Luke 1

Odia NTS2024 2024 (ದೆವಾಚಿ ಖರಿ ಖಬರ್)

Jump to: Chapter 2 →

1ಪ್ರಿತಿಚ್ಯಾ ಥಿಯೊಫಿಲಸ್. ಲೈ ಲೊಕಾನಿ ಅಮ್ಚ್ಯಾ ಮದ್ದಿ ಹೊಲ್ಲಿ ಸಗ್ಳಿ ವಿಶಯಾ ಕವ್ಡೆ ಹೊತಾ ತವ್ಡೆ ಬರೆ ಕರುನ್ ಲಿವ್ಕ್ ಕಟ್ಪಟ್ಲ್ಯಾನಾತ್.

2ಹೆ ಸುರು ಹೊಲ್ಲ್ಯಾಕ್ನಾ ಡೊಳ್ಯಾನ್‍ ಡೊಳೊಬರ್ ಬಗಟಲ್ಲ್ಯಾನಿ ಅನಿ ಅಮ್ಕಾ ಬರಿ ಖಬರ್ ಸಾಂಗಲ್ಲ್ಯಾನಿ ಸಾಂಗಲ್ಲ್ಯಾ ಸರ್ಕೆಚ್ ತೆನಿ ಲಿವ್ಲ್ಯಾನಾತ್.

3ತೆಚೆಸಾಟ್ನಿ,ಸುರು ಹೊಲ್ಲ್ಯಾಕ್ನಾ ಮಿಯಾಬಿ ಬರೆ ಕರುನ್ ಹೆ ಶಿಕ್ಲೊ ಅನಿ ತುಜ್ಯಾಸಾಟಿ ಎಕಾಚ್ಯಾ ಫಾಟ್ನಾ ಎಕ್ ವಿಶಯ್ ಬರೆ ಕರುನ್ ಪುಸ್ತಕ್ ರುಪಾತ್ ಲಿವ್ನ್ ಥವ್ತಲೆ ಬರೆ,ಮನುನ್ ಮಾಕಾ ದಿಸ್ಲೆ.

4ತುಕಾ ಶಿಕ್ವಲ್ಲೆ ಸಗ್ಳೆ ಖರೆ ಮನುನ್ ದಾಕ್ವುನ್ ದಿವ್‌ಸಾಟ್ನಿ ಮಿಯಾ ಹೆ ಸಗ್ಳೆ ಲಿವ್ನ್ ಥವ್ಲಾ.

5ಹೆರೊದ್ ಮನ್ತಲೊ ಜುದೆಯಾ ಮನ್ತಲ್ಯಾ ಪ್ರಾಂತ್ಯಾಚೊ ರಾಜಾ ಹೊವ್ನ್ ಹೊತ್ತ್ಯಾ ಕಾಲಾತ್, ಅಭಿಯಾ ಮನ್ತಲ್ಯಾ ಯಾಜಕಾಚ್ಯಾ ವರ್ಗಾಚೊ ಜೆಕರಿಯಾ ಮನ್ತಲೊ ಎಕ್ಲೊ ಯಾಜಕ್ ಹೊತ್ತೊ, ತೆಚ್ಯಾ ಬಾಯ್ಕೊಚೆ ನಾವ್ ಎಲಿಜಾಬೆತ್ ತಿ ಆರೊನಾಚ್ಯಾಚ್ ಘರಾನ್ಯಾಚಿ.

6ತೆನಿ ದೊಗೆಬಿ ದೆವಾಚ್ಯಾ ನದ್ರೆತ್ ಬರೆ ಹೊತ್ತೆ, ಅನಿ ಸರ್ವೆಸ್ವರ್ ದೆವಾಚ್ಯಾ ಗೊಸ್ಟಿಯಾ ಅನಿ ಖಾಯ್ದೆ ಬರೆ ಕರುನ್ ಪಾಳಿತ್, ತೆನಿ ಕಸ್ಲ್ಯಾಬಿ ಚುಕೆತ್ ನತ್ತ್ಯಾನಿ.

7ಖರೆ ತೆಂಕಾ ಪೊರಾ ನತ್ತಿ. ಕಶ್ಯಾಕ್ ಮಟ್ಲ್ಯಾರ್ ಎಲಿಜಾಬೆತ್ ವಾಂಜ್ಡಿ ಹೊತ್ತಿ. ಎಲಿಜಾಬೆತ್ ಅನಿ ಜೆಕರಿಯಾ ಲೈ ಮ್ಹಾತಾರೆ ಹೊಲ್ಲೆ.

8ಎಕ್ ದಿಸ್ ಅಪ್ನಾಚಿ ಪಾಳಿ ಯೆಲ್ಲ್ಯಾ ತನ್ನಾ ಜೆಕರಿಯಾ ದೆವಾಚ್ಯಾ ಗುಡಿತ್ ಅಪ್ನಾಚೆ ಯಾಜಕಾಚೆ ಕಾಮ್ ಕರಿ.

9ಯಾಜಕಾಂಚ್ಯಾ ಪದ್ದತಿ ಸರ್ಕೆ ದೆವಾಚ್ಯಾ ಗುಡಿತ್ ಧುಪ್ ಘಾಲುಕ್ ಮನುನ್ ಜೆಕರಿಯಾಕ್ ಚಿಟಿಯಾ ಘಾಲುನ್ ಎಚುನ್ ಕಾಡಲ್ಲ್ಯಾನಿ.

