 Timothy 1

Oromo Bible (WAADAA LAMMATAA) 2013

Jump to: Chapter 2 →

1Ani Phaawuloos waadaa jireennaa ka Yesuus Kiristoosiin kenname akka himuuf fedha Rabbiitiin ergamaa Yesuus Kiristoosii ta'e irraa:

2Ilma kiyya jaalatamaa Ximootewoosiif. Rabbii Aabbaa fi Gooftaa keenna Yesuus Kiristoosiin irraallee badhaadha, araaraa fi nagaya sii haa kennu.

3Halkanii fi guyyaa uduu addaan hin kuttin, kadha'aan waan si yaadadhuuf akka abbootii tiyyatitti Rabbii sammuu qulqullu'uun kaddaamu hin galateeffadha.

4Imimmaan kee yaada'aati gammachu'uun guuttamu'uu fi si arguu hawwa.

5Amantaa uf jajuu hin qabne ta si keessa jirtu hin qaabadha. Amantaan kunillee dura akaakayyuu kee Loyiddiin haadha tee Ewunqee keessa ture. Akkasuma amantaan sun si keessallee akka jiru hubadheera.

6Sababaa kanaan akka nama ibidda qabsiisuutitti kennaa Rabbii ka harka kiyya sirra kaayu'uun argatte san akka kakkaaftu si qaabsisa.

7Rabbi Ayyaana hunnaatii fi ka jaalala, ka uf qabu'uu nuu kenne malee, Ayyaana soda'aa nuu hin kennine.

8Eegasuu waan Goofta'aa ragu'uuf yookiin anaa waan Goofta'aatiif hidhamettillee hin saalfatin, haata'uu ammoo haga hunna Rabiitiin waan Oduu Nagayaatiif na woliin rakkadhu.

9Ka nu fayyisee fi ka waamsa woyyu'uun nu waame Rabbiin waan ta'eef, kunillee akka yaada isaatiif haga badhaadha isaatiin malee, akka hujii keennaatiinii miti. Badhaani kun bara hedduun dura Yesuus Kiristoosiin irraan nuu kenname.

10Amma ammoo dhufuu fayyisa'aa fi qorsa keenna karaa Yesuus Kiristoosiitiin mudhateera.

11Inni du'a waan mooyateeruuf, ani lallabaa Oduu Nagayaa, ergama'aa fi barsiisaa worra Yihuudota hin taanee akka ta'u, Oduu Nagayaa itti muudame kanaan jireennaa fi bara baraan jiraachuu ifatti baaseera.

12Sababaa kanaan rakkinni narra gayeera. Haata'uu ammoo rakkinna narra gaye kanaan hin saalfadhu; ka amane waan beekuuf, yaboo itti kenne haga gaafa guyyaa sanii akka eeguu danda'u hubadheera.

13Amanta'aa fi jaalala Yesuus Kiristoosiitiin dubbii narraa dhageette, fakkeenna mishaa san jabeessii qabadhu.

14Yaboo mishaa san Ayyaana Woyyuu nu keessa jiru san eegi.

15Worri Esiyaa keessa jiran maruu, akka narraa fagaatan hin beeta; isaan keessaa Filoqoosii fi Herwaageenesiin fa'a.

16Gooftaan maatii Henesifooru'uutiif haa araaramu, hennaa hedduu waan hara na baafachiisaniiraniif.

17Inni hidhamuu kiyyattillee hin saalfanne. Hennaa Roomaa ture san soqee, soqee na arge.

18Guyyaa dhumaa san Gooftaan isaa haa araaramu. Efesoonittillee attamitti akka na tajaajile atuu sirri'itti beetta.

Jump to: Chapter 2 →