10ಭುತ್ತುರ್ ಧುಪ್ ಘಾಲ್ತಾನಾ, ಭಾಯ್ರ್ ಲೊಕಾಂಚೊ ತಾಂಡೊ ಮಾಗ್ನಿ ಕರುಂಗೆತ್ ಹೊತ್ತೊ.

11ತನ್ನಾ ಧುಪ್ ಜಾಳ್ವುತಲ್ಯಾ ಅಲ್ತಾರಿಚ್ಯಾ ಉಜ್ವ್ಯಾ ಬಾಜುಕ್ ಎಕ್ ದೆವಾಚೊ ದುತ್ ಇಬೆ ಹೊತ್ತೊ ಜೆಕರಿಯಾಕ್ ದಿಸ್ಲೊ.

12ತೆಕಾ ಬಗಟಲ್ಲ್ಯಾ ತನ್ನಾ ಜೆಕರಿಯಾ ಎಗ್ದಮ್ ಘಾಬರ್‍ಲೊ ಅನಿ ಭಿಂವ್ನ್ ಗೆಲೊ.

13ಖರೆ, ದೆವಾಚ್ಯಾ ದುತಾನ್ ಜೆಕರಿಯಾಕ್ “ಜೆಕರಿಯಾ ಭಿಂವ್‍ನಕ್ಕೊ! ದೆವಾನ್ ತುಜಿ ಮಾಗ್ನಿ ಆಯಿಕ್ಲ್ಯಾನಾಯ್. ತುಜಿ ಬಾಯ್ಕೊ ಎಲಿಜಾಬೆತ್ ಎಕ್ ಲೆಕಾಕ್ ಜಲಮ್ ದಿತಾ,ತುಮಿ ತೆಕಾ ಜುವಾಂವ್ ಮನುನ್ ನಾವ್ ಥವ್ಚೆ.

14ತೊ ಜಲಮಲ್ಲ್ಯಾ ತನ್ನಾ ತುಮ್ಕಾ ಲೈ ಕುಶಿ ಹೊತಾ, ಅನಿ ದುಸ್ರ್ಯಾ ಕವ್ಡ್ಯಾಕಿ ಲೊಕಾಕ್ನಿ ಕವ್ಡಿಕಿ ಕುಶಿ ಹೊತಾ!

15ದೆವಾಚ್ಯಾ ನದ್ರೆತ್ ತೊ ಮೊಟೊ ಮಾನುಸ್ ಹೊತಾ, ಅನಿ ತೊ ವಾಯ್ನ್ ಹೊಂವ್ದಿ, ನಿಶಾ ಹೊತಲೆ ಕಾಯ್ಬಿ ಹೊಂವ್ದಿ ಫಿ ನಾ. ತೊ ಜಲ್ಮುಚ್ಯಾಕಿ ಅದ್ದಿತ್ನಾಚ್ ತೊ ಪವಿತ್ರ್ ಆತ್ಮ್ಯಾನ್ ಭರಲ್ಲೊ ರ್‍ಹಾತಾ.

16ಇಸ್ರಾಯೆಲಾಚ್ಯಾ ಸುಮಾರ್ ಲೊಕಾಕ್ನಿ ತೊ ತೆಂಚ್ಯಾ ದೆವ್ ಸರ್ವೆಸ್ವರಾಕ್ಡೆ ಫಾಟಿ ಪರ್‍ತುನ್ ಹಾನ್ತಾ.

17ತೊ ಧನ್ಯಾಚ್ಯಾ ಫಿಡೆ-ಫಿಡೆ ಜಾತಾ.ಎಲಿಯಾ ಪ್ರವಾದ್ಯಾಚೆ ಗುನ್ ಅನಿ ಬಳ್ ತೆಕಾ ರ್‍ಹಾತಾ. ಬಾಬಾಕ್ನಿ ಅನಿ ಪೊರಾಕ್ನಿ ತೊ ಅನಿಪರ್‍ತುನ್ ಎಕ್ ಕರ್‍ತಾ; ತೊ ದೆವಾಕ್ ಖಾಲ್ತಿ ಹೊವ್ನ್ ಚಲಿನಸಲ್ಲ್ಯಾಕ್ನಿ ದೆವಾಚ್ಯಾ ವಾಟೆನ್ ಚಲಿ ಸರ್ಕೆ ಕರ್‍ತಾ; ದೆವಾಚ್ಯಾ ಲೊಕಾಕ್ನಿ ದೆವಾಸಾಟ್ನಿ ತಯಾರ್ ಕರ್‍ತಾ”, ಮನುನ್ ಸಾಂಗ್ಲ್ಯಾನ್.

18ಜೆಕರಿಯಾನ್ ದೆವಾಚ್ಯಾ ದುತಾಕ್ “ಹೆ ಸಗ್ಳೆ ಹೊತಲೆ ಖರೆ ಮನುನ್ ಮಿಯಾ ಕಶೆ ವಿಶ್ವಾಸ್ ಕರು? ಮಿಯಾ ಎಕ್ ಮ್ಹಾತಾರೊ ಮಾನುಸ್,ಅನಿ ಮಾಜಿ ಬಾಯ್ಕೊಬಿ ಮ್ಹಾತಾರಿ”, ಮನುನ್ ಇಚಾರ್‍ಲ್ಯಾನ್.

19ತನ್ನಾ ದೆವಾಚ್ಯಾ ದುತಾನ್ “ದೆವಾಚ್ಯಾ ಇದ್ರಾಕ್ ರ್‍ಹಾತಲೊ ಘಾಬ್ರಿಯೆಲ್ ಮಿಯಾ, ತುಜೆಕ್ಡೆ ಬೊಲುಕ್ ಅನಿ ತುಕಾ ಹಿ ಬರಿ ಖಬರ್ ಸಾಂಗುಕ್ ಮನುನ್ ದೆವಾನ್ ಮಾಕಾ ಧಾಡುನ್ ದಿಲ್ಲೆ ಹಾಯ್.

20ಸಮಾ ಎಳಾಕ್ ಖರೆ ಹೊತಲ್ಯಾ, ಮಿಯಾ ಸಾಂಗಲ್ಲ್ಯಾ ಖಬ್ರೆರ್ ತಿಯಾ ವಿಶ್ವಾಸ್ ಕರುಕ್ನೆ, ಹೆಚೆಸಾಟ್ನಿ ಮಿಯಾ ಸಾಂಗಲ್ಲಿ ಗೊಸ್ಟ್ ಖರಿ ಹೊಯ್‍ ಪತರ್ ತುಕಾ ಬೊಲುಕ್ ಹೊಯ್ನಾ; ತಿಯಾ ಮುಕ್ಕೊ ಹೊವ್ನ್ ರ್‍ಹಾತೆ”, ಮನುನ್ ಸಾಂಗ್ಲ್ಯಾನ್.

21ಹಿಕ್ಡಿ ಲೊಕಾ, ಜೆಕರಿಯಾಚಿ ವಾಟ್ ಬಗುನ್ಗೆತ್ ಹೊತ್ತಿ, ಅನಿ ಹ್ಯೊ ಎವ್ಡೊ ಲೈ ಎಳ್ ಭುತ್ತುರ್ ಕಶ್ಯಾಕ್ ರ್‍ಹಾಲೊ ಅಸಿಲ್! ಮನುನ್ ಅಜಾಪ್ ಹೊಲಿ.

22ಜೆಕರಿಯಾ ದೆವಾಚ್ಯಾ ಗುಡಿತ್ನಾ ಭಾಯ್ರ್ ಯೆಲ್ಲ್ಯಾ ತನ್ನಾ ತೆಕಾ ಲೊಕಾಂಚ್ಯಾಕ್ಡೆ ಬೊಲುಕ್ ಹೊವುಕ್ನಾ, ಹಾತಾನಿ ಸೊನ್ನಿ ಕರುನ್ ತೆನಿ ದಾಕ್ವುಲ್ಯಾನ್ ತೆಕಾ ಬೊಲುಕುಚ್ ಹೊವ್ಕ್ ನಾ.ತನ್ನಾ ದೆವಾಚ್ಯಾ ಗುಡಿತ್ ತೆನಿ ದರ್ಶನ್ ಬಗಟ್ಲ್ಯಾನ್ ಮನುನ್ ಲೊಕಾಕ್ನಿ ಕಳ್ಳೆ.

23ದೆವಾಚ್ಯಾ ಗುಡಿತ್ ಕಾಮ್ ಕರ್‍ತಲಿ ಪಾಳಿ ಸರಲ್ಲ್ಯಾ ತನ್ನಾ ಜೆಕರಿಯಾ ಅಪ್ನಾಚ್ಯಾ ಘರಾಕ್ ಗೆಲೊ.

24ಎಕ್ ಉಲ್ಲಿ ದಿಸಾ ಗೆಲ್ಲ್ಯಾ ತನ್ನಾ ತೆಚಿ ಬಾಯ್ಕೊ ಎಲಿಜಾಬೆತ್ ಗರ್‍ವಾರ್ ಹೊಲಿ, ಪಾಚ್ ಮ್ಹಯಿನೆ ತಿ ಘರಾತ್ನಾ ಭಾಯ್ರ್ ಪಡುಕ್ನಾ.

25ತನ್ನಾ ಎಲಿಜಾಬೆತಾನ್,“ಆಕ್ರಿಕ್ ಅತ್ತಾತರ್ ದೆವಾನ್ ಮಾಜೆಸಾಟಿ ಕವ್ಡೆ ಮೊಟೆ ಕಾಮ್ ಕರ್‍ಲ್ಯಾನ್, ಲೊಕಾಂಚ್ಯಾ ಇದ್ರಾಕ್ ಹೊತ್ತೆ ಮಾಜೆ ಮಾಲ್ದಿಸಾವ್ ಕಾಡುನ್ ಟಾಕ್ಲ್ಯಾನ್” ಮಟ್ಲಿನ್.

26ಎಲಿಜಾಬೆತ್ ಸಾ ಮ್ಹೈಯ್ನ್ಯಾಚಿ ಗರ್‍ವಾರ್‍ನಿ ಹೊತ್ತ್ಯಾ ತನ್ನಾ, ದೆವಾನ್ ಘಾಬ್ರಿಯೆಲ್ ದುತಾಕ್ ಗಾಲಿಲಿಯಾ ಪ್ರಾಂತ್ಯಾಚ್ಯಾ ನಜರೆತ್ ಮನ್ತಲ್ಯಾ ಮೊಟ್ಯಾ ಗಾವಾಕ್ ಧಾಡುನ್ ದಿಲ್ಯಾನ್.

27ಘಾಬ್ರಿಯೆಲ್ ದೆವಾಚೊ ದುತ್ ಮರಿ ಮನ್ತಲ್ಯಾ ಲಗಿನ್ ಹೊಯ್‍ ನಸಲ್ಲ್ಯಾ ಎಕಾ ಚೆಡ್ವಾಕ್ ಎಕ್ ಖಬರ್ ಘೆವ್ನ್ ಯಲ್ಲೊ. ತ್ಯಾ ಚೆಡ್ವಾಚಿ ದಾವಿದ್ ರಾಜಾಚ್ಯಾ ಘರಾನ್ಯಾಚ್ಯಾ ಜುಜೆ ಮನ್ತಲ್ಯಾಚ್ಯಾ ವಾಂಗ್ಡಾ ಲಗ್ನಾಚಿ ಗೊಸ್ಟ್ ಹೊಲ್ಲಿ.

28ದೆವಾಚೊ ದುತ್ ತಿಚೆಕ್ಡೆ ಯೆಲೊ ಅನಿ “ದೆವಾಚೆ ಸಮಾದಾನ್ ತುಜ್ಯಾ ವಾಂಗ್ಡಾ ರಾಂವ್ದಿತ್! ದೆವ್ ತುಜ್ಯಾ ವಾಂಗ್ಡಾ ಹಾಯ್ ಅನಿ ದೆವಾನ್ ತುಕಾ ಆಶಿರ್ವಾದ್ ದಿಲ್ಯಾನಾಯ್!” ಮಟ್ಲ್ಯಾನ್.

29ಹೆ ಆಯ್ಕುನ್ ಮರಿ ಘಾಬರ್‍ಲಿ ಅನಿ ಹ್ಯಾ ದೆವಾಚ್ಯಾ ದುತಾನ್ ಸಾಂಗಲ್ಲ್ಯಾ ಖಬ್ರೆಚೊ ಅರ್ತ್‍ ಕಾಯ್ ಮನುನ್ ತಿ ಯವ್ಜುಕ್ ಪಡ್ಲಿ.

30ಖರೆ ದೆವಾಚ್ಯಾ ದುತಾನ್ ತಿಕಾ, “ಮರಿ ಭಿಂವ್‍ನಕೊ; ದೆವಾಚಿ ಮೊಟಿ ಕುರ್ಪಾ ತುಜೆ ವರ್‍ತಿ ಹಾಯ್.

31ತಿಯಾ ಗರ್‍ವಾರ್ ಹೊತೆಯ್, ಅನಿ ಎಕ್ ಝಿಲ್ಗ್ಯಾಕ್ ಜಲಮ್ ದಿತೆಯ್, ಅನಿ ತೆಕಾ ‘ಜೆಜು’ ಮನುನ್ ನಾವ್ ಥವ್ಚೆ.

32ತೊ ಮೊಟೊ ಮಾನುಸ್ ಹೊತಾ, ಅನಿ ತೆಕಾ ಪರಮೊನ್ನತ್ ದೆವಾಚೊ ಲೆಕ್ ಮನುನ್ ಬಲ್ವುತ್ಯಾತ್.ಅನಿ ಸರ್ವೆಸ್ವರ್ ದೆವ್ ತೆಕಾ ತೆಚ್ಯಾ ಘರಾನ್ಯಾಚ್ಯಾ ದಾವಿದ್ ರಾಜಾ ಸರ್ಕೊ ರಾಜಾ ಕರ್‍ತಾ.

33ಅನಿ ತೊ ಜಾಕೊಬಾಚ್ಯಾ ಘರಾನ್ಯಾಚ್ಯಾ ಲೊಕಾಂಚೊ ರಾಜಾ ಹೊತಾ; ತೆಚೊ ರಾಜ್ ಕನ್ನಾಚ್ ಸರಿನಾ!” ಮನುನ್ ಸಾಂಗ್ಲ್ಯಾನ್.

34ತನ್ನಾ ಮರಿನ್ “ಮಿಯಾ ಎಕ್ ನಗಿನ್ ಹೊಯ್ನಸಲ್ಲೆ ಚೆಡು,ಹೆ ಸಗ್ಳೆ ಕಶೆ ಹೊತಾ?” ಮನುನ್ ದೆವಾಚ್ಯಾ ದುತಾಕ್ ಇಚಾರ್‍ಲಿನ್.

35ತನ್ನಾ ದೆವಾಚ್ಯಾ ದುತಾನ್ ಪವಿತ್ರ್ ಆತ್ಮೊ ತುಜೆ ವರ್‍ತಿ ಯೆತಾ ಅನಿ ದೆವಾಚೊ ಬಳ್ ತುಜ್ಯಾ ವಾಂಗ್ಡಾ ರ್‍ಹಾತಾ, ಹೆಚೆಸಾಟ್ನಿಚ್ ಹ್ಯಾ ಪವಿತ್ರ್ ಪೊರಾಕ್ ದೆವಾಚೊ ಲೆಕ್ ಮನುನ್ ಬಲ್ವುತ್ಯಾತ್.

36ತಿಯಾ ಯಾದ್ ಥವ್ನ್ ಘೆ, ಪೊರಾ ಹೊಯ್‍ನ್ಯಾತ್ ಮನುನ್ ಸಾಂಗಲ್ಲಿ ತುಮ್ಚಿ ಸಮಂದಿನ್ ಎಲಿಜಾಬೆತ್ ಮ್ಹಾತಾರಿ ಹೊಲ್ಯಾರ್ಬಿ, ಅತ್ತಾ ಸಾ ಮ್ಹೈಯ್ನ್ಯಾಚಿ ಗರ್‍ವಾರ್‍ನಿ.

37ಕಶ್ಯಾಕ್ ಮಟ್ಲ್ಯಾರ್ ದೆವಾಚ್ಯಾ ಹಾತಿನ್ ಹೊಯ್ನಾ ಮನ್ತಲೆ ಕಾಯ್ಬಿ ನಾ, ಮನುನ್ ಸಾಂಗ್ಲ್ಯಾನ್.

38ತನ್ನಾ ಮರಿನ್ ಮಿಯಾ ಸರ್ವೆಸ್ವರಾಚಿ ದಾಸಿ, ತಿಯಾ ಸಾಂಗಲ್ಲ್ಯಾ ಸರ್ಕೆ ಮಾಕಾ ಹೊಂವ್ದಿ, ಮಟ್ಲಿನ್. ತನ್ನಾ ದೆವಾಚೊ ದುತ್ ತಿಕಾ ಸೊಡುನ್ ಗೆಲೊ.

39ತನ್ನಾ ತಾಬೊಡ್ತೊಬ್ ಮರಿ ಗಡ್ಬಡಿನ್ ತಯಾರ್ ಹೊಲಿ, ಅನಿ ಜುದೆಯಾಚ್ಯಾ ಮಡ್ಡ್ಯಾಂಚ್ಯಾ ಎಕ್ ಶಾರಾಕ್ ಲುಗ್ಗುಲಗ್ಗುನಾ ಗೆಲಿ.

40ಥೈ ಜೆಕರಿಯಾಚ್ಯಾ ಘರಾಕ್ ಗೆಲಿ, ಅನಿ ತೆನಿ ಎಲಿಜಾಬೆತಾಕ್ ನಮಸ್ಕಾರ್ ಕರ್‍ಲಿನ್.

41ಮರಿಚ್ಯಾ ನಮಸ್ಕಾರಾಚೊ ಆವಾಜ್ ಆಯ್ಕಲ್ಲ್ಯಾ ತನ್ನಾ, ಎಲಿಜಾಬೆತಿಚ್ಯಾ ಪೊಟಾತ್ಲ್ಯಾ ಪೊರಾನ್ ಹುಡಿ ಮಾರ್‍ಲ್ಯಾನ್, ತನ್ನಾ ಎಲಿಜಾಬೆತ್ ಪವಿತ್ರ್ ಆತ್ಮ್ಯಾನ್ ಭರಲ್ಲಿ ಹೊತ್ತಿ.

42ಅನಿ ತೆನಿ ಮೊಟ್ಯಾನ್ “ಸಗ್ಳ್ಯಾ ಬಾಯ್ಕಾಮನ್ಸಾಂಚ್ಯಾನ್ಕಿ ಜಾಸ್ತಿ ಆಶಿರ್ವಾದ್ ಗಾವಲ್ಲಿ ಬಾಯ್ಕೊಮನುಸ್ ತಿಯಾ, ಅನಿ ತುಜ್ಯಾ ಪೊಟಾನಿ ಜಲಮ್ತಲೊ ಪೊರ್‌ಬಿ ಲೈ ಮೊಟೊ ಆಶಿರ್ವಾದ್ ಗಾವಲ್ಲೊ!

43ಮಾಜ್ಯಾ ಮಾಲ್ಕಾಚಿ ಬಾಯ್ ಮಾಕಾ ಭೆಟುಕ್ ಯೆತಲೆ,ಹೆ ಎವ್ಡೆ ಮೊಟೆ ಘಡಿತ್ ಮಾಜೆ ವಾಂಗ್ಡಾ ಕಶೆ ಘಡುಕ್ ಹೊತಾ?”

44ತುಜ್ಯಾ ನಮಸ್ಕಾರಾಚೊ ಆವಾಜ್ ಕಾನಾತ್ ಪಡಲ್ಲ್ಯಾ ತನ್ನಾಚ್, ಮಾಜ್ಯಾ ಪೊಟಾತ್ಲ್ಯಾ ಪೊರಾನ್ ಕುಸಿನ್ ಹುಡಿ ಮಾರ್‍ಲ್ಯಾನ್.

45ದೆವಾನ್ ದಿಲ್ಲಿ ಖಬರ್ ಖರಿ ಮನುನ್ ವಿಶ್ವಾಸ್ ಕರಲ್ಲಿ ತಿಯಾ ಕವ್ಡಿ ಧನ್ಯ್.

46ತನ್ನಾ ಮರಿ, ಮಾಜೆ ಕಾಳಿಜ್ ಮಾಲ್ಕಾಚಿ ಸ್ತುತಿ ಕರ್‍ತಾ;

47ಮಾಕಾ ಸುಟ್ಕಾ ದಿತಲ್ಯಾ ದೆವಾಕ್ ಲಾಗುನ್ ಮಾಜ್ಯಾ ಜಿವಾಕ್ ಲೈ ಕುಸಿ ಹೊವ್ಕ್ ಲಾಗ್ಲಾ,

48ತೆನಿ ಮಾಜಿ ಎಗ್ದಮ್ ಕಿಳ್ ಗುಲಾಮಾಚಿ ಯಾದ್ ಕರ್‍ಲ್ಯಾನ್! ಹೆಚೆನ್ ಫಿಡೆ ಸಗ್ಳಿ ಲೊಕಾ ಮಾಕಾ ಎಕ್ ಬರೆ ಭಾಗ್ ಗಾವಲ್ಲಿ ಮನುನ್ ಬಲ್ವುತ್ಯಾತ್,

49ಕಶ್ಯಾಕ್ ಮಟ್ಲ್ಯಾರ್ ಮೊಟ್ಯಾ ದೆವಾನ್ ಮಾಜೆಸಾಟಿ ಮೊಟಿ-ಮೊಟಿ ಕಾಮಾ ಕರ್‍ಲ್ಯಾನಾಯ್. ತೆಚೆ ನಾವ್ ಎಗ್ದಮ್ ಪವಿತ್ರ್ ಹಾಯ್;

50ಅಪ್ನಾಕ್ ಮರ್‍ಯಾದ್ ದಿತಲ್ಯಾಂಚ್ಯಾ ವರ್‍ತಿ ಎಕ್ ಪಿಳ್ಗಿಕ್ನಾ ಅನಿ ಎಕ್ ಪಿಳ್ಗಿ ಪತರ್ ತೊ ದಯಾ ದಾಕ್ವುತಾ.

51ತೆನಿ ಅಪ್ನಾಚೊ ಲೈ ಮೊಟ್ಯಾ ತಾಕ್ತಿಚೊ ಬಾವ್ಳೊ ಫಿಡೆ ಕರ್‍ಲ್ಯಾನಾಯ್ ಅನಿ ಗರುಕಿನ್ ಹೊತ್ತ್ಯಾಂಚ್ಯಾ ಸಗ್ಳ್ಯಾ ಯವ್ಜನ್ಯಾ ಹಾಳ್ ಕರುನ್ ಟಾಕ್ಲ್ಯಾನ್.

52ತೆನಿ ಮೊಟ್ಯಾ-ಮೊಟ್ಯಾ ರಾಜಾಕ್ನಿ ತೆಂಚ್ಯಾ ಕುರ್ಚಿ ವೈನಾ ಖಾಲ್ತಿ ಹಾನ್ಲ್ಯಾನ್, ಅನಿ ಎಗ್ದಮ್ ಕಿಳ್ ಹೊತ್ತ್ಯಾಕ್ನಿ ವರ್‍ತಿ ಉಕಲ್ಲ್ಯಾನ್.

53ತೆನಿ ಭುಕೆನ್ ಹೊತ್ತ್ಯಾಕ್ನಿ ಬರಿ-ಬರಿ ಸಾಮಾನಾ ದಿಲ್ಯಾನ್, ಅನಿ ಸಾವ್ಕಾರಾಕ್ನಿ ಖಾಲಿ ಹಾತಾನಿ ಫಾಟಿ ಪರ್ತುನ್ ಧಾಡ್ಲ್ಯಾನ್.

54ಅಮ್ಚ್ಯಾ ಫಾಟ್ಲ್ಯಾ ಲೊಕಾಕ್ನಿ ದಿಲ್ಲಿ ಗೊಸ್ಟ್ ತೆನಿ ರಾಕ್ಲ್ಯಾನ್, ಅನಿ ಅಪ್ನಾಚ್ಯಾ ಸೆವಕಾಕ್ ಇಸ್ರಾಯೆಲಾಕ್ ಮಜತ್ ಕರುಕ್ ಮನುನ್ ತೊ ಯೆಲೊ.

55ತೆನಿ ಅಬ್ರಾಹಾಮಾಚಿ ಯಾದ್ ಥವ್ನ್ ಘೆವ್ನ್ ದಯಾ ದಾಕ್ವುಲ್ಯಾನ್ ಅನಿ ತೆಚ್ಯಾ ಘರಾನ್ಯಾಚ್ಯಾ ಲೊಕಾಕ್ನಿ ಸದಾ ಸರ್ವತಾ ಪತರ್ ದಯಾ ದಾಕ್ವುಲ್ಯಾನ್!

56ಮರಿ ಜಗ್ಗೊಳ್ ತಿನ್ ಮ್ಹಯಿನೆ ಎಲಿಜಾಬೆತಿಚ್ಯಾ ವಾಂಗ್ಡಾ ರ್‍ಹಾಲಿ, ಅನಿ ಮಾನಾ ಅಪ್ನಾಚ್ಯಾ ಘರಾಕ್ ಗೆಲಿ.

57ಎಲಿಜಾಬೆತಾನ್ ಪೊರಾಕ್ ಜಲಮ್ ದಿತಲೊ ಎಳ್ ಯೆಲೊ, ಅನಿ ತೆನಿ ಎಕ್ ಲೆಕಾಕ್ ಜಲಮ್ ದಿಲಿನ್.

58ತಿಚ್ಯಾ ಸೆಜಾರ್‍ಯಾನಿ ಅನಿ ಸೊಯ್ರ್ಯಾನಿ ಹಿ ಖಬರ್ ಆಯಿಕ್ಲ್ಯಾನಿ ಅನಿ ದೆವಾನ್ ತಿಚ್ಯಾ ಜಿವನಾತ್ ಕವ್ಡೆ ಮೊಟೆ ಕಾಮ್ ಕರ್‍ಲ್ಯಾನ್, ಮಟ್ಲ್ಯಾನಿ, ಅನಿ ತಿಚ್ಯಾ ವಾಂಗ್ಡಾ ತೆನಿಬಿ ಲೈ ಕುಶಿ ಹೊಲ್ಯಾನಿ.

59ಪೊರಾಕ್ ಆಟ್ ದಿಸ್ ಹೊಲ್ಲ್ಯಾ ಮಾನಾ ತೆನಿ ಸುನ್ನತ್ ಕರುಕ್ ಮನುನ್ ತೆಕಾ ಘೆವ್ನ್ ಯೆಲ್ಯಾನಿ, ಅನಿ ಜೆಕರಿಯಾ ಮನುನ್ ತೆಚ್ಯಾ ಬಾಬಾಚೆಚ್ ನಾವ್ ತೆಕಾ ಥವ್ಚೆ, ಮನುನ್ ಯವಜಲ್ಲ್ಯಾನಿ.

60ಖರೆ, ತೆಚ್ಯಾ ಬಾಯ್ನ್ “ನಕ್ಕೊ! ತೆಕಾ ಜುವಾಂವ್ ಮನುನ್ ನಾವ್ ಥವ್ಕ್ ಪಾಜೆ” ಮಟ್ಲಿನ್.

61ಖರೆ ಲೊಕಾನಿ ತಿಕಾ “ತುಜ್ಯಾ ಸೊಯ್ರ್ಯಾತ್ನಿ ಹ್ಯಾ ನಾವಾಚೊ ಕೊನ್ಬಿ ನಾ!” ಮಟ್ಲ್ಯಾನಿ.

62ತನ್ನಾ ತೆನಿ ತ್ಯಾ ಪೊರಾಂಚ್ಯಾ ಬಾಬಾಕ್ ಪೊರಾಕ್ ಕಾಯ್ ಮನುನ್ ನಾವ್ ಥವ್ಚೆ ಮನುನ್ ತಿಯಾ ಮನ್ತೆ ಮನುನ್ ಸೊನ್ನಿ ಕರುನ್ ಇಚಾರ್‍ಲ್ಯಾನಿ.

63ತನ್ನಾ ಜೆಕರಿಯಾನ್ ಎಕ್ ಫಳಿ ಇಚಾರ್‍ಲ್ಯಾನ್, ಅನಿ “ತೆಚೆ ನಾವ್ ಜುವಾಂವ್” ಮನುನ್ ಫಳಿ ವರ್‍ತಿ ಲಿವ್ಲ್ಯಾನ್, ತನ್ನಾ ತೆನಿ ಸಗ್ಳೆ ಜಾನಾ ಅಜಾಪ್ ಹೊಲೆ.

64ಅನಿ ತನ್ನಾಚ್ ಜೆಕಾರಿಯಾ ಬೊಲುಕ್‍ಲಾಲೊ ಅನಿ ದೆವಾಕ್ ಹೊಗ್ಳುಕ್‍ ಲಾಗ್ಲೊ.

65ಹೆ ಆಯ್ಕಲ್ಲಿ ಅಜು ಬಾಜುಚಿ ಲೊಕಾ ಭಿಂಯಾನ್ ಭರ್‍ಲಿ,ಅನಿ ಹಿ ಖಬರ್ ಜುದೆಯಾಚ್ಯಾ ಮಡ್‍ಯಾಂಚ್ಯಾ ಜಾಗ್ಯಾರ್ ಸಗ್ಳ್ಯಾಕ್ಡೆ ಫರ್ಗಟ್ಲಿ.

66ಹಿ ಖಬರ್ ಆಯ್ಕಲ್ಲೆ ಸಗ್ಳೆ ಜಾನಾ “ಹ್ಯೊ ಪೊರ್ ಫಿಡೆ ಕಾಯ್ ಹೊತಾ ಅಸಿಲ್?” ಮನುನ್ ಇಚಾರುಕ್‍ಲಾಲೆ, ದೆವಾಚೊ ಬಳ್ ತ್ಯಾ ಪೊರಾ ವರ್‍ತಿ ಹೊತ್ತೊ.

67ಜುವಾಂವಾಚೊ ಬಾಬಾ ಜೆಕರಿಯಾ ಪವಿತ್ರ್ ಆತ್ಮ್ಯಾನ್ ಭರ್‍ಲೊ, ಅನಿ ದೆವಾಚಿ ಬರಿ ಖಬರ್ ಸಾಂಗುಕ್‍ಲಾಲೊ.

68ಇಸ್ರಾಯೆಲಾಚ್ಯಾ ದೆವಾಚಿ ಸರ್ವೆಸ್ವರಾಚಿ ಸ್ತುತಿ ಕರುವಾ! ತೊ ಅಪ್ನಾಚ್ಯಾ ಲೊಕಾಂಚ್ಯಾ ಆದಾರಾಕ್ ಯೆಲೊ, ಅನಿ ತೆಂಕಾ ಸ್ವತಂತ್ರ್ ಕರುಕ್ ಯೆಲೊ.

69ತೆನಿ ಅಪ್ನಾಚ್ಯಾ ಸೆವಕಾಚ್ಯಾ ದಾವಿದಾಚ್ಯಾ ಘರಾನ್ಯಾತ್ನಾ, ಅಮ್ಕಾ ಎಕ್ ಲೈ ಮೊಟೊ ಸುಟ್ಕಾ ದಿತಲೊ ಮಾನುಸ್ ದಿಲ್ಯಾನಾಯ್.

70ಲೈ ವರ್ಸಾಂಚ್ಯಾ ಫಾಟಿಚ್ ಅಪ್ನಾಚ್ಯಾ ಪವಿತ್ರ್ ಪ್ರವಾದ್ಯಾಂಚ್ಯಾ ತೊಂಡಾನಿತ್ನಾ, ತೆನಿ ಗೊಸ್ಟ್ ದಿಲ್ಲ್ಯಾ ಸರ್ಕೆ

71ಅಮ್ಚ್ಯಾ ದುಸ್ಮಾನಾಂಚ್ಯಾ ಹಾತಿತ್ನಾ, ಅಮ್ಕಾ ತೆನಿ ರಾಕನ್ ಕರ್‍ಲ್ಯಾನ್ ಅನಿ ಅಮ್ಚೊ ದ್ವೆಸ್ ಕರ್‍ತಲ್ಯಾಂಚ್ಯಾ ಅದಿಕಾರಾತ್ನಾ ತೆನಿ ಅಮ್ಕಾ ಸೊಡ್ವುತಾ ಮನುನ್.

72ಅಮ್ಚ್ಯಾ ವಾಡ್ ವಡ್ಲಾಂಚ್ಯಾ ವರ್‍ತಿ ದಯಾ ದಾಕ್ವುತಾ, ಅನಿ ಅದ್ದಿ ಕರಲ್ಲ್ಯಾ ಪವಿತ್ರ್ ಕರಾರಾಚಿ ಯಾದ್ ಥವ್ನ್ ಘೆತಾ, ಮನುನ್ ಸಾಂಗಟಲ್ಲ್ಯಾನ್.

73ಅಮ್ಚ್ಯಾ ವಾಡ್ ವಡ್ಲಾ ಬಾಬಾ ಅಬ್ರಾಹಾಮಾಚ್ಯಾ ವಾಂಗ್ಡಾ ಕರಲ್ಲ್ಯಾ ಮನಾಕ್‍ ಲಾಗುನ್ ಕರಲ್ಲ್ಯಾ ಆನೆ ಸರ್ಕೆ,

74ತೆನಿ ಅಮ್ಕಾ ಅಮ್ಚ್ಯಾ ದುಸ್ಮಾನಾಂಚ್ಯಾ ಹಾತಾತ್ನಾ ಸೊಡ್ಸುತಾ ಮನುನ್ ಗೊಸ್ಟ್ ದಿಲ್ಲ್ಯಾನ್, ಅನಿ ಕಾಯ್ಬಿ ಭಿಂಯೆನಸ್ತಾನಾ ಅಪ್ನಾಚಿ ಸೆವಾ ಕರಿ ಸರ್ಕೆ ಕರ್‍ಲ್ಯಾನ್.

75ಅಶೆ ಅಮಿ ಎಕ್ ಎಳಾರ್, ಅಮ್ಚ್ಯಾ ಸಗ್ಳೆ ಜಿವನ್‍ಬರ್ ತೆಚ್ಯಾ ಇದ್ರಾಕ್, ಪವಿತ್ರ್ ಅನಿ ಬರಿ ಕಾಮಾ ಕರ್‍ತಲಿ ಲೊಕಾ ಹೊವ್ನ್ ರಾವ್‍ಸಾಟ್ನಿ.

76“ಅನಿ ತುಕಾ, ಮಾಜ್ಯಾ ಪೊರಾ,ಮಹೊನ್ನತ್ ದೆವಾಚೊ ಪ್ರವಾದಿ ಮನುನ್ ಬಲ್ವುತ್ಯಾತ್. ಧನಿಯಾಚಿ ವಾಟ್ ತಯಾರ್ ಕರುಕ್, ತಿಯಾ ತೆಚ್ಯಾ ಫಿಡೆ-ಫಿಡೆ ಜಾತೆಯ್.

77ಅನಿ ತೆಚ್ಯಾ ಲೊಕಾಕ್ನಿ ತೆಂಚ್ಯಾ ಪಾಪಾನಿತ್ನಾ ಮಾಪ್ ಗಾವಲ್ಲ್ಯಾ ವೈನಾ, ಸುಟ್ಕೆಚಿ ಬುದ್ವಂತ್ಕಿ ದಿತಾ ಮನುನ್ ಸಾಂಗ್ತೆ.

78ಅಮ್ಚೊ ದೆವ್ ಕನ್ನಾಬಿ ದಯಾ ದಾಕ್ವುತಲೊ ಅನಿ ಸಗ್ಳೆ ದಿತಲೊ. ಅನಿ ತೊ ಅಮ್ಚ್ಯಾ ವರ್‍ತಿ ಸುಟ್ಕಾ ದಿತಲೊ ಮೊಟೊ ಉಜ್ವೊಡ್ ಫಾಕಿ ಸಾರ್ಕೊ ಕರ್‍ತಾ,

79ಅನಿ ಸರ್‍ಗಾ ವೈನಾ ಮರ್‍ನಾಚ್ಯಾ ಭಿಂಯಾತ್ ಅನಿ ದಾಟ್ ಕಾಳ್ಕಾತ್ ಜಿವನ್ ಕರ್‍ತಲ್ಯಾಂಚ್ಯಾ ಸಗ್ಳ್ಯಾಂಚ್ಯಾ ವರ್‍ತಿ ಉಜ್ವೊಡ್ ಘಾಲುಕ್, ಅನಿ ಅಮ್ಚಿ ಪಾವ್ಲಾ ಶಾಂತಿಚ್ಯಾ ವಾಟೆನ್ ಚಲ್ವುನ್ ಘೆವ್ನ್ ಜಾವ್ಕ್”.

80ತೊ ಪೊರ್ ಆಂಗಾನ್ ಅನಿ ಮನಾನ್ ಮೊಟೊ ಹೊಲೊ, ಅನಿ ಇಸ್ರಾಯೆಲಾಚ್ಯಾ ಲೊಕಾಕ್ನಿ ದಿಸಿ ಪತರ್ ಹಾಳ್ ಡಂಗ್ಳಿತುಚ್ ರ್‍ಹಾಲೊ.

Jump to: Chapter 2 